ມີເດຍລາວແຂວງໄຊສົມບູນ ທ່ານ ພອຍຄໍາ ຮຸ່ງບຸນຍວງ, ຮອງເລຂາພັກແຂວງ ພ້ອມດ້ວຍຄະນະກຳມະການແນວລາວສ້າງຊາດ ແຂວງໄຊສົມບູນ ເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງແນວລາວສ້າງຊາດ ຜ່ານວີດີໂອທາງໄກ ທີ່ໄດ້ໄຂຂຶ້ນໃນຕອນເຊົ້າຂອງວັນທີ 25 ພະຈິກ 2021 ນີ້ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ. ພາຍໃຕ້ການນໍາພາຄະນະປະທານໂດຍທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ພ້ອມດ້ວຍຮອງປະທານປະເທດ ແລະ ຜູ້ແທນແນວລາວສ້າງຊາດ ທົ່ວປະເທດ ເຂົ້າຮ່ວມ.

ຊຶ່ງກອງປະຊຸມໃນຄັ້ງນີ້ ຜູ້ເຂົ້າຮ່ວມຈະໄດ້ ຄົ້ນຄວ້າ, ປະກອບຄໍາຄິດຄໍາເຫັນ ຕົກລົງບັນຫາຕ່າງໆ ໂດຍສະເພາະແມ່ນ ການຍົກສູງຂະບວນການແຂ່ງຂັນຮັກຊາດ ແລະ ພັດທະນາ ຕິດພັນກັບຂະບວນການສ້າງຄອບຄົວ ແລະ ບ້ານສາມັກຄີ, ການປຸກ ລະດົມມວນຊົນເຂົ້າຮ່ວມປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ບັນຫາແນວລາວສ້າງຊາດປະກອບ ສ່ວນໃນການໄກ່ເກ່ຍຂໍ້ຂັດແຍ້ງ ກ່ຽວກັບບັນຫາທີ່ດິນຈາກໂຄງການພັດທະນາ, ຄຸນຄ່າຂອງວັດທະນະທໍາອັນດີງາມຂອງຊາດ ແລະ ບົດຮຽນໃນການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກ ຢູ່ເມືອງລ້ອງຊານ ແຂວງໄຊສົມບູນ.

ໂດຍຈຸດປະສົງ ກໍເພື່ອພ້ອມກັນທົບທວນຄືນຜົນຂອງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງແນວລາວສ້າງຊາດ ໃນໄລຍະ 5 ປີຜ່ານມາ, ພ້ອມທັງກຳນົດຄາດໝາຍລວມ, ເນື້ອໃນການຫັນປ່ຽນ ແລະ ແຜນວຽກຈຸດສຸມ 5 ປີຕໍ່ໜ້າ ແລະ ຄົ້ນຄ້ວາ ຮັບຮອງເອົາຮ່າງລາຍງານການເມືອງ ພາຍໃຕ້ຄໍາຂັວນທີ່ວ່າ “ເສີມຂະຫຍາຍມູນເຊື້ອອັນດີງານຂອງແນວລາວສ້າງຊາດ, ເພີ່ມທະວີຄວາມສາມັກຄີເປັນປຶກແຜ່ນຂອງປວງຊົນລາວທັງຊາດ, ເຕົ້າໂຮມກຳລັງແຮງຂອງປະ ຊາຊົນທຸກຊັ້ນຄົນ, ປະກອບສ່ວນຢ່າງແຂງແຮງເຂົ້າໃນພາລະກິດປົກປົກຮັກສາ-ສ້າງສາປະເທດຊາດ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ໃຫ້ບັນລຸຜົນເປັນຈິງ”.

ນອກນີ້ ກອງປະຊຸມ ຈະໄດ້ພິຈາລະນາຮັບຮອງເອົາແຜນພັດທະນາອົງການແນວລາວສ້າງຊາດ 5 ປີ (2021-2025), ພິຈາລະນາຮັບຮອງກົດລະບຽບແນວລາວສ້າງຊາດ ສະໄໝທີ XI ສະບັບປັບປຸງໃໝ່ ແລະ ຮັບຟັງການຜ່ານບົດສໍາຫຼວດການນໍາພາລວມຂອງຄະນະກຳມະການສູນກາງແນວລາວສ້າງຊາດ ສະໄໝທີ X, ທັງຮັບຮອງເອົາໂຄງປະກອບບຸກຄະລາກອນຄະນະກຳມະການສູນກາງແນວລາວສ້າງຊາດ (ຜູ້ປະຈໍາການ ແລະ ບໍ່ປະຈໍາການ) ສະໄໝທີ XI. ໂດຍກອງປະຊຸມ ແມ່ນຈະໄດ້ດໍາເນີນເປັນເວລາ 2 ວັນຈື່ງສໍາເລັດ.

ບ. ຂ່າວ: ພາພອນ ນະວົງໄຊ