ມີເດຍລາວແຂວງຄຳມ່ວນ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງແນວລາວສ້າງຊາດ ໄຂຂຶ້ນໃນວັນທີ 25 ພະຈິກ 2021 ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ, ກອງປະຊຸມໄດ້ເປັນກຽດຕ້ອນຮັບການເຂົ້າຮ່ວມຂອງທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ. ມີການນຳພັກ-ລັດ, ພະນັກງານອາວຸໂສ ບຳນານ, ຜູ້ຊົງຄຸນວຸດທິ ພ້ອມດ້ວຍຜູ້ແທນ ແລະ ແຂກຖືກເຊີນທົ່ວປະເທດ ທັງໝົດ 581 ທ່ານ. ສຳລັບແຂວງຄຳມ່ວນ ເຂົ້່າຮ່ວມກອງປະຊຸມໃນຮູບແບບ ທາງໄກ ເນື່ອງຈາກສະພາບການແຜ່ລະບາດຂອງພະຍາດ ໂຄວິດ-19 ໂດຍມີທ່ານ ວົງເພັດ ຈິດປັນຍາ ຮອງເລຂາພັກແຂວງ ພ້ອມດ້ວຍກຳມະການສູນກາງແນວລາວສ້າງຊາດ ທີ່ປະຈຳຢູ່ແຂວງ, ກໍາມະການແນວລາວ ສ້າງຊາດແຂວງ ຢູ່ທີ່ຫ້ອງປະຊຸມ ສະໂມສອນ ຫຼັກ 4 ແຂວງຄຳມ່ວນ.

ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ໄດ້ມີຄຳເຫັນໃນໂອກາດເປີດກອງປະຊຸມດັ່ງກ່າວ: ເພື່ອກະກຽມໃຫ້ແກ່ກອງປະຊຸມ ຄະນະກຳມະການສູນກາງ ແນວລາວສ້າງຊາດ ໄດ້ກະກຽມທາງດ້ານເນື້ອໃນ, ບຸກຄະລາກອນ ແລະ ສ້າງຂະບວນການຕ່າງໆ ເຊິ່ງໄດ້ສຳເລັດ ການດຳເນີນກອງປະຊຸມໃຫຍ່ແນວລາວສ້າງຊາດແຂວງ ຕິດພັນກັບການຄົ້ນຄວ້າປະກອບຄຳເຫັນໃສ່ຮ່າງລາຍງານ ການເມືອງ, ຮ່າງແຜນພັດທະນາ ແລະ ຮ່າງກົດລະບຽບຂອງແນວລາວສ້າງຊາດ, ໄດ້ປະສານສົມທົບກັບອົງການ ທີ່ກ່ຽວຂ້ອງ ເພື່ອປຸກລະດົມປະຊາຊົນບັນດາເຜົ່າປະກອບສ່ວນໃນການຈັດຕັ້ງປະຕິບັດຂະບວນການຮັກຊາດ ແລະ ພັດທະນາ ຕິດພັນກັບການຊຸກຍູ້ການຜະລິດ ສ້າງລາຍຮັບເພື່ອແກ້ໄຂຄວາມທຸກຍາກ, ປຸກລະດົມທົ່ວສັງຄົມ ທັງພາຍໃນ ແລະ ຕ່າງປະເທດ ໃຫ້ການຊ່ວຍເຫຼືອຕ້ານພະຍາດໂຄວິດ-19, ຕ້ານໄພນໍ້າຖ້ວມ, ໄພແຫ້ງແລ້ງ, ໄພໜາວ ແລະ ອື່ນໆ.

ອັນທີ່ພົ້ນເດັ່ນແມ່ນໄດ້ສ້າງຂະບວນແຂ່ງຂັນ ສ້າງຄອບຄົວ ແລະ ບ້ານສາມັກຄີປອງດອງ ແລະ ເມືອງສາມັກຄີປອງດອງ ຕິດພັນກັບການແກ້ໄຂຄວາມຫຍຸ້ງຍາກຂອງປະຊາຊົນບັນດາເຜົ່າ ເຊິ່ງເຮັດໃຫ້ມີບັນຍາກາດ ແລະ ໃບໜ້າໃໝ່ ໃນການປະຕິບັດວຽກງານແນວໂຮມຢູ່ຂັ້ນຮາກຖານ, ພ້ອມນັ້ນກໍ່ໄດ້ປຸກລະດົມຈັດຕັ້ງ ການສະເຫຼີມສະຫຼອງວັນສຳຄັນຕ່າງໆຂອງພັກ, ຂອງຊາດ. ກອງປະຊຸມໃຫຍ່ຜູ້ແທນແນວລາວສ້າງຊາດຄັ້ງນີ້ ແມ່ນ ຈະໄດ້ທົບທວນຄືນຜົນຂອງການຈັດຕັ້ງປະຕິບັດມະຕິກອງປະຊຸມໃຫຍ່ຕະຫຼອດໄລຍະ 05 ປີຜ່ານມາໄດ້ ມີຈຸດດີ, ຈຸດອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ພ້ອມດຽວກັນນັ້ນກໍ່ຈະໄດ້ກຳນົດ ຄາດໝາຍລວມ, ເນື້ອໃນການຫັນປ່ຽນ ແລະ ແຜນວຽກຈຸດສຸມ ທີ່ຈະປະຕິບັດໃນອີກ 05 ປີຕໍ່ໜ້າ ພ້ອມທັງຄົ້ນຄວ້າ ແລະ ຮັບຮອງເອົາລາຍງານການເມືອງ ພາຍໃຕ້ຫົວຂໍ້ “ເສີມຂະຫຍາຍມູນເຊື້ອອັນດີງາມຂອງແນວລາວສ້າງຊາດ, ເພີ່ມທະວີຄວາມສາມັກຄີເປັນປຶກແຜ່ນຂອງປວງຊົນລາວທັງຊາດ, ເຕົ້າໂຮມກຳລັງແຮງຂອງປະຊາຊົນທຸກຊັ້ນຄົນ, ປະກອບສ່ວນຢ່າງແຂງແຮງເຂົ້າໃນພາລະກິດປົກປັກຮັກສາ-ສ້າງສາປະເທດຊາດ ແລະ ຈັດຕັ້ງປະຕິບັດມະຕິ ກອງປະຊຸມໃຫຍ່ ຄັ້ງທີ XI ຂອງພັກ ໃຫ້ບັນລຸຜົນເປັນຈິງ”.

ກອງປະຊຸມຍັງຈະໄດ້ພິຈາລະນາ ແລະ ຮັບຮອງເອົາ ແຜນພັດທະນາອົງການແນວລາວສ້າງຊາດ 05 ປີ (2021-2025), ກົດລະບຽບແນວລາວສ້າງຊາດ ສະໄໝທີ XI ສະບັບປັບປຸງໃໝ່, ຜ່ານບົດສຳຫຼວດການນຳພາລວມຂອງຄະນະກຳມະການແນວລາວສ້າງຊາດ ສະໄໝທີ X ແລະ ຮັບຮອງເອົາໂຄງປະກອບບຸກຄະລາກອນ ຄະນະກຳມະການສູນກາງແນວລາວສ້າງຊາດ ທັງຜູ້ປະຈຳການ ແລະ ບໍປະຈຳການ ສະໄໝທີ XI ພ້ອມນີ້ ກໍ່ຍັງຈະໄດ້ຮັບຟັງການໂອ້ລົມຊີ້ນໍາຂອງທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ເພື່ອເປັນເຂັມຊີ້ທິດເຍືອງທາງ ໃຫ້ແກ່ຄະນະກຳມະການສູນກາງແນວລາວສ້າງຊາດ ໃນການເສີມຂະຫຍາຍບົດບາດ ແລະ ສ້າງການຫັນປ່ຽນໃໝ່ ກ້າວຂຶ້ນຢ່າງບໍ່ຢຸດຢັ້ງ.