ມີເດຍລາວແຂວງໄຊສົມບູນ ໜ່ວຍພັກພະແນກຍຸຕິທໍາ ແຂວງໄຊສົມບູນ ຈັດກອງປະຊຸມ ສະຫລຸບຕີລາຄາ, ກວດກາ, ປະເມີນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂຶ້ນ ໃນຕອນເຊົ້້າຂອງວັນທີ 24 ພະຈິກ 2021 ນີ້ ທີ່ຫ້ອງປະຊຸມສານປະຊາຊົນ ແຂວງ ໂດຍການ ເປັນປະທານຂອງສະຫາຍ ນາງ ເພັດສະໄໝ ໂພໄຊຍະວົງ ຄະນະປະຈໍາພັກແຂວງ, ປະທານກວດກາພັກ-ລັດ ແຂວງ, ມີສະຫາຍ ອິນຕອງ ໂຄດປັນຍາ, ກໍາມະການພັກແຂວງ ເລຂາໜ່ວຍພັກພະແນກຍຸຕິທໍາ ແຂວງ, ມີຄະນະກຳມະການຮັບຜິດຊອບຊີ້ນຳ ການກໍ່ສ້າງໜ່ວຍພັກປອດໃສເຂັ້ມແຂງ, ໜັກແໜ້ນ ຂັ້ນແຂວງ ແລະ ສະມາຊິກພັກພາຍໃນໜ່ວຍເຂົ້າຮ່ວມ.

ໂອກາດນີ້ ສະຫາຍ ນາງ ເພັດສະໄໝ ໂພໄຊຍະວົງ,ສະຫາຍ ໄດ້ມີຄໍາເຫັນຊີ້ນໍາຕໍ່ກອງປະຊຸມ ຊຶ່ງສະຫາຍໄດ້ຮຽກຮ້ອງ ໃຫ້ຄະນະພັກ-ສະມາຊິກພັກທຸກສະຫາຍ ຈົ່ງພ້ອມກັນເຊີດຊູຄວາມຮັບຜິດຊອບສູງ ຂອງຕົນໃນການຄົ້ນຄວ້າ, ຕີລາຄາຕໍ່ການ ເຄື່ອນໄຫວວຽກງານຕ່າງໆໃນໄລຍະຜ່ານມາ, ບົນພື້ນຖານຫຼັກການລວມສູນປະຊາທິປະໄຕ, ເອົາໃຈໃສ່ຕໍານິຕິຊົມກໍສ້າງເຊິ່ງກັນ ແລະ ກັນ ໃນການປະກອບຄໍາຄິດ-ເຫັນ ດ້ວຍຄວາມຮັບຜິດຊອບສູງ ເພື່ອປັບປຸງ ແລະ ແກ້ໄຂຂໍ້ຄົງຄ້າງ ຂອງແຕ່ລະສະ ຫາຍສະມາຊິກພັກ ພ້ອມນັ້ນກະໃຫ້ຕີລາຄາໃສ່ບົດສະຫລຸບໃນການເຄື່ອນໄຫວວຽກງານໃນໄລຍະຜ່ານມາ ແລະ ທິດທາງ ແຜນການທີ່ຈະໄດ້ຈັດຕັ້ງປະຕິບັດໃນຕໍ່ໜ້າ ທັງນີ້ກໍເພື່ອຮັບປະກັນໃຫ້ກອງປະຊຸມໃນຄັ້ງນີ້ ດໍາເນີນ ໄປດ້ວຍຜົນສໍາເລັດ ແລະ ມີປະສິດທິພົນສູງ.

ຈາກນັ້ນ ສະມາຊິກພັກແຕ່ລະສະຫາຍ ໄດ້ຜັດປ່ຽນກັນຂຶ້ນຜ່ານໃບສໍາຫຼວດຕົນເອງ ໂດຍໃຫ້ໝູ່ ຄະນະຕີລາຄາ ຈຸດດີ, ຈຸດອ່ອນ ແລະ ລົງຄະແນນສຽງ ໃຫ້ແຕ່ລະສະຫາຍ ຕາມແຕ່ລະມາດຖານເງື່ອນໄຂ ໂດຍຕີລາຄາທາງດ້ານ ການເມືອງ, ດ້ານແນວຄິດ, ດ້ານການຈັດຕັ້ງ, ດ້ານແບບແຜນການນຳພາ ແລະ ດ້ານຄວາມຮັບຜິດຊອບ ໜ້າທີ່ການເມືອງ ພ້ອມທັງປະກອບຄຳຄິດ-ຄຳເຫັນໃຫ້ແຕ່ລະສະຫາຍ. ພ້ອມນັ້ນ ກອງປະຊຸມ ໄດ້ຮັບຟັງການຜ່ານບົດສະຫຼຸບ ຕີລາຄາກໍ່ສ້າງ ໜ່ວຍພັກປອດໃສ ເຂັ້ມແຂງ, ໜັກແໜ້ນ ປະຈໍາປີ 2021 ແລະ ທິດທາງແຜນການປີ 2022 ຈາກສະຫາຍ ລືຢ່າງ ຫວັງເຢັ້ງ, ຮອງເລຂາພັກແນກຍຸຕິທໍາ ແຂວງ.

ເຊິ່ງໃນໄລຍະຜ່ານມາ ຄະນະພັກໄດ້ເອົາໃຈໃສ່ ສຶກສາອົບຮົມການເມືອງ-ແນວຄິດ ເປັນຫຼັກ ໃນການເຊື່ອມຊືມແນວທາງນະໂຍບາຍ, ມະຕິ, ຄໍາສັ່ງ, ກົດລະບຽບຂອງພັກ ໃຫ້ສະມາຊິກພັກ ໄດ້ຮັບຮູ້ ແລະ ເຂົ້າໃຈ ຢ່າງເລິກເຊິ່ງ. ໃນນີ້ໜ່ວຍພັກມີສະມາຊິກພັກ ທັງໝົດ 14 ສະຫາຍ, ຍິງ 3 ສະຫາຍ, ສະມາຊິກພັກສໍາຮອງ 3 ສະຫາຍ, ຍິງ 1 ສະຫາຍ ຊຶ່ງແຕ່ລະສະຫາຍ ໄດ້ຢຶດໝັ້ນ ແລະ ປະຕິບັດຕາມ 5 ຫລັກການ 3 ທິດນຳ ໃນການກໍ່ສ້າງປັບປຸງຕົນເອງ ໂດຍຖືເອົາການຮ່ວມຊີວິດພັກເປັນກົດເກນພື້ນຖານ ເຮັດໃຫ້ສະມາຊິກພັກແຕ່ລະສະຫາຍ ມີສະຕິ ເຄົາລົບການຈັດຕັ້ງ, ມີຄວາມ ເຂັ້ມງວດຕໍ່ລະບຽບວິໄນ, ມີຄວາມສາມັກຄີເປັນເອກະພາບ ແລະ ເປັນແບບຢ່າງໃນຂະບວນການມະຫາຊົນ ຖືເອົາການກໍ່ສ້າງ ພັກດ້ວຍການຕຳນິຕິຊົມເຊິ່ງກັນ ແລະ ກັນ ທັ້ງນີ້ ກໍເພື່ອເປັນການກໍສ້າງຊ່ວຍເຫຼືອກັນ ເພື່ອພ້ອມ ກັນກ້າວໜ້າໃນການຈັດຕັ້ງ ປະຕິບັດໜ້າທີ່ການເມືອງຂອງພັກ ທີ່ຂັ້ນເທິງມອບໝາຍໃຫ້ ດ້ວຍຜົນສຳເລັດອັນໃໝ່ ພ້ອມທັງສູ້ຊົນສືບຕໍ່ສ້າງໜ່ວຍພັກ ໃຫ້ກາຍເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນຢ່າງສະເໝີຕົ້ນສະເໝີປາຍ. ນອກນີ້ ກອງປະຊຸມຍັງໄດ້ມີການປະເມີນ ສະມາຊິກພັກ ແລະ ໜ່ວຍພັກ ພ້ອມທັງສະຫຼຸບສັງລວມຄະແນນ ຂອງສະມາຊິກພັກ, ໜ່ວຍພັກ ເຂົ້າໃນບົດສະຫຼຸບຜົນການ ປະເມີນການກວດກາການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ປະຈຳປີ 2021 ແລະ ປັບປຸງແຜນການ ກໍສ້າງ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022 ໃຫ້ມີຄວາມສົມບູນທາງດ້ານເນື້ອໃນ ຢ່າງຄົບຖ້ວນ.
ພາບ-ຂ່າວ: ນາງຕູດ ຄໍາພໍໃຈ