ມີເດຍລາວແຂວງໄຊສົມບູນ
ກອງປະຊຸມ ເຜີຍແຜ່ເອກະສານວາລະແຫ່ງຊາດ ທີ່ຕິິດພັນກັບຂະແໜງການເງິນ ຢູ່ແຂວງໄຊສົມບູນ ໄດ້ຈັດຂຶ້ນໃນຕອນເຊົ້າ ຂອງວັນທີ 26 ພະຈິກ 2021 ນີ້ ທີ່ສະໂມສອນເມືອງອະນຸວົງ ໂດຍການເປັນປະທານຮ່ວມຂອງທ່ານ ບຸນປອນ ວັນນະຈິດ, ຮອງລັດຖະມົນຕີກະຊວງການເງິນ ແລະ ທ່ານ ສຸກສະຫວາດ ວົງພູມເຫຼັກ, ຮອງເຈົ້າແຂວງໄຊສົມບູນ, ມີຕາງໜ້າຈາກບັນດາກົມທີ່ກ່ຽວຂ້ອງ-ກະຊວງການເງິນ ພ້ອມດ້ວຍພະແນກການ, ອົງການ, ກົມກອງ ອ້ອມຂ້າງແຂວງ ຕະຫຼອດຮອດພະນັກງານວິຊາການ ພາຍໃນພະແນກການເງິນ ເຂົ້າຮ່ວມ.

ໂອກາດດັ່ງກ່າວ ທ່ານ ບຸນປອນ ວັນນະຈິດ, ຮອງລັດຖະມົນຕີກະຊວງການເງິນ ໄດ້ມີຄຳເຫັນຕໍ່ກອງປະຊຸມ ຊຶ່ງທ່ານໄດ້ຍົກໃຫ້ເຫັນເຖິງຄວາມໝາຍ-ຄວາມສຳຄັນ ຂອງວາລະແຫ່ງຊາດ ທີ່ຕິດພັນກັບຂະແໜງການເງິນ ຊຶ່ງເປັນວຽກງານທີ່ເຄັ່ງຮ້ອນ ແລະ ຮີບດ່ວນ ໃນການຈັດຕັ້ງຜັນຂະຫຍາຍ ມະຕິກອງປະຊຸມສະພາແຫ່ງຊາດ ກ່ຽວກັບການຮັບຮອງເອົາທິດທາງແຜນງົບປະມານ ແຫ່ງລັດ 5 ປີ 2021-2025 ແລະ ປະຕິບັດຕາມວາລະແຫ່ງຊາດ ໃນການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ ເພື່ອສ້າງຄວາມເປັນເອກະພາບລະດັບສູງ ໃນການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼ ຂອງລາຍຮັບງົບປະມານແຫ່ງລັດ ຢູ່ໃນຄວາມຮັບຜິດຊອບຂອງບັນດາກະຊວງ, ອົງການລັດທຽບເທົ່າກະຊວງ, ນະຄອນຫຼວງວຽງຈັນ ແລະ ບັນດາແຂວງ, ບັນດາຂະແໜງການຂັ້ນສູນກາງ ແລະ ທ້ອງຖິ່ນ ເວົ້າສະເພາະ ກໍຄືແຂວງໄຊສົມບູນ ທີ່ຈະຕ້ອງໄດ້ຈັດຕັ້ງປະຕິບັດວາລະ ດັ່ງກ່າວ ໃຫ້ມີຄວາມຮັດກຸມ ແລະ ມີປະສິດທິພາບ.

ທັງນີ້ ກໍເພື່ອຮັບປະກັນການຄຸ້ມຄອງລາຍຮັບ ຕາມຖານລາຍຮັບທີ່ມີໃນປັດຈຸບັນ ແລະ ທຸກທ່າແຮງບົ່ມຊ້ອນ ໃຫ້ຖືກຕ້ອງ, ຄົບຖ້ວນ ແລະ ເພີ່ມຂຶ້ນ ເພື່ອອັດຊ່ອງວ່າງທີ່ຮົ່ວໄຫຼ ຈາກການສວຍໃຊ້ໜ້າທີ່ ຂອງເຈົ້າໜ້າທີ່ໃນແຕ່ລະຂັ້ນ, ທຸກລະດັບ ຕະຫຼອດຮອດບຸກຄົນ, ນິຕິບຸກຄົນ ແລະ ການຈັດຕັ້ງ ເພື່ອຮັບປະກັນບໍ່ໃຫ້ສາມາດຫຼົບຫຼີກ, ເຊື່ອງອຳພັນທະ ຕໍ່ງົບປະມານແຫ່ງລັດ ຢ່າງຂາດຕົວ, ໃນກໍລະນີການຈັດຕັ້ງໃດໜຶ່ງ ຫາກຕົກລົງ ຫຼື ສ້າງລະບຽບການຈັດເກັບລາຍຮັບ ທີ່ບໍ່ສອດຄ່ອງກັບກົດໝາຍ ກໍມີສິດໃນການສະເໜີລົບລ້າງ ແລະ ຢຸດເຊົາ ໂດຍທັນທີ ທັງໝົດນັ້ນ ກໍເພື່ອເລັ່ງທວງໃຫ້ຂະແໜງການເງິນ ແລະ ພາກສ່ວນອື່ນໆ ທີ່ຕິດພັນກັບວຽກງານ ດັ່ງກ່າວ ໄດ້ເປັນເຈົ້າການສູງໃນການຈັດຕັ້ງປະຕິບັດ ຢ່າງເຂັ້ມງວດ ເພື່ອເຮັດໃຫ້ວາລະແຫ່ງຊາດ ໃນຂົງເຂດຂະແໜງການເງິນ ໄດ້ຫັນເຂົ້າສູ່ວຽກງານຕົວຈິງ ຢ່າງເປັນຮູບປະທຳ.

ບກ………. ຂ່າວ: ຈິນລະວອນ ວໍລະສົມບູນ