ມີເດຍລາວແຂວງສາລະວັນ ເພື່ອເປັນການອະນຸລັກ, ປົກປັກຮັກສາ ແລະ ບູລະນະປະຕິສັງຂອນ ແຫຼ່ງວັດຖຸບູຮານ ທີ່ມີຄຸນຄ່າ, ມີຮ່ອງຮອຍທາງດ້ານວັດທະນະທຳ ແລະ ປະຫວັດສາດ ກໍຄືມໍລະດົກແຫ່ງຊາດ, ມໍລະດົກຂອງທ້ອງຖີ່ນ. ພະແນກ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງສາລະວັນ ສະເໜີແຜນດຳເນີນງານສ້າງມໍລະດົກທ້ອງຖີ່ນຂອງແຂວງ ໂດຍໄດ້ລິ່ເລີ່ມສ້າງຫໍໄຕປີດົກ (ວັດກາງ) ເປັນບູລິມະສິດ ໃຫ້ກາຍເປັນມໍລະດົກທ້ອງຖີ່ນ ແຫ່ງທຳອິດຂອງແຂວງສາລະວັນ.

ທ່ານ ມະໄລວອນ ສີປະເສີດ ຫົວໜ້າພະແນກ ຖວທ ແຂວງສາລະວັນ ໄດ້ຜ່ານກົດໝາຍວ່າດ້ວຍມໍລະດົກແຫ່ງຊາດ ສະບັບເລກທີ 022/ສພຊ, ລົງວັນທີ 24 ທັນວາ 2013 ເຊິ່ງມີທັງໝົດ XII ພາກ, 12 ໝວດ ແລະ 92 ມາດຕາ ໂດຍຍົກໃຫ້ເຫັນເຖີງຄວາມໝາຍຄວາມສຳຄັນຂອງມໍລະດົກແຫ່ງຊາດລະດັບທ້ອງຖີ່ນ ທີ່ມີຄຸນຄ່າອັນໂດດເດັ່ນ ທາງດ້ານວັດທະນະທຳ, ປະຫວັດສາດ ແລະ ທຳມະຊາດ ສິ່ງທີ່ເກີດຂຶ້ນ ແລະ ຕັ້ງຢູ່ໃນທ້ອງຖີ່ນ, ທັງໄດ້ຜ່ານບົດຕີລາຄາການຈັດຕັ້ງປະຕິບັດວຽກງານໃນໄລຍະຜ່ານມາ, ຕີລາຄາຜົນໄດ້ຮັບ, ຂໍ້ຄົງຄ້າງ ແລະ ບາງບົດຮຽນທີ່ຖອດຖອນໄດ້, ເຊີ່ງໄດ້ສຳເລັດການການຂຶ້ນທະບຽນພຣະພຸດທະຮູບ ແລະ ວັດຖຸມີຄ່າ ຢູ່ວັດສີມຸງຄຸນ (ວັດກາງ) ເມືອງສາລະວັນ, ວັດພຣະບາດນາດູ່ ເມືອງລະຄອນເພັງ ແລະ ສຳຫຼວດ, ເກັບກຳຂໍ້ມູນຢ່າງລະອຽດ.

ຫໍໄຕປີດົກ ວັດສີມຸງຄຸນ ເປັນສະຖານທີ່ມີຄວາມໝາຍຄວາມສຳຄັນ ແລະ ມີຮ່ອງຮອຍທາງດ້ານວັດທະນະທຳ, ປະຫວັດສາດ, ເປັນສູນລວມຈິດໃຈຂອງຊາວແຂວງສາລະວັນ ໄດ້ຮັບການສ້າງຕັ້ງຂຶ້ນແຕ່ປີ ຄສ 1784 (ກ່ອນໜ້ານີ້ 237 ປີ), ໃນເມື່ອກ່ອນມີໂຄງສ້າງເປັນຫໍປະສາດ ມີ 45 ເສົາ ແລະ ລັກສະນະການສ້ງແບບບູຮານ ເຊັ່ນ: ການເຈາະ, ການຊີ່ວ ແລະ ອື່ນໆ, ທັງມີການຄວັດ, ແກະສະຫຼັກລວດລາຍ ທີ່ເປັນເອກະລັກຂອງຊາດ, ທ້ອງຖີ່ນ. ແຜນດຳເນີນງານດັ່ງກ່າວ ໄດ້ກຳນົດຈຸດປະສົງ, ເນື້ອໃນກິດຈະກຳອັນລະອຽດເລີກເຊີ່ງ ແລະ ລະດັບຄາດໝາຍຕ່າງໆຕໍ່ກັບການຈັດຕັ້ງປະຕິບັດ ນັບແຕ່ປີ 2021-2022 ເຊີ່ງແບ່ງອອກເປັນ 4 ໄລຍະ ເປັນຕົ້ນ: ການແຕ່ງຕັ້ງບັນດາອະນຸກຳມະການຂັ້ນຕ່າງໆ, ປຶກສາຫາລື ແລະ ນຳສະເໜີຂັ້ນຕອນ, ບາດກ້າວ, ສຳຫຼວດ, ເກັບກຳຂໍ້ມູນຂຽນປະຫວັດ, ຂຶ້ນທະບຽນ, ກຳນົດຂອບເຂດ, ລະບຽບການຄຸ້ມຄອງໃນການປົກປັກຮັກສາ ແລະ ປຸກລະດົມສັງຄົມ ປະກອບສ່ວນເຂົ້າຮ່ວມຂະບວນການດັ່ງກ່າວໃຫ້ຟົດຟື້ນ ແລະ ສາມາດປະກາດເປັນມໍລະດົກແຫ່ງຊາດໃນລະດັບທ້ອງຖີ່ນ ກໍຄືແຂວງສາລະວັນ ໃນຕໍ່ໜ້າ. ຈາກນັ້ນ, ກອງປະຊຸມຄັ້ງນີ້, ໄດ້ສຸມໃສ່ການຄົ້ນຄວ້າ, ປະກອບຄຳຄິດເຫັນ, ການເຈາະຈີ້ມບາງບັນຫາຂອງປະທານ, ທັງບັນດາຜູ້ເຂົ້າຮ່ວມ ເພື່ອໃຫ້ແຜນດຳເນີນງານດັ່ງກ່າວ ມີຄວາມຮັດກຸມ, ແທດເໝາະ ແລະ ສາມາດປະຕິບັດໄປຕາມຂັ້ນຕອນ, ບາດກ້າວ ຢ່າງມີປະສິດທິພາບ.

ກອງປະຊຸມດັ່ງກ່າວໄດ້ຈັດຂຶ້ນໃນວັນທີ 24 ພະຈິກນີ້, ທີ່ສະໂມສອນແຂວງ, ໂດຍພາຍໃຕ້ການເປັນປະທານຂອງ ທ່ານ ສົມໃຈ ອຸ່ນຈິດ ຮອງເຈົ້າແຂວງໆສາລະວັນ ຜູ້ຊີ້ນຳວຽກງານວັດທະນະທຳ-ສັງຄົມ, ທ່ານ ມະໄລວອນ ສີປະເສີດ ຫົວໜ້າພະແນກ ຖວທ ແຂວງ, ມີບັນດາທ່ານຮອງເຈົ້າເມືອງ 8 ຕົວເມືອງ, ຮອງຫົວໜ້າພະແນກການ, ປະທານສະພາການຄ້າ-ອຸດສາຫະກຳແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ຂ່າວ-ພາບ: ວິໄລວອນ ສິດທິໄຊ