ກອງປະຊຸມສະຫຼຸບຕີລາຄາການຈັດຕັ້ງປະຕິບັດແຜນພັດທະນາຂົງເຂດວັດທະນະທຳ-ສັງຄົມ, ການປົກຄອງ ແລະການຕ່າງປະເທດ ປະຈຳປີ 2021ແລະທິດທາງແຜນການປະຈຳປີ 2022 ໄດ້ຈັດຂຶ້ນໃນວັນທີ 12 ມັງກອນ ນີ້ ,ທີ່ຫ້ອງປະຊຸມຊັ້ນສາມຫ້ອງວ່າການແຂວງ, ໂດຍການເປັນປະທານຂອງ ທ່ານ ຄຳສອນ ກອນເຍີ ຮອງເຈົ້າແຂວງເຊກອງ, ຜູ້ຊີ້ວຽກງານຂົງເຂດວັດທະນະທຳ-ສັງຄົມ ແລະມີ 7 ຂະແໜງການຂົງເຂດວັດທະນະທຳ-ສັງຄົມເຂົ້າຮ່ວມ.

ທ່ານ ອຸ່ນເຮືອນ ໄຊຍະວົງ ຮອງຫົວໜ້າຫ້ອງວ່າການແຂວງເຊກອງ ໄດ້ຕີລາຄາຄືນການຈັດຕັ້ງປະຕິບັດແຜນພັດທະນາຂົງເຂດວັດທະນະທຳ-ສັງປະຈຳປີ 2021 ໂດຍສະເພາະແມ່ນຄາດໝາຍທີ່ນອນໃນ 6 ເປົ້າໝາຍ, ໃນນັ້ນ ຂະແໜງຖະແຫຼງຂ່າວ,ວັດທະນະທຳແລະທ່ອງທ່ຽວ ໄດ້ສຸມໃສ່ເຮັດໜ້າທີ່ເປັນກະບອກສຽງອັນແຫຼມຄົມຂອງພັກ-ລັດ ດ້ວຍການນຳເອົາເນື້ອໃນແນວທາງແຜນນະໂຍບາຍໃນທຸກຂົງເຂດວຽກງານລົງສູ່ປະຊາຊົນຮັບຮູ້ຢ່າງກ້ວາງຂວາງ ໂດຍສາມາດ ຜະລິດຂ່າວສື່ສືພິມ ແລະວິທະຍຸໂທລະພາບໄດ້ທັງໝົດ 2.742 ຂ່າວ,  ຂຽນບົດໄດ້ 139 ບົດ; ພ້ອມທັງສົ່ງໃຫ້ສື່ສູນກາງເປັນປົກກະຕິ, ວຽກງານທ່ອງທ່ຽວ ແລະວຽກງານວັດທະນະທຳ ມີການພັດທະນາໄປຕາມທິດທີ່ວ່າງໄວ້;

ດ້ານຂະແໜງສາທາລະນະສຸກ ໄດ້ຈັດຕັ້ງປະຕິບັດປະສົບຜົນສຳເລັດຫຼາຍດ້ານຄື: ອັດຕາສ່ວນການຕາຍຂອງເດັກນ້ອຍອາຍຸຕ່ຳກ່ວາ1ປີ,5ປີ ແລະອັດຕາສ່ວນການຕາຍຂອງແມ່ເດັກເກີດໃໝ່ແມ່ນບັນລຸເກີນແຜນ, ອັດຕາການສັກຢາກັນພະຍາດໃຫ້ເດັກລຸ່ມ 1 ປີ ປະຕິບັດໄດ້ 67,37%, ການນຳໃຊ້ນ້ຳສະອາດ ແລະວິດຖ່າຍ ປະຕິບັດໄດ້ 84% ແລະອັດຕາປົກຄຸມປະກັນສຸຂະພາບແມ່ນບັນລຸ100%, ອາຍຸຍືນສະເລ່ຍ 65 ປີ, ວຽກງານສັກວັກຊີນປ້ອງກັນໂຄວິດ-19: ມາຮອດປັດຈຸບັນແຂວງເຊກອງ ໄດ້ຮັບວັກຊີນ ທັງໝົດ 138.466 ໂດສ, ສັກແລ້ວ 153.860 ໂດສ, ໃນນັ້ນສັກເຂັມ1 ໄດ້ 93.022 ໂດສ  ເທົ່າກັບ 71% ແລະ ສັກຄົບ 2 ເຂັມ ໄດ້73.693 ໂດສ ເທົ່າກັບ 55,9%; ສ່ວນວຽກງານສຶກສາທິການ ແລະກິລາ ມີຫຼາຍດ້ານທີ່ພົ້ນເດັ່ນ ເປັນຕົ້ນ ອັດຕານັກຮຽນເຂົ້າໃໝ່ປ1ແລະປ5 ແລະອັດຕາຄ້າງຫ້ອງມັດທະຍົມຕົ້ນ, ອັດຕາເລື່ອນຊັ້ນປ5 ຂຶ້ນ ມ1 ປະຕິບັດໄດ້ລື່ນຄາດໝາຍທີ່ວ່າງໄວ້; ວຽກງານແຮງງານສະຫວັດດີການສັງຄົມ ໄດ້ພັດທະນາ ແລະຝຶກສີມືຮງງານເພື່ອຕອບສະຫນອງໃຫ້ແກ່ການພັດທະນາາຕາມໂຄງປະກອບເສດຖະກິດຂອງແຂວງ ໄດ້ 385 ຄົນ ປະຕິບັດໄດ້ລື່ນແຜນ, ຂະນະທີ່ຂະແໜງພາຍໃນ ໄດ້ສໍາເລັດການລົງເກັບຂໍ້ມູນຄ່າພິກັດຈໍານວນ 11 ບ້ານ ທີ່ບໍ່ມີຄ່າພິກັດໃນແຜນທີ່ແຫ່ງຊາດ ແລະຂະແໜງພົວພັນ ແລະຮ່ວມມືກັບຕ່າງປະເທດ ກໍໄດ້ຮັບການພັດທະນາດີຂຶ້ນເປັນກ້າວໆ.

ພ້ອມດຽວກັນນີ້ ຕາງໜ້າຈາກ 7 ຂະແໜງການຍັງໄດ້ລາຍງານານຈັດຕັ້ງປະຕິບັດວຽກງານໃນຂະແໜງຕົນ ເຊິ່ງຊີ້ໃຫ້ເຫັນທັງຜົນສຳເລັດທີ່ຕັ້ງໜ້າ ແລະຂໍ້ຄົງຄ້າງ ພ້ອມທັງແລກປ່ຽນຖອດຖອນບົດຮຽນນໍາກັນ ເພື່ອຊອກໄດ້ຈຸດຄົງຄ້າງ ເພື່ອພ້ອມກັນແກ້ໄຂໃຫ້ດີຂຶ້ນ ແລະສຳເລັດຕາມແຜນການທີ່ວ່າງໄວ້.
ຂ່າວ : ພຸດທະສອນ