ມີເດຍລາວແຂວງເຊກອງ ກອງປຶກສາຫາລືກ່ຽວກັບການຄຸ້ມຄອງການເກັບຊື້, ການເຄື່ອນຍ້າຍ ແລະ ການສົ່ງອອກມັນຕົ້ນ ລະຫວ່າງພາກລັດ ແລະຫົວໜ່ວຍທຸລະກິດຜູ້ປະກອບການເກັບຊື້ມັນຕົ້ນ ໄດ້ຈັດຂຶ້ນໃນວັນທີ 25 ພະຈິກ 2021 ທີ່ພະແນກອຸດສາຫະກໍາ ແລະການຄ້າແຂວງ ໂດຍການເປັນປະທານຂອງທ່ານ ດາວວີ ສວຍທະລັງສີ ຫົວໜ້າພະແນກອຸດສາຫະກໍາ ແລະການຄ້າແຂວງເຊກອງ, ມີການນໍາເມືອງລະມາມ, ບັນດາພະແນກ, ຫ້ອງການ, ວິຊາການກ່ຽວ ຂ້ອງຂັ້ນແຂວງ, ເມືອງລະມາມ ແລະເມືອງທ່າແຕງເຂົ້າຮ່ວມ.

ໃນວາລະກອງປະຊຸມ ໄດ້ຜ່ານຂໍ້ຕົກລົງຂອງທ່ານເຈົ້າແຂວງເຊກອງ ສະບັບເລກທີ 64/ຈຂຊກ, ລົງວັນທີ 19 ພະຈິກ 2021 ວ່າດ້ວຍການອະນຸຍາດສ້າງຕັ້ງລານເກັບຊື້ມັນຕົ້ນໃນທົ່ວແຂວງປະກອບມີ 11 ຫົວໜ່ວຍຄື: ເມືອງລະມາມ 4 ຫົວໜ່ວຍ, ທ່າແຕງ 5 ຫົວໜ່ວຍ, ກະລຶມ 1 ຫົວໜ່ວຍ ແລະເມືອງດາກຈຶງ 1 ຫົວໜ່ວຍ; ຜ່ານບົດບັນທຶກກອງປະຊຸມປຶກສາຫາລື ກ່ຽວກັບການກໍານົດລາຄາຄໍ້າປະກັນ ແລະການຄຸ້ມຄອງການເກັບຊື້ມັນຕົ້ນ; ຜ່ານບົດບັນທຶກກອງປະຊຸມປຶກສາຫາລືກ່ຽວກັບການອະນຸຍາດສ້າງຕັ້ງລານມັນເກັບຊື້ມັນຕົ້ນ; ຜ່ານຮ່າງລະບຽບການຄຸ້ມຄອງການເກັບຊື້, ການເຄື່ອນຍ້າຍ ແລະການສົ່ງອອກມັນຕົ້ນ ແລະຮັບຟັງການປະກອບຄໍາຄິດຄໍາເຫັນຂອງບັນດາພະແນກ, ຫ້ອງການຫົວໜ່ວຍທຸລະກິດ-ຜູປະກອບການເກັບຊື້ມັນຕົ້ນ, ທັງນີ້ ກໍເພື່ອແນໃສ່ສ້າງຄວາມເປັນເອກະພາບ, ຍູ້ແຮງຂະບວນການຜະລິດຂອງປະຊາຊົນໃຫ້ນັບມື້ຫຼາຍຂຶ້ນ, ທັງເປັນການຊຸກຍູ້ຫົວໜ່ວຍທຸລະກິດ ກໍຄືຜູ້ປະກອບການເກັບຊື້ມັນຕົ້ນເຄື່ອນໄຫວຖືກຕ້ອງຕາມລະບຽບກົດໝາຍ.

ໃນໂອກາດນີ້ ທ່ານ ດາວວີ ສວຍທະລັງສີ ໄດ້ມີຄໍາເຫັນຊີ້ນໍາ ໂດຍຮຽກຮ້ອງມາຍັງຂະແໜງການກ່ຽວຂ້ອງຂັ້ນແຂວງ-ເມືອງ ສືບຕໍ່ປະສານສົມທົບປຶກສາຫາລື ແລະເອົາໃຈໃສ່ຄຸ້ມຄອງລານເກັບຊື້ມັນຕົ້ນ, ການເຄື່ອນຍ້າຍ ແລະການສົ່ງອອກມັນຕົ້ນໃຫ້ຖືກຕ້ອງຕາມລະບຽບກົດໝາຍ; ບັນດາຫົວໜ່ວຍທຸລະກິດ-ຜູ້ປະກອບການເກັບຊື້ມັນຕົ້ນຈົ່ງໃຫ້ ການຮ່ວມໄມ້ຮ່ວມມືປະຕິບັດລະບຽບຫຼັກການ ແລະນິຕິກໍາຕ່າງໆທີ່ພັກ-ລັດຖະບານ ກໍຄືແຂວງວາງອອກຢ່າງເຂັ້ມງວດ; ແຈ້ງລາຄາຄໍ້າປະກັນທີ່ກໍານົດໄວ້ໃຫ້ບ້ານ ກໍຄືປະຊາຊົນຜູ້ຜະລິດຮັບຮູ້ ເພື່ອຮັບປະກັນດ້ານລາຄາ, ຮັກສາຜົນປະໂຫຍດໃຫ້ປະຊາຊົນ, ທັງໝົດນີ້ ກໍເພື່ອເປັນການຊຸກຍູ້ສົ່ງເສີມຂະບວນການຜະລິດເປັນສິນຄ້າຂອງປະຊາຊົນໃຫ້ນັບມື້ຂະ ຫຍາຍຕົວ, ຄຽງຄູ່ກັບການຄຸ້ມຄອງການເຄື່ອນໄຫວຂອງຫົວໜ່ວຍທຸລະກິດໃຫ້ຖືກຕ້ອງຕາມລະບຽບກົດໝາຍ ແລະນິຕິກໍາຕ່າງໆທີ່ພັກ-ລັດຖະບານວາງອອກ.

(ຂ່າວ-ພາບ: ສັນຍາ)