ມີເດຍລາວແຂວງໄຊສົມບູນ
ກອງປະຊຸມເຜີຍແຜ່ມະຕິ ເລກທີ 03/ຄບສພ, ຄຳສັ່ງເລກທີ 190 ຂອງສູນກາງພັກປະຊາຊົນປະຕິວັດລາວ ແລະ ກົດໝາຍວ່າດ້ວຍລັດຖະກອນ ຂອງພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງໄຊສົມບູນ ໄດ້ຈັດຂຶ້ນໃນຕອນເຊົ້າ ຂອງວັນທີ 25 ພະຈິກ 2021 ນີ້ ໂດຍການເປັນປະທານຂອງທ່ານ ທົງສະຫວັນ ໂພສະລາດ, ຮັກສາການຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ມີຮອງພະແນກ, ຫົວໜ້າ-ຮອງຫົວໜ້າຂະແໜງ ຕະຫຼອດຮອດພະນັກງານພາຍໃນພະແນກເຂົ້າຮ່ວມ.

ກອງປະຊຸມໃນຄັ້ງນີ້ໄດ້ເຜີຍແຜ່ ແລະ ເຊື່ອມຊຶມ ເອກະສານສຳຄັນ 3 ສະບັບ ຈາກຄະນະພັກ-ຄະນະພະແນກ ເຊິ່ງໃນນັ້ນ ທ່ານ ກິ່ງເພັດ ເພັດມະຈັນ ຮອງຫົວໜ້າພະແນກ, ຜູ້ຊິ້ນຳວຽກງານວັດທະນະທຳ ໄດ້ຂຶ້ນຜ່ານກົດໝາຍວ່າດ້ວຍລັດຖະກອນ, ສະບັບເລກທີ 74/ສພຊ, ລົງວັນທີ 18 ທັນວາ 2015 ຈາກນັ້ນ. ທ່ານ ສົມດາວີ ຄຳເມືອງຄູນ ຮອງຫົວໜ້າພະແນກ ກໍໄດ້ຂຶ້ນຜ່ານມະຕິ ຂອງກົມການເມືອງສູນກາງພັກສະບັບເລກທີ 03/ຄບສພ, ລົງວັນທີ 30 ກັນຍາ 2021 ວ່າດ້ວຍການເພີ່ມທະວີການນຳພາຂອງພັກ ເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິ່ງດ້ານວຽກງານພະນັກງານ, ພ້ອມດຽວກັນນັ້ນ ທ່ານ ທົງສະຫວັນ ໂພສະລາດ ຮັກສາການຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ຂຶ້ນຜ່ານຄຳສັ່ງ ຂອງຄະນະບໍລິຫານງານພັກ ວ່າດ້ວຍການປັບປຸງກົງຈັກການຈັດຕັ້ງຂອງບັນດາກະຊວງ ແລະ ທ້ອງຖິ່ນ. ສະບັບເລກທີ 190/ຄລສພ, ລົງວັນທີ 29 ກັນຍາ 2021.

ທັງນີ້ກໍເພື່ອເຮັດໃຫ້ພະນັກງານ ພາຍໃນພະແນກເຊື່ອມຊຶມຕໍ່ແນວທາງຂອງພັກ, ນະໂຍບາຍຂອງລັດ ແລະ ພ້ອມກັນຈັດຕັ້ງປະຕິບັດມະຕິ, ຄຳສັ່ງ ແລະ ກົດໝາຍຂອງລັດຢ່າງເຂັ້ມງວດ ເພື່ອແນ່ໃສ່ຮັບປະກັນດ້ານການຊີ້ນຳ-ນຳພາ, ຄຸ້ມຄອງ, ບໍລິຫານວຽກງານຕ່າງໆໃຫ້ມີຜົນສັກສິດ, ເຂັ້ມງວດ, ຍຸຕິທຳ ແລະ ສະເໝີພາບ. ເພື່ອພ້ອມກັນປະຕິບັດວຽກງານໃຫ້ສອດຄ່ອງກັບລະບຽບກົດໝາຍ ແລະ ມີປະສິດທິຜົນສູງຂຶ້ນ.
ບກ ຂ່າວ: ນາງ ແກ່ນຈັນ ທຳມະນີ
ວັນທີ 25 ພະຈິກ 2021