ມີເດຍລາວແຂວງຈຳປາສັກ ໃນທ້າຍເດືອນທັນວາ 2021, ທີ່ຫ້ອງວ່າການແຂວງ, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມຄະນະ ໄດ້ຕ້ອນຮັບ ທ່ານ ປຣາຕີໂຕ ສຸຮາໂຢ (Pratito Soeharyo) ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ອິນໂດເນເຊຍ ປະຈຳ ສປປ ລາວເພື່ອເຂົ້າຢ້ຽມຂໍ່ານັບ, ໃນໂອກາດ ມາຢ້ຽມຢາມແຂວງຈຳປາສັກ.

ໂອກາດນີ້, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ສະແດງຄວາມຕ້ອນຮັບ ທ່ານເອກອັກຄະລັດຖະທູດ ແຫ່ງ ອິນໂດເນເຊຍ ປະຈຳ ລາວ ທີ່ມາຢ້ຽມຢາມແຂວງຈຳປາສັກ ເຊິ່ງທ່ານໄດ້ນຳເອົາ ໄມຕຼີຈິດ ມິດຕະພາບ ຊຶ່ງຈະເປັນການສືບຕໍ່ປະກອບສ່ວນເສີມສ້າງສາຍພົວພັນການຮ່ວມມື ແລະຊ່ວຍເຫຼືອ ຊຶ່ງກັນ ແລະກັນ ລະຫວ່າງ ອິນໂດເນເຊຍ ກັບ ລາວ ເວົ້າລວມ, ເວົ້າສະເພາະ ເປັນການສືບຕໍ່ເສີມສ້າງສາຍພົວພັນ ຂະຫຍາຍການຮ່ວມມື ແລະພັດທະນາ ແຂວງຈຳປາສັກ ໃຫ້ນັບມື້ດີຂຶ້ນ ເປັນກ້າວໆ.

ພ້ອມນັ້ນ, ສອງຝ່າຍຍັງໄດ້ ຕີລາຄາສູງຕໍ່ ສາຍພົວພັນທາງດ້ານການທູດ ການພົວພັນຮ່ວມມື ແລະ ຊ່ວຍເຫຼືອ ຊຶ່ງກັນ ແລະ ກັນ ທາງດ້ານການເມືອງ, ເສດຖະກິດ ແລະສັງຄົມ ລະຫວ່າງ ລາວ ກັບ ອິນໂດເນເຊຍ ແລະແຂວງຈຳປາສັກ ແມ່ນ ໄດ້ມີການສະເໜີ ໃຫ້ ສືບຕໍ່ ແລະຂະຫຍາຍການຮ່ວມມື ໂດຍສະເພາະ ການລົງທຶນ ດ້ານກະສິກຳ ແລະການທ່ອງທ່ຽວ ເປັນຕົ້ນ.

ຂ່າວ: ທັດຊະນະ