ພິທີປະກາດສ້າງຕັ້ງ ແລະ ແຕ່ງຕັ້ງຄະນະໜ່ວຍພັກຮາກຖານ ສານປະຊາຊົນເຂດI ເມືອງລະມາມ ແຂວງເຊກອງ ໄດ້ຈັດຂຶ້ນໃນວັນທີ 12 ມັງກອນ 2022 ທີ່ຫ້ອງປະຊຸມຂອງສານປະຊາຊາຊົນແຂວງໂດຍມີສະຫາຍ ໄຊຍະຫວັດ ກ້ອນຄຳໝັ້ນ ຮອງເລຂາພັກເມືອງ ປະທານກວດກາພັກ-ລັດ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງລະມາມ; ສະຫາຍ ສົມຈິດ ວໍລະວົງ ກຳມະການພັກແຂວງ ເລຂາໜ່ວຍພັກຮາກຖານສານປະຊາຊົນແຂວງເຊກອງ ມີແຂກຖືກເຊີນ,ຂະແໜງການກ່ຽວຂ້ອງ ຕະຫຼອດຮອດສະມາຊິກພັກສົມບູນ-ສໍາຮອງເຂົ້າຮ່ວມ.

       ໃນພິທີ ສະຫາຍ ໄຂຄຳ ດອຍສີທົນ ຫົວໜ້າຄະນະຈັດຕັ້ງເມືອງ ໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກເມືອງສະບັບເລກທີ 167/ຄຈພມ ລົງວັນທີ 11 ພະຈິກ 2021 ວ່າດ້ວຍອະນຸມັດສ້າງຕັ້ງເປັນຄະນະໜ່ວຍພັກຮາກຖານ; ມະຕິຕົກລົງສະບັບເລກທີ 166/ຄຈພມ ວ່າດ້ວຍບົ່ງຕົວແຕ່ງຕັ້ງເລຂາ, ຮອງເລຂາ, ປະທານກວດກາ ສານປະຊາຊົນເຂດI ເມືອງລະມາມ ແຂວງເຊກອງໂດຍເຫັນດີແຕ່ງຕັ້ງ ສະຫາຍ ເຊິນ ດິນຍະວົງ ເປັນເລຂາໜ່ວຍພັກ; ສະຫາຍ ບຸນປອນ ສອນອາໄລ ເປັນຮອງເລຂາ; ສະຫາຍ ໂອດານ ສິງຫາລາດ ເປັນກຳມະການ ປະທານກວດກາ . ເພື່ອເປັນແກ່ນສານໃນການນໍາພາ-ຊີ້ນໍາປະຕິບັດໜ້າທີ່ວຽກງານວິຊາສະເພາະ ຕາມພາລະບົດບາດ, ສິດ ແລະ ໜ້າທີ່ຂອງຕົນໃຫ້ມີຜົນສໍາເລັດໃໝ່ທີ່ດີຂຶ້ນກວ່າເກົ່າ. ພ້ອມນີ້ໃນພິທີ,ກໍ່ໄດ້ເລື່ອນສະມາຊິກສຳຮອງຂຶ້ນສົມບູນຈຳນວນ 2 ສະຫາຍຄື: ສະຫາຍ ຈຽງສັກ ພິມມະໄຊ ແລະ ສະຫາຍ ເທບສົມພົງ ພັນທະວົງ.

        ໃນໂອກາດນີ້ ສະຫາຍ ໄຊຍະຫວັດ ກ້ອນຄຳໝັ້ນ  ໄດ້ມີຄໍາເຫັນຊີ້ນໍາໂດຍການປະກາດສ້າງຕັ້ງ ແລະ ບົ່ງຕົວແຕ່ງ ຕັ້ງຄະນະພັກຮາກຖານ-ຄະນະໜ່ວຍພັກຄັ້ງນີ້ ອີງໃສ່ຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ແລະ ການເຕີບໃຫຍ່ຂະຫຍາຍຕົວຂອງການຈັດຕັ້ງຮາກຖານພັກ ເພື່ອແນໃສ່ການນໍາພາ-ຊີ້ນໍາວຽກງານໃຫ້ທົ່ວເຖິງເລິກເຊິ່ງກວ່າເກົ່າ; ພາຍຫຼັງປະກາດແລ້ວ ຄະນະໜ່ວຍພັກຕ້ອງຈັດກອງປະຊຸມປຶກສາຫາລືແບ່ງງານ, ແບ່ງຄວາມຮັບຜິດຊອບ, ປັບປຸງແບບແຜນການນໍາພາ ແລະ ວິທີເຮັດວຽກ; ນໍາພາ-ຊີ້ນໍາຕາມຫຼັກການລວມສູນປະຊາທິປະໄຕຂອງພັກ, ຕັດສິນບັນຫາເປັນໝູ່ຄະນະ, ສຽງສ່ວນນ້ອຍຂຶ້ນກັບສຽງສ່ວນຫຼາຍ, ບຸກຄົນຂຶ້ນກັບການຈັດຕັ້ງ, ເຮັດ ແລະ ປະຕິບັດຕາມມະຕິ; ສືບຕໍ່ນໍາພາສຶກສາອົບຮົມການເມືອງແນວຄິດໃຫ້ສະມາຊິກພັກ-ພະນັກງານ; ປະສານສົມທົບກັບສາຍຕັ້ງ-ສາຍຂວາງ ຢ່າງກົມກ່ຽວ, ຄົ້ນຄວ້າມະຫາຊົນກ້າວໜ້າທີ່ຈະຂະຫຍາຍເຂົ້າພັກໃຫ້ລະອຽດ, ຖືກຕ້ອງຕາມຂັ້ນຕອນລະບຽບຫຼັກການຂອງພັກ ເພື່ອແນໃສ່ການຂະຫຍາຍພັກໃຫ້ໄດ້ທັງປະລິມານ ແລະ ຄຸນນະພາບ; ສ້າງໜ່ວຍພັກໃຫ້ກາຍເປັນໜ່ວຍພັກປອດໃສ ເຂັ້ມແຂງ ແລະ ໜັກແໜ້ນ.

ພາບ-ຂ່າວ: ດາວສະຫວັນ.