ວັນທີ 12 ເດືອນມັງກອນ 2022 ສປປ ລາວ ໄດ້ຮັບວັກຊີນປ້ອງ​ກັນພະຍາດ ໂຄວິດ-19 ຈາກປະເທດອົດສະຕາລີຢ່າງເປັນທາງການຈຳນວນທັງໝົດ 1,005,580 ໂດສ໌​, ເຊີ່ງໃນນີ້ປະກອບມີວັກຊີນ Pfizer BioNTech ຈຳນວນ 905,580 ໂດສ໌​ ແລະ ວັກຊີນ AstraZeneca/Oxford ຈໍານວນ 100,000 ໂດສ໌ ວັກຊີນເຫຼົ່ານີ້ຈະຊ່ວຍໃຫ້ ສປປ ລາວ ສາມາດຜັນຂະຫຍາຍວຽກງານການສັກວັກຊີນ ແລະ ເປັນອົງປະກອບສ່ວນໜຶ່ງຂອງການຊ່ວຍເຫຼືອຈາກ ປະເທດອົດສະຕາລີ ເພື່ອຊ່ວຍ ສປປ ລາວ ຮັບມືກັບການລະບາດຂອງ ໂຄວິດ-19 ເຊີ່ງການຊ່ວຍເຫຼືອນີ້້້ເເມ່ນມີມູນ​ຄ່າ​ທັງ​ໝົດດທີ່ 22 ລ້ານໂດ​ລາ​ອົດ​ສະ​ຕາ​ລີ (ປະມານ 15.6 ລ້ານໂດລາສະຫະລັດ) ເເລະ ຈະລວມເຖີງການຊ່ວຍເຫຼືອດ້ານເຕັກນິກ, ການຝຶກອົບຮົມ ແລະ ອຸປະກອນການແພດ.

ພິທີມອບ-ຮັບວັກຊີນດັ່ງກ່າວໄດ້ຈັດຂຶ້ນທີ່ກະຊວງສາທາລະນະສຸກ ແລະ ເຂົ້າຮ່ວມໂດຍ ທ່ານ ດຣ. ບຸນແຝງ ພູມມະໄລສິດ​, ລັດຖະມົນຕີກະຊວງສາທາລະນະສຸກ, ທ່ານ ແດນ ເຮລ໌ດອນ​, ຮອງ​ຫົວ​ໜ້າຄະນະປະຕິບັດງານຂອງອົດສະຕາລີ​, ແລະ ທ່ານນາງ ບີອາເຕ ດາສ໌ເທວ, ວ່າການແທນຜູ້ຕາງໜ້າ ອົງການຢູນິເຊັບ ປະຈຳ ສປປ ລາວ.

ພະນະທ່ານ ​ດຣ. ບຸນແຝງ ພູມມະໄລສິດ​, ລັດຖະມົນຕີກະຊວງສາທາລະນະສຸກ ກ່າວວ່າ: “ຕາງໜ້າລັດຖະບານແຫ່ງ ສປປ ລາວ, ຂ້າພະເຈົ້າຂໍສະແດງຄວາມຂອບໃຈຢ່າງຈິງໃຈທີ່ສຸດມາຍັງລັດຖະບານອົດສະຕາລີທີ່ໄດ້ໃຫ້ການຊ່ວຍເຫຼືອ​ໃນການສະໜອງວັກຊີນ​ປ້ອງກັນພະຍາດ ໂຄວິດ-19 ໃຫ້ແກ່ປະຊາຊົນລາວຈໍານວນໜື່ງລ້ານ​ກວ່າໂດສ໌​. ພວກເຮົາມີຄວາມຍິນດີທີ່ສຸດຕໍ່ການປະກອບສ່ວນຂອງປະເທດອົດສະຕາລີ ເຊີ່ງເປັນການສະໜັບ​ສະໜູນ​ຢ່າງໃຫຍ່ຫຼວງຕໍ່ຄວາມພະຍາຍາມຂອງພວກເຮົາໃນປະຈຸບັນເພື່ອບັນລຸເປົ້າໝາຍ​​ສັກວັກຊີນໃຫ້ໄດ້ເຖິງ​ 87.25 ເປີເຊັນ ຂອງປະຊາກອນໃນປີ 2022 ເຊີ່ງໃນຂະບວນການນີ້້ເເມ່ນຈະສຸມໃສ່ກຸ່ມໄວໜຸ່ມ ເເລະ ກຸ່ມບຸລິມະສິດອື່ນໆ ”​ ວັກຊີນ Pfizer BioNTech ທີ່ຈັດສົ່ງຈາກປະເທດອົດສະຕາລີຄັ້ງຫຼ້າ​ສຸດນີ້້ ເເມ່ນຈະສັກໃຫ້ປະຊາຊົນອາຍຸແຕ່ 12 ຫາ 17 ປີ ເປັນຕົ້ນເພຶ່ອປະກອບສ່ວນເຂົ້າໃນຄວາມພະຍາຍາມຂອງລັດຖະບານ ສປປ ລາວ ໃນປະຈຸບັນທີ່ຈະ​ສັກ​ວັກຊີນປ້ອງກັນພະຍາດ ໂຄວິດ-19 ໃຫ້ແກ່ໄວໜຸ່ມເພື່ອໃຫ້ພວກເຂົາສາມາດສືບຕໍ່ການຮຽນຢູ່ໃນໂຮງຮຽນໄດ້ຢ່າງປອດໄພ, ໂດຍອີງ​ຕາມ ແຜນປະຕິບັດການສັກວັກຊີນປ້ອງກັນພະຍາດ ໂຄວິດ-19 ແຫ່ງຊາດ​. ນອກຈາກນີ້, ວັກຊີນ Pfizer BioNTech ເເມ່ນຍັງຈະໄດ້ສັກໃຫ້ແກ່​ກຸ່ມເປົ້າໝາຍອື່ນໆ, ລວມທັງຜູ້ມີ​ອາຍຸ 60 ປີຂຶ້ນໄປ, ພະນັກງານສາທາລະນະສຸກໃນທົ່ວປະເທດ ເເລະ  ຜູ້ມີພະຍາດ​ປະຈໍາຕົວ. ສ່ວນວັກຊີນ AstraZeneca/Oxford ທີ່ປະເທດອົດສະຕາລີໄດ້ສະໜອງໃຫ້ເເມ່ນຈະສືບຕໍ່ນຳໃຊ້​​ເພື່ອໃຫ້ການ​ປົກປ້ອງເເກ່​ບັນດາກຸ່ມບຸລິມະສິດຕາມແຜນປະຕິບັດການສັກວັກຊີນປ້ອງກັນພະຍາດ ໂຄວິດ-19 ແຫ່ງຊາດ​ ຕື່ມອີກ.

ທ່ານ ແດນ ເຮລ໌ດອນ​, ຮອງຫົວໜ້າຄະນະປະຕິບັດງານຂອງອົດສະຕາລີ, ກ່າວວ່າ: “ປະເທດອົດສະຕາລີມີຄວາມພາກພູມໃຈທີ່ໄດ້ມີບົດບາດໃນການສະໜັບສະໜູນ​ລັດຖະບານ ສປປ ລາວ ໃນການຮັບມືກັບພະຍາດໂຄວິດ-19 ​ແລະ ໃນການປະຕິບັດການສັກວັກຊີນ​ປ້ອງກັນພະຍາດ ໂຄວິດ-19 ໃຫ້ໄດ້ຕາມເປົ້າໝາຍ 87.25 ເປີເຊັນ ໃນປີ 2022. ວັກຊີນ Pfizer BioNTech ທີ່ປະເທດອົດສະຕາລີໄດ້ສະໜອງ​ໃຫ້​ຈະເປັນອົງປະກອບສະໜັບ​ສະໜູນ​ທີ່ສໍາຄັນໃນຍຸດທະສາດຂອງລັດຖະບານເພື່ອໃຫ້ການປົກປ້ອງເເກ່ໄວໜູ່ມຈາກພະຍາດດັ່ງກ່າວ, ເຊີ່ງ​ວັກຊີນນີ້ເເມ່ນໄດ້ຮັບ​ອະນຸມັດໂດຍ ອົງການອະນາໄມໂລກ ແລ້ວສໍາລັບກຸ່ມເປົ້າໝາຍ​ນີ້.” ນອກຈາກນີ້, ການຊ່ວຍເຫຼືອທາງດ້ານວິຊາການຂອງອົດສະຕາລີ (ໂດຍຜ່ານ ອົງການຢູ່ນິເຊັບ ເເລະ ອົງການອະນາໄມໂລກ) ຈະຊ່ວຍຮັບປະກັນການປະຕິບັດວຽກງານສັກວັກຊີນໃຫ້ມີຄວາມ ປອດໄພ ແລະ ມີປະສິດທິພາບ, ພ້ອມດ້ວຍເສີມສ້າງຄວາມເຂັ້ມແຂງໃຫ້ເເກ່ລະບົບຄວາມເຢັນເພື່ອຂົນສົ່ງວັກຊີນໃຫ້ແກ່ປະຊາກອນທີ່ມີຄວາມສ່ຽງສູງ ແລະ ຜູ້ທີ່ອາໄສຢູ່ໃນເຂດຫ່າງໄກສອກຫຼີກ, ເສີມສ້າງຄວາມເຂັ້ມແຂງໃຫ້ເເກ່ລະບົບຂໍ້ມູນກ່ຽວກັບວຽກງານສົ່ງເສີມສຸຂະພາບ ແລະ ຝຶກອົບຮົມພະນັກງານແພດກ່ຽວກັບການບໍ​ລິ​ຫານ​ ເເລະ ຈັດຕັ້ງປະຕິບັດການສັກວັກຊີນອີກດ້ວຍ. ປະເທດອົດ​ສະ​ຕາ​ລີ​ຍັງ​ໄດ້​ສະ​ໜັບ​ສະໜູນ ສປປ ​ລາວ ​ໃນ​ວຽກງານການ​ໂຄ​ສະ​ນາເຜີຍເເຜ່ ເເລະ ​ປູກ​ຈິດ​ສໍາ​ນຶກ​ຂອງ​ປະ​ຊາ​ຊົນ ​ເພື່ອຜັນ​ຂະ​ຫຍາຍ​ການ​ສັກ​ວັກ​ຊີນປ້ອງກັນພະຍາດ ໂຄວິດ-19 ອີກ​ດ້ວຍ.

ທ່ານນາງ ບີອາເຕ ດາສ໌ເທວ, ວ່າການແທນຜູ້ຕາງໜ້າ ອົງການຢູນິເຊັບ ປະຈຳ ສປປ ລາວ, ກ່າວວ່າ: “ອົງການຢູນິເຊັບ ມີຄວາມພາກພູມໃຈທີ່ໄດ້ໃຫ້ການສະໜັບສະໜູນການຈັດສົ່ງວັກຊີນປ້ອງ​ກັນພະຍາດ ໂຄວິດ-19 ຄັ້ງຫຼ້າ​ສຸດນີ້ຈາກປະເທດອົດສະຕາລີເຖິງ​ສປປ ລາວ. ວັກຊີນ​ປ້ອງກັນພະຍາດ ໂຄວິດ-19 ທັງໝົດທີ່ໄດ້ນໍາໃຊ້ໃນ ສປປ ລາວ ລ້ວນແຕ່ໄດ້ຜ່ານການທົດສອບຢ່າງເຂັ້ມງວດ ແລະ ໄດ້ພິສູດແລ້ວວ່າມີຄວາມປອດໄພ ແລະ ມີປະສິດທິພາບໃນການປ້ອງກັນອາ​ການ​ຮ້າຍ​ແຮງ​ ແລະ ການເສຍຊີວິດຈາກພະຍາດໂຄວິດ-19 ວັກຊີນ Pfizer BioNTech ເເມ່ນໄດ້ນຳໃຊ້ເພຶ່ອໃຫ້ການປົກປ້ອງກັບປະຊາຊົນຫຼາຍຮ້ອຍລ້ານຄົນໃນທົ່ວໂລກເເລ້ວ ເເລະ ຍັງໄດ້ຮັບການລະບຸວ່າ​ມີຄວາມປອດໄພ ແລະ ມີປະສິດທິພາບສໍາລັບກູ່ມຄົນອາຍຸ 12 ຫາ 17 ປີອີກດ້ວຍ.” 

​ມາຮອດວັນທີ 10 ເດືອນມັງກອນ 2022, ປະມານ 4,620,374 ຄົນ ຫຼື 62.97 ເປີເຊັນ ຂອງປະຊາກອນລາວເເມ່ນໄດ້ຮັບການສັກວັກຊີນ​ປ້ອງກັນພະຍາດ ໂຄວິດ-19 ຢ່າງໜ້ອຍ 1 ເຂັມ ແລະ ປະຈຸບັນນີ້ປະມານ 3,721,147 ຄົນ ຫຼື 50.71 ເປີເຊັນ ເເມ່ນໄດ້ຮັບການສັກວັກຊີນປ້ອງ​ກັນພະຍາດ ໂຄວິດ-19 ຄົບຕາມ​ຄຳແນະນຳແລ້ວ.