ມີເດຍລາວແຂວງສາລະວັນ ຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການແຜ່ລະບາດພະຍາດໂຄວິດ-19 ແຂວງສາລະວັນ ຄົ້ນຄວ້າ, ປຶກສາຫາລືເລັ່ງຄວບຄຸມການແຜ່ເຊື້ອພະຍາດໂຄວິດ-19 ຢູ່ພາຍໃນແຂວງ ແລະ ບັນດາເມືອງ ທີ່ມີຄວາມສ່ຽງອາດເກີດການແຜ່ເຊື້ອເປັນວົງກວ້າງ, ເພື່ອຕັດວົງຈອນການແຜ່ເຊື້ອ ຈື່ງໄດ້ປະເມີນຄວາມສ່ຽງ ຢ່າງຮັດກຸມ, ຊອກຫາຕົ້ນປາຍສາເຫດ ເລັ່ງແກ້ໄຂໃຫ້ທ່ວງທັນສະພາບການ.

ກອງປະຊຸມຄັ້ງນີ້, ໄດ້ສຸມໃສ່ຄົ້ນຄວ້າ, ປຶກສາຫາລືກ່ຽວກັບການຈັດຕັ້ງປະຕິບັດມາດຕະການປ້ອງກັນພະຍາດໂຄວິດ-19 ໃນແຕ່ລະໄລຍະ ກໍ່ຄືບັນດາເມືອງ ທີ່ມີການຕິດເຊື້ອຕິດຕໍ່ກັນໃນແຕ່ລະວັນ, ຕີລາຄາຂໍ້ສະດວກ, ຂໍ້ຫຍຸ້ງຍາກ ແລະ ການຈັດຕັ້ງປະຕິບັດໃນບາງກຸ່ມຄົນ ທີ່ຍັງຖືເບົາຕໍ່ກັບການປະຕິມາດຕະການ, ທັງໄດ້ຮີບຮ້ອນເລັ່ງຄວບຄຸມການແຜ່ເຊື້ອຢູ່ ເມືອງເລົ່າງາມ ແລະ ເມືອງສາລະວັນ ທີ່ມີໂຕເລກຕິດເຊື້ອເພີ່່ມຂຶ້ນຢ່າງຕໍ່ເນື່ອງໃນແຕ່ລະວັນ ເພື່ອປະເມີນສະຖານະການໃຫ້ມີຄວາມຮັດກຸມ ແລະ ເຂັ້ມງວດ, ແທດເໝາະກັບສະພາບຄວາມເປັນຈິງ.

ນອກນັ້ນກໍ່ໄດ້ຕີລາຄາການປະຕິບັດໜ້າທີ່ຂອງເຈົ້າໜ້າທີ່ ແພດໝໍ, ກຳລັງ ປກຊ-ປກສ ແລະ ພາກສ່ວນອື່ນໆ ທີ່ໄດ້ເອົາໃຈໃສ່ຕິດຕາມ, ກວດກາສະພາບການຕ່າງໆ ແລະ ການເອົາໃຈໃສ່ປີ່ນປົວຜູ້ຕິດເຊື້ອພະຍາດໂຄວິດ-19, ທັງເກັບກໍາຂໍ້ມູນ, ປະຫວັດການເຄື່ອນໄຫວຂອງຜູ້ທີ່ສຳຜັດໃກ້ຊິດ ເພື່ອຈຳກັດບໍລິເວນ ແລະ ຊອກຫາເຊື້ອພະຍາດ ບໍ່ໃຫ້ເກີດການແຜ່ເຊື້ອເປັນວົງກວ້າງ. ປັດຈຸບັນ, ທົ່ວແຂວງສາລະວັນ ມີຜູ້ຕິດເຊື້ອທີ່ໄດ້ເຂົ້າປີ່ນປົວທັງໝົດ 2 ພັນກວ່າຄົນ, ຍິງ 1 ພັນກວ່າຄົນ, ໃນນັ້ນປີ່ນປົວຫາຍດີ 1.800 ກວ່າຄົນ ແລະ ກຳລັງປີ່ນປົວ 100 ກວ່າຄົນ.ກອງປະຊຸມຄັ້ງນີ້, ຈັດຂຶ້ນໃນວັນທີ 24 ພະຈິກ 2021, ທີ່ສະໂມສອນແຂວງ, ໂດຍການເຂົ້າຮ່ວມຂອງ ທ່ານ ສົມໃຈ ອຸ່ນຈິດ ຮອງເຈົ້າແຂວງໆສາລະວັນ ຫົວໜ້າຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19, ພ້ອມດ້ວຍຄະນະສະເພາະກິດຂັ້ນແຂວງ, ຄະນະສະເພາະກິດເມືອງເລົ່າງາມ ແລະ ເມືອງສາລະວັນ ເຂົ້າຮ່ວມ.
ຂ່າວ-ພາບ: ວິໄລວອນ ສິດທິໄຊ