ມີເດຍລາວແຂວງໄຊສົມບູນ
ກອງປະຊຸມ ເຊື່ອມຊຶມ 2 ວາລະແຫ່ງຊາດ ຂອງພະແນກອຸດສາຫະກຳ ແລະ ການຄ້າ ແຂວງໄຊສົມບູນ ໄດ້ຈັດຂຶ້ນໃນຕອນເຊົ້າຂອງວັນທີ 24 ພະຈິກ 2021 ນີ້ ທີ່ຫ້ອງປະຊຸມພະແນກຂອງຕົນ ໂດຍການເປັນປະທານ ຂອງທ່ານ ພາທໍ່ ຕົງເຢີທໍ່ ຮັກສາການຫົວໜ້າພະແນກອຸດສາຫະກຳ ແລະ ການຄ້າ ແຂວງ, ມີຫົວໜ້າຂະແໜງ-ຮອງຂະແໜງ ຕະຫຼອດຮອດພະນັກງານວິຊາການ ພາຍໃນພະແນກ ແລະ ຕາງໜ້າຈາກຄະນະໂຄສະນາອົບຮົມ ແຂວງ ເຂົ້າຮ່ວມ.

ໂອກາດກ່າວເປີດກອງປະຊຸມ ປະທານໄດ້ນຳເອົາເອກະສານ 2 ວາລະແຫ່ງຊາດມາເຜີຍແຜ່ໃຫ້ສະມາຊິກພັກ ແລະ ພະນັກງານຂອງຕົນໄດ້ຮັບຮູ້ຢ່າງທົ່ວເຖິງເລິກເຊິ່ງ ປະກອບມີຄຳສັ່ງ ເລກທີ 01/ກມສພ, ລົງວັນທີ 26 ກໍລະກົດ 2021 ວ່າດ້ວຍການເພີ່ມທະວີການນຳພາ-ຊີ້ນຳ ຂອງຄະນະພັກແຕ່ລະຂັ້ນ ໃນການຈັດຕັ້ງປະຕິບັດ ມາດຕະການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ ແລະ ຄຳສັ່ງ ເລກທີ 02/ກມສພ, ລົງວັນທີ 26 ກໍລະກົດ 2021 ວ່າດ້ວຍການເພີ່ມທະວີການນຳພາ-ຊີ້ນຳ ຂອງຄະນະພັກແຕ່ລະຂັ້ນ ໃນການຈັດຕັ້ງປະຕິບັດ ມາດຕະການແກ້ໄຂຄວາມຫຍຸ້ງຍາກ ດ້ານບັນຫາຢາເສບຕິດ.

ຊຶ່ງວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ ແມ່ນການແກ້ໄຂບັນຫາທີ່ສຳຄັນ, ຈຳເປັນ ແລະ ຮີບດ່ວນ ຂອງຊາດ ທີ່ໄດ້ສະສົມມາຫຼາຍປີ ໃຫ້ຜ່ອນຄາຍລົງ ໂດຍຖືເອົາການແກ້ໄຂບັນຫາດັ່ງກ່າວ ເປັນໜ້າທີ່, ພັນທະ ແລະ ຄວາມຮັບຜິດຊອບ ຂອງໝົດທຸກພາກສ່ວນໃນສັງຄົມ ຊຶ່ງການແກ້ໄຂບັນຫາດັ່ງກ່າວ ເປັນໜຶ່ງໃນບັນຫາໃຈກາງ ຂອງການຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XI ຂອງສູນກາງພັກ ແນໃສ່ສ້າງພື້ນຖານທີ່ເປັນຫົວຈັກແກ່ດຶງ ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ. ພ້ອມນີ້ ການແກ້ໄຂບັນຫາຢາເສບຕິດ ຊຶ່ງມະຕິກອງປະຊຸມໃຫຍ່ ຄັ້ງທີ XI ຂອງສູນກາງພັກ ໄດ້ກຳນົດອອກວ່າ: ຕ້ອງຍົກສູງລະດັບການສະກັດກັ້ນ ແລະ ແກ້ໄຂຜົນຮ້າຍ ຈາກບັນຫາຢາເສບຕິດ ໃຫ້ເປັນໜ້າທີ່ຕົ້ນຕໍ ທາງດ້ານສັງຄົມ ແລະ ເປັນສ່ວນໜຶ່ງ ຂອງວາລະແຫ່ງຊາດ ທີ່ຕ້ອງປຸກລະດົມການເຂົ້າຮ່ວມຂອງທົ່ວສັງຄົມ ໃຫ້ແຂງແຮງ ແລະ ຕໍ່ເນື່ອງ ເພື່ອແກ້ໄຂບັນຫາດັ່ງກ່າວ ໃຫຫຼຸດໜ້ອຍຖອຍລົງ ແລະ ກ້າວໄປເຖິງການກຳຈັດໃຫ້ໝົດສິ້ນໄປເປັນກ້າວໆ. ຊຶ່ງກອງປະຊຸມ ຄັ້ງນີ້ ມີຈຸດປະສົງເພື່ອໃຫ້ພະນັກງານ-ສະມາຊິກພັກ ຕະຫຼອດຮອດພະນັກງານວິຊາການ ຂອງພະແນກອຸດສາຫະກຳ ແລະ ການຄ້າ ແຂວງ ໄດ້ກຳແໜ້ນ-ເຊື່ອມຊຶມ 2 ວາລະ ດັ່ງກ່າວ ໃຫ້ເລິກເຊິ່ງ ພ້ອມທັງຫັນເປັນແຜນງານ ແລະ ໂຄງການອັນລະອຽດ ເຂົ້າໃນການເຄື່ອນໄຫວວຽກງານວິຊາສະເພາະ ຂອງຕົນ ໃຫ້ມີອັນຫັນປ່ຽນຢ່າງຕັ້ງໜ້າ, ມີຄວາມຮັດກຸມ ແລະ ມີປະສິດທິພາບ ໃນການຈັດຕັ້ງປະຕິບັດຕົວຈິງ.

ບກ: ຂ່າວ: ສີລິພອນ ສົງຄຳ