ມີເດຍລາວນະຄອນຫຼວງວຽງຈັນ ນອກຈາກອຸປະກອນ IT ແລ້ວ, ອົງການຢູນີເຊັບ ຍັງໄດ້ສະໜອງໂທລະໂຄ່ງໃຫ້ແກ່ວິທະຍຸກະຈາຍສຽງແຫ່ງຊາດລາວ ເພື່ອຊ່ວຍສົ່ງເສີມສິດທິເດັກ ແລະ ເຜີຍແຜ່ຂໍ້ມູນທີ່ຖືກຕ້ອງກ່ຽວກັບພະຍາດໂຄວິດ-19 ໃຫ້ແກ່ບັນດາຊຸມຊົນຂັ້ນທ້ອງຖິ່ນ.

ວັນທີ 6 ເດືອນມັງກອນ ປີ 2022 ອົງການຢູນີເຊັບ ໄດ້ມອບອຸປະກອນ IT ໃຫ້ແກ່ວິທະຍຸກະຈາຍສຽງແຫ່ງຊາດລາວ ຂອງກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເພື່ອຊ່ວຍອຳນວຍຄວາມສະດວກໃຫ້ແກ່ກິດຈະກໍາຕ່າງໆຂອງກຸ່ມສື່ຊາວໜຸ່ມໃນທົ່ວປະເທດ, ລວມທັງການຜະລິດລາຍການວິທະຍຸຂອງຊາວໜຸ່ມ, ການຝຶກອົບຮົມ, ການສົ່ງເສີມຄວາມຮັບຮູ້ກ່ຽວກັບປະເດັນຕ່າງໆທີ່ກ່ຽວຂ້ອງກັບເດັກຜ່ານສື່ສັງຄົມ ແລະ ເພື່ອຊ່ວຍອໍານວຍຄວາມສະດວກໃນການສື່ສານທາງອອນໄລນ໌ ລະຫວ່າງ ວິທະຍຸກະຈາຍສຽງແຫ່ງຊາດລາວ, ອົງການຢູນິເຊັບ ແລະ ທີມງານສື່ຊາວໜຸ່ມຂັ້ນແຂວງຊ່ວງການລະບາດຂອງພະຍາດ ໂຄວິດ-19. ການມອບອຸປະກອນ IT ໃນຄັ້ງນິ້ແມ່ນເປັນການຊ່ວຍເຫຼືອພາຍໃຕ້ໂຄງການລະຫວ່າງ ອົງການຢູນິດເຊັບ ປະຈຳ ສປປ ລາວ ແລະ ຄະນະກຳມາທິການແຫ່ງຊາດອີຕາລີ ກ່ຽວກັບວິທະຍຸ, ສື່ສັງຄົມ ເລະ ການສ້າງທັກສະຕ່າງໆໃຫ້ແກ່ສຽງຊາວໜຸ່ມ.

ເຄື່ອງຕ່າງໆທີ່ໄດ້ມອບ-ຮັບລວມມີແລັບທັອບ 18 ເຄື່ອງ ໃຫ້ແກ່ກຸ່ມສື່ຊາວໜຸ່ມໃນ 18 ແຂວງທົ່ວປະເທດ, ເຄື່ອງປະສົມສຽງ (mixer) ແລະ ຄອມພິວເຕີ iMac ຢ່າງລະຊຸດໃຫ້ແກ່ ວິທະຍຸກະຈາຍສຽງແຫ່ງຊາດລາວ ແລະ ວິທະຍຸກະຈາຍສຽງຊາວໜຸ່ມລາວຄື້ນ FM.90 ຂອງສູນກາງຊາວໜຸ່ມລາວ.

ພະນະທ່ານ ໂພສີ ແກ້ວມະນີວົງ, ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວກ່າວວ່າ: “ພວກເຮົາຂໍສະແດງຄວາມຂອບໃຈມາຍັງ ອົງການຢູນິເຊັບ ສຳລັບການສະໜັບສະໜຸນອັນມີຄ່ານີ້, ເຊີ່ງຈະຊ່ວຍອຳນວຍຄວາມສະດວກໃຫ້ແກ່ກິດຈະກໍາຕ່າງໆຂອງກຸ່ມສື່ຊາວໜຸ່ມພາຍໃຕ້ສະພາບການທີ່ທ້າທາຍຂອງການລະບາດຂອງພະຍາດ ໂຄວິດ-19 ເພື່ອຮັບປະກັນວ່າພວກເຮົາສາມາດສືບຕໍ່ວຽກງານສົ່ງເສີມ ແລະ ລາຍງານກ່ຽວກັບປະເດັນຕ່າງໆຂອງເດັກ ແລະ ຊາວໜຸ່ມລາວ.”

ນອກນັ້ນ, ພາຍໃຕ້ການຮ່ວມງານກັບ ຄະນະກຳມາທິການແຫ່ງຊາດອີຕາລີ, ອົງການຢູນິເຊັບຍັງໄດ້ມອບ ລະບົບໂທລະໂຄ່ງ 33 ຊຸດ ຄຽງຄູ່ກັບອຸປະກອນທີ່ກ່າວມານີ້ ເພື່ອຊ່ວຍເຜີຍແຜ່ຂໍ້ມູນຂ່າວສານສໍາລັບຊຸມຊົນຊົນນະບົດໃນ 18 ແຂວງຂອງ ສປປ ລາວ ໃນຫົວຂໍ້ຕ່າງໆກ່ຽວກັບສະຫວັດດີພາບຂອງເດັກ ແລະ ແມ່ຍິງ ເຊັ່ນ: ການສັກວັກຊີນກັນພະຍາດ, ໂພຊະນາການ, ນໍ້າ ແລະ ສຸຂາພິບານ, ການສຶກສາ, ການປົກປ້ອງເດັກໂດຍຄຽງຄູ່ກັບຂໍ້ມູນຂ່າວສານກ່ຽວກັບການລະບາດຂອງພະຍາດ ໂຄວິດ-19. ມູນຄ່າລວມຂອງອຸປະກອນ IT ແລະ ໂທລະໂຄ່ງແມ່ນ 60,000 ກ່ວາໂດລາສະຫະລັດ.

ໃນ​ຕົ້ນ​ເດືອນ​ມັງກອນ ​ປີ 2022 ນີ້​, ເພື່ອ​ເສີມສ້າງ​ຄວາມ​ສາມາດ​ຂອງ​ກຸ່ມ​ສື່​​ຊາວ​ໜຸ່ມ​ໃນ 18 ​ແຂວງ ຊ່ວງ​​ການ​​ລະບາດ​ຂອງ​ພະຍາດ​ໂຄ​ວິດ-19, ວິທະຍຸກະຈາຍສຽງແຫ່ງຊາດລາວ ​ແລະ ສູນກາງ​​ຊາວໜຸ່ມ​ລາວ ຈະ​​ຈັດ​ກອງ​ປະຊຸມ​ສຳ​ມະ​ນາ​ທາງອອນໄລນ໌​​ເພື່ອເສີມ​ສ້າງ​ຄວາມ​ສາມາດ​​ຂອງ​​ສື່​​​ຊາວ​ໜຸ່ມ​ໃນ​ການ​ຜະລິດລາຍການ​ວິທະຍຸ ​ແລະ ການຜະລິດເນື້ອໃນ​​ສື່​ສັງຄົມກ່ຽວກັບ​ສິດທິເດັກ, ລວມທັງຫົວຂໍ້ໂພຊະນາການ ເເລະ ​ພະຍາດ​ໂຄ​ວິດ-19.

ທ່ານ​ ເດວິດ ດັນແຄນ (David Duncan), ວ່າການແທນ ຂອງຜູ້​ຕາງ​ໜ້າ ​ອົງການຢູນິເຊັບ ປະຈໍາ ​ສປປ ລາວ ກ່າວ​ວ່າ:​ “ນັບຕັ້ງແຕ່ປີ 2004 ເປັນຕົ້ນມາ, ວິທະຍຸກະຈາຍສຽງແຫ່ງຊາດລາວ ຂອງກະຊວງຖະແຫຼ​ງຂ່າວ, ວັດທະນະທຳ ແລະ ທ່ອງທ່ຽວ ໄດ້ເຮັດວຽກຮ່ວມກັນກັບ ອົງການຢູນິດເຊັບ ເພື່ອສົ່ງເສີມສະຫວັດດີພາບ​ຂອງເດັກ​ທຸກຄົນໃນ ສປປ ລາວ, ໂດຍສະເພາະເມື່ອເວົ້າເຖິງການມີສ່ວນຮ່ວມຂອງຊາວ​ໜຸ່ມ. ພວກເຮົາຫວັງວ່າອຸປະກອນລ່າສຸດ​ທີ່ໄດ້ສະໜອງໃຫ້ນີ້ ຈະຊ່ວຍສ້າງຄວາມເຂັ້ມແຂງໃຫ້ແກ່ກຸ່ມສື່​ຊາວໜຸ່ມໃນທົ່ວປະເທດເພື່ອສົ່ງເສີມ​ສະຫວັດດີພາບຂອງເດັກ​ ແລະ ຊາວໜຸ່ມລາວທັງໝົດ ພ້ອມທັງເພື່ອເຜີຍແຜ່ຂໍ້ມູນຂ່າວສານທີ່ຖືກຕ້ອງກ່ຽວກັບການລະບາດຂອງພະຍາດໂຄວິດ-19 ເພື່ອ​ຕ້ານຂໍ້ມູນຂ່າວສານທີ່ບໍ່ຖືກຕ້ອງ.”

ໃນປີ 2022, ວິທະຍຸກະຈາຍສຽງແຫ່ງຊາດລາວ ​ແລະ ສູນກາງ​​ຊາວໜຸ່ມ​ລາວ ຍັງຈະຈັດຕັ້ງປະຕິບັດໂຄງການໃຫ້ຄໍາປຶກສາເມື່ອສະຖານະການຂອງພະຍາດໂຄວິດ​-19 ອະນຸຍາດໃຫ້ເຮັດໄດ້.

ນອກ​ນີ້ ອົງການຢູນິເຊັບ ຍັງ​ໄດ້​ສະຫນອງ​ໜ້າກາກອະນາໄມ ຈໍານວນ 1,800 ກັບ ເພື່ອມອບໃຫ້ນັກຈັດລາຍການໄວຫນຸ່ມ ໃນ 18 ແຂວງ ຂອງ ສປປ ລາວ. ອົງການຢູນີເຊັບ ຍັງໄດ້ສຫນອງ ​ເຄື່ອງ​ວັດ​ແທກ​ອຸນຫະພູມ​ອິນ​ຟາ​ເຣດ ເເລະ ​ເຈວ​ລ້າງ​ມື ​ເພື່ອ​ຊ່ວຍ​ຮັບປະກັນ​ການ​ປະຕິບັດ​ວຽກ​ງານ​ສື່​​ຊາວ​ໜຸ່ມໃຫ້​ມີຄວາມ​​ປອດ​ໄພຊ່ວງ​ການ​​ລະບາດຂອງພະຍາດດັ່ງກ່າວ.