ວັນທີ 6 ມັງກອນ 2022 ທ່ານ ສຈ. ປອ ຈະເລີນ ເຢຍປາວເຮີ ກຳມະການສູນກາງພັກ, ຮອງປະທານ ສະພາແຫ່ງຊາດ, ປະທານຄະນະກຳມະການກົດໝາຍ ພ້ອມຄະນະ, ໂດຍມີຄະນະປະທານສະພາປະຊາຊົນ ແຂວງຄຳມ່ວນ, ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 12 ແຂວງຄຳມ່ວນ ໄດ້ລົງເຄື່ອນໄຫວ ເຮັດວຽກຢູ່ເມືອງໜອງບົກ. ໂດຍມີການນຳຂອງເມືອງ, ຄະນະ ສສຂ ປະຈຳເຂດເລືອກຕັ້ງເມືອງ ແລະ ຂະແໜງການຕ່າງໆຂັ້ນເມືອງເຂົ້າຮ່ວມ.

ທ່ານ ສຸວັນໂນ ວິໄລວັນ ຮອງເລຂາພັກເມືອງ, ປະທານກວດກາພັກເມືອງ ທັງເປັນສະມາຊິກສະພາ ປະຊາຊົນແຂວງ ປະຈຳເຂດເລືອກຕັ້ງເມືອງໜອງບົກ ໄດ້ລາຍງານກ່ຽວກັບການຈັດຕັ້ງປະຕິບັດວຽກງານ ໃນໄລຍະ ຜ່ານມາ ໃຫ້ຮັບຊາບວ່າ: ຂະບວນການຜັນຂະຫຍາຍ ມະຕິກອງປະຊຸມໃຫຍ່ ຜູ້ແທນ ຄັ້ງທີ XI ຂອງພັກ, ມະຕິ ກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງ, ແຜນພັດທະນາເສດຖະກິດ-ສັງຄົມ ຂອງແຂວງ ແລະ ມະຕິກອງປະຊຸມໃຫຍ່ ຜູ້ແທນ ຄັ້ງທີ IX ຂອງອົງຄະນະພັກເມືອງ ໃນໄລຍະ 1 ປີຜ່ານມາ ແມ່ນຍັງຢູ່ໃນສະພາບ ທີ່ພົບກັບສິ່ງທ້າທາຍຫຼາຍດ້ານເປັນຕົ້ນ: ການປະເຊີນກັບຄວາມຫຍຸ້ງຍາກທາງດ້ານເສດຖະກິດ, ບັນຫາປະກົດ ການ ຫຍໍ້ທໍ້ພາຍໃນເມືອງ, ບັນຫາຢາເສບຕິດ, ການແຜ່ລະບາດຂອງພະຍາດໂຄວິດ-19 ແລະ ອື່ນໆ

ແຕ່ເມືອງໜອງບົກ ກໍ່ສາມາດສູ້ຊົນພັດທະນາເສດຖະກິດໃຫ້ມີການຂະຫຍາຍຕົວຢູ່ໃນລະດັບ 2,8%, ການຈັດເກັບລາຍຮັບ ປະຕິບັດໄດ້ 82,84% ຂອງແຜນການ, ການປູກເຂົ້ານາປີ ແມ່ນສາມາດຈັດຕັ້ງປະຕິບັດໄດ້ລື່ນແຜນ 6,74%, ການປູກພືດລະດູແລ້ງ ລື່ນແຜນ 6,46%. ສຳລັບວຽກງານສະພາປະຊາຊົນແຂວງ ແມ່ນໄດ້ຈັດຕັ້ງເຜີຍແຜ່ ຜົນສຳເລັດກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ເທື່ອທີ 9 ແລະ ສະພາປະຊາຊົນແຂວງ ຊຸດທີ 2, ໄດ້ຮັບຄຳຮ້ອງ ແລະ ຄຳສະເໜີຈາກການຈັດຕັ້ງ ແລະ ບຸກຄົນ ຈຳນວນ 20 ສະບັບ, ຈັດກອງປະຊຸມ ຮ່ວມກັບຄະນະພັກເມືອງ-ອົງການປົກຄອງເມືອງ ເພື່ອຄົ້ນຄວ້າ ແລະ ທາບທາມຄຳຄິດເຫັນ ໃສ່ບັນດາ ຮ່າງກົດໝາຍ 11 ສະບັບ, ຕິດຕາມ, ກວດກາ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ໂຄງການລົງທຶນທີ່ສຳຄັນຂອງເມືອງ, ຊຸກຍູ້ພາກສ່ວນທີ່ກ່ຽວຂ້ອງ ໃນການຈັດຕັ້ງ ປະຕິບັດລັດຖະທຳມະນູນ, ກົດໝາຍ, ມະຕິຂອງສະພາປະຊາຊົນແຂວງ ແລະ ນິຕິກຳຕ່າງໆ, ປະສານກັບພາກສ່ວນ ກ່ຽວຂ້ອງ ເພື່ອຄົ້ນຄວ້າ, ແກ້ໄຂຄຳຮ້ອງທຸກຂອງປະຊາຊົນ ຕາມຂອບເຂດຄວາມຮັບຜິດຊອບຂອງຕົນ.

ໂອກາດດຽກັນ ທ່ານຮອງປະທານສະພາແຫ່ງຊາດ ກໍ່ໄດ້ໂອ້ລົມ ໃຫ້ສືບຕໍ່ເພີ່ມທະວີສຶກສາອົບຮົມ ການເມືອງ-ແນວຄິດໃຫ້ແກ່ສະມາຊິກພັກ-ພະນັກງານ ແລະ ປະຊາຊົນ ໃຫ້ກວ້າງຂວາງ ແລະ ທົ່ວເຖິງ, ເອົາໃຈໃສ່ ເພີ່ມທະວີໃນການປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ ເພື່ອເຮັດໃຫ້ສັງຄົມມີຄວາມສະຫງົບ ແລະ ຄວາມເປັນລະບຽບຮຽບຮ້ອຍ, ສືບຕໍ່ໂຄສະນາ ເຜີຍແຜ່ຜົນສຳເລັດ ກອງປະຊຸມຂອງສະພາປະຊາຊົນ ແລະ ຊຸກຍູ້ບັນດາພາກສ່ວນທີ່ກ່ຽວຂ້ອງ ໃນການຜັນຂະຫຍາຍ, ເຜີຍແຜ່ບັນດາກົດໝາຍ, ມະຕິ, ຄຳສັ່ງ, ຄຳແນະນຳ ຕ່າງໆໃຫ້ປະຊາຊົນຮັບຮູ້ ແລະ ເຂົ້າໃຈຢ່າງເລິກເຊິ່ງ.