ມີເດຍລາວແຂວງໄຊສົມບູນ
ກອງປະຊຸມ ຄົບຄະນະບໍລິຫານງານພັກ ແຂວງໄຊສົມບູນ ເປີດກວ້າງ ຄັ້ງທີ 6 ສະໄໝທີ I ໄດ້ສຳເລັດລົງໃນວັນທີ 31 ທັນວາ 2021 ນີ້ ພາຍຫຼັງທີ່ໄດ້ດຳເນີນມາເປັນເວລາ 3 ວັນ ທີ່ຫ້ອງປະຊຸມຫ້ອງວ່າການ ແຂວງ ໂດຍການເປັນປະທານ ຂອງສະຫາຍ ພົຕ ຄຳລຽງ ອຸທະໄກສອນ, ກຳມະການສູນກາງພັກ, ເລຂາພັກແຂວງ, ເຈົ້າແຂວງໄຊສົມບູນ, ມີຄະນະປະຈຳພັກແຂວງ, ກຳມະການພັກແຂວງ, ປະທານສະພາປະຊາຊົນແຂວງ ພ້ອມດ້ວຍພະແນກການ, ອົງການ-ກົມກອງ ອ້ອມຂ້າງແຂວງ ເຂົ້າຮ່ວມ.

ຕະຫຼອດໄລຍະການດຳເນີນກອງປະຊຸມ ຜູ້ເຂົ້າຮ່ວມ ໄດ້ສຸມທຸກເຫື່ອແຮງ ແລະ ສະຕິປັນຍາຂອງຕົນ ເຂົ້າໃນການປະກອບຄຳຄິດ-ຄຳເຫັນ ດ້ວຍບັນຍາກາດຄຶກຂຶມ ບົນພື້ນຖານຄວາມເປັນເອກະພາບ ຊຶ່ງກອງປະຊຸມ ໄດ້ມີການປຶກສາຫາລື ແລະ ຄົ້ນຄວ້າຫຼາຍບັນຫາ ໂດຍສະເພາະ ແມ່ນການວາງທິດທາງແຜນການນຳພາ ຂອງຄະນະບໍລິຫານງານພັກແຂວງ ປະຈຳປີ 2022 ໃຫ້ໄດ້ຮັບການຈັດຕັ້ງປະຕິບັດ ຢ່າງມີປະສິດທິພາບ ໃນນີ້ ແມ່ນສືບຕໍ່ສຶກສາອົບຮົມການເມືອງ-ແນວຄິດ ໃຫ້ຖັນແຖວພະນັກງານສະມາຊິກພັກ, ພະນັກງານ-ລັດຖະກອນ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ ໃຫ້ເລິກເຊິ່ງ-ເຖິງຖອງ ຂຶ້ນກວ່າເກົ່າ ໂດຍສອດຫ້ອຍກັບວຽກງານປ້ອງກັນຊາດ-ປ້ອງກັນຄວາມສະຫງົບ ຮັບປະກັນໃຫ້ແຂວງໄຊສົມບູນ ມີຄວາມສະຫງົບປອດໄພ ຢ່າງໜັກແໜ້ນ

ພ້ອມທັງສຸມໃສ່ນຳພາ-ຊີ້ນຳ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບດຳລັດ 414/ລບ ໃຫ້ບັນລຸຕາມແຜນການທີ່ວາງໄວ້ ໂດຍສູ້ຊົນໃຫ້ເສດຖະກິດມະຫາພາກຂະຫຍາຍຕົວ ຢ່າງຕໍ່ເນື່ອງ ອັດຕາການເຕີບໂຕບໍ່ຫຼຸດ 7 %, ລວມຍອດຜະລິດຕະພັນພາຍໃນ ຫຼື GDP ໃຫ້ບັນລຸ 1.440,23 ຕື້ກີບ ສະເລ່ຍເທົ່າກັບ 14,25 ລ້ານກີບ ຕໍ່ຄົນຕໍ່ປີ, ສູ້ຊົນຈັດເກັບລາຍຮັບເຂົ້າງົບປະມານ ໃຫ້ໄດ້ 557,97 ຕື້ກີບ, ທຽບໃສ່ແຜນປີ 2021 ເພີ່ມຂຶ້ນ 26,38 % ແລະ ຄາດຄະເນແຜນລາຍຈ່າຍງົບປະມານ ປະຈຳປີ 2022 ຈຳນວນທັງໝົດ 198,74 ຕື້ກີບ, ສືບຕໍ່ຊີ້ນຳການຄຸ້ມຄອງ, ຕິດຕາມ-ຊຸກຍູ້ ບັນດາໂຄງການລົງທຶນຂອງລັດ, ການລົງທຶນຂອງເອກະຊົນ ທັງພາຍໃນ ແລະ ຕ່າງປະເທດ ໃຫ້ດຳເນີນໄປຢ່າງຖືກຕ້ອງ ພ້ອມທັງສູ້ຊົນແກ້ໄຂຄອບຄົວທຸກຍາກ ໃຫ້ໄດ້ 730 ຄອບຄົວ ໄປພ້ອມກັບການສ້າງຄວາມເຂັ້ມແຂງ ໃຫ້ແກ່ລະບົບການບໍລິຫານ ແລະ ຄຸ້ມຄອງການສຶກສາ ແຕ່ຂັ້ນແຂວງ ລົງຮອດຂັ້ນບ້ານ ໃຫ້ມີປະສິດທິພາບ, ສູ້ຊົນສ້າງບ້ານແບບຢ່າງດ້ານສາທາລະນະສຸກ ໃຫ້ໄດ້ 7 ບ້ານ, ຊຸກຍູ້ການສັກວັກຊິນ ໃຫ້ກຸ່ມເປົ້າໝາຍອາຍຸ 6 ປີ ຂຶ້ນໄປ ໃຫ້ໄດ້ຫຼາຍກວ່າ 80 %, ສ້າງບ້ານວັດທະນະທຳໃຫ້ໄດ້ 4 ບ້ານ ແລະ ຄອບຄົວວັດທະນະທຳໃຫ້ໄດ້ 723 ຄອບຄົວ ພ້ອມທັງດຶງດູດນັກທ່ອງທ່ຽວ ໃຫ້ເຂົ້າມາທ່ຽວ ແຂວງໄຊສົມບູນ ໃຫ້ໄດ້ 19.120 ຄົນ ແລະ ພັດທະນາສີມືແຮງງານໃຫ້ໄດ້ 850 ຄົນ. ນອກນີ້ ຍັງຈະໄດ້ສູ້ຊົນໃຫ້ໜ່ວຍພັກທົ່ວແຂວງ ໄດ້ຮັບຮອງເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ກວມອັດຕາສ່ວນ 70 % ຂອງຈຳນວນໜ່ວຍພັກທັງໝົດ.

ໃນໂອກາດກ່າວອັດກອງປະຊຸມ ສະຫາຍ ເລຂາພັກແຂວງ ໄດ້ມີຄຳເຫັນຊີ້ນຳ ຊຶ່ງສະຫາຍ ໄດ້ເນັ້ນໜັກໃຫ້ຄະນະພັກແຕ່ລະຂັ້ນ ເພີ່ມທະວີວຽກງານສຶກສາອົບຮົມການເມືອງ-ແນວຄິດ ໃຫ້ເລິກເຊິ່ງເຖິງຖອງກວ່າເກົ່າ ໂດຍຕິດແໜ້ນກັບວຽກງານປ້ອງກັນຊາດ-ປ້ອງກັນຄວາມສະຫງົບ ຮັບປະກັນໃຫ້ແຂວງໄຊສົມບູນ ມີຄວາມສະຫງົບປອດໄພ ຢ່າງໜັກແໜ້ນ ສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃຫ້ຂະຫຍາຍຕົວຢ່າງໝັ້ນທ່ຽງ ໃນລະດັບ 7 % ຂຶ້ນໄປ, ນອກນັ້ນ ກໍຕ້ອງເພີ່ມທະວີວຽກງານສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ແຂງແຮງ ແລະ ເລິກເຊິ່ງກວ່າເກົ່າ ພ້ອມທັງເພີ່ມທະວີນຳພາ-ຊີ້ນຳ ມາດຕະການຄວບຄຸມ, ສະກັດກັ້ນ ແລະ ແກ້ໄຂການລະບາດ ຂອງພະຍາດໂຄວິດ 19 ໃຫ້ແຂງແຮງກວ່າເກົ່າ ຕາມມາດຕະການທີ່ຄະນະສະເພາະກິດ ແຕ່ລະຂັ້ນວາງອອກ ຢ່າງເຂັ້ມງວດ.
ບກ……………………………….. ຂ່າວ: ຈິນລະວອນ ວໍລະສົມບູນ