ມີເດຍລາວແຂວງຫຼວງພະບາງ ກອງປະຊຸມສະຫຼຸບການຈັດຕັ້ງວຽກງານຊົນເຜົ່າໄລຍະ 5 ປີ (2016-2020) ແລະທິດທາງແຜນການ 5ປີ ຕໍ່ໜ້າ ລະຫວ່າງກົມຊົນເຜົ່າສູນກາງແນວລາວສ້າງຊາດກັບແນວລາວສ້າງຊາດ 8 ແຂວງພາກເໜືອ ໄດ້ຈັດຂື້ນໃນລະຫວ່າງວັນທີ 11-12 ມັງກອນ 2022 ທີ່ຫ້ອງປະຊຸມສະຫະພັນແມ່ຍິງແຂວງ ໂດຍການເປັນປະທານຂອງທ່ານ ນາງ ມະນີວັນ ແກ້ວໂກມິນ ຮອງກົມຊົນເຜົ່າສູນກາງແນວລາວສ້າງຊາດ, ມີຮອງປະທານຜູ້ຊີ້ນໍາວຽກງານຊົນເຜົ່າ, ຫົວໜ້າ ຂະແໜງຊົນເຜົ່າ 8 ແຂວງເຂົ້າຮ່ວມ.

ທ່ານ ນາງ ມະນີວັນ ແກ້ວໂກມິນ ຮອງກົມຊົນເຜົ່າ ໄດ້ຜ່ານບົດສະຫຼຸບຜົນການຈັດຕັ້ງ ປະຕິບັດວຽກງານຊົນເຜົ່າໃນໄລຍະ 5 ປີ (2016-2020) ໄດ້ຍົກໃຫ້ເຫັນຜົນງານທີ່ຍາດມາໄດ້ໃນໄລຍະ 5 ປີ, ນັບແຕ່ທ້າຍປີ 2019 ເປັນຕົ້ນມາ ປະເທດລາວເຮົາມີຫຼາຍ ແຂວງ-ຫຼາຍທ້ອງຖິ່ນປະສົບກັບໄພທໍາມະຊາດຢ່າງໜັກໜ່ວງ, ຮ້າຍແຮງເຊັ່ນ: ໄພແຫ້ງແລ້ງ, ໄພນໍ້າຖ້ວມ ນອກນັ້ນ ກໍ່ຍັງມີພະຍາດລະດູການ ແລະການລະບາດພະຍາດໂຄວິດ-19 ເຖິງຢ່າງໃດກໍ່ຕາມອົງການແນວລາວສ້າງຊາດກໍ່ ຄືຄະນະພັກ, ຄະນະປະຈໍາແຕ່ລະຂັ້ນແຕ່ສູນກາງລົງຮອດທ້ອງຖິ່ນໄດ້ນໍາພາປຸກລະດົມກໍາລັງແຮງມະຫາຊົນ, ອົງ ການຈັດຕັ້ງສາກົນ, ບັນດາເພື່ອນມິດ, ກໍາມະການສູນກາງແນວລາວສ້າງຊາດ, ບັນດາທີ່ປຶກສາໄດ້ພ້ອມກັນບຸກບືນ ເຂົ້າໃນການຊ່ວຍເຫຼືອ ເພື່ອຟື້ນຟູຊີວິດການເປັນຢູ່ຂອງປະຊາຊົນບັນດາເຜົ່າ, ປົກປັກຮັກສາ ແລະສ້າງສາພັດທະນາ ປະເທດຊາດຕາມແນວທາງ, ນະໂຍບາຍປ່ຽນແປງໃໝ່ຂອງພັກວາງອອກໃນແຕ່ລະໄລຍະ,ໃນນີ້ໄດ້ສໍາເລັດການຮັບຮອງ ເອົາຊົນເຜົ່າຢູ່ ສ ປປລາວມີ 50 ຊົນເຜົ່າ, ພ້ອມນັ້ນຍັງໄດ້ວາງທິດທາງຄາດໝາຍສູ້ຊົນ 5 ປີຕໍ່ໜ້າເປັນຕົ້ນແມ່ນ ສຶກສາອົບຮົມ-ການເມືອງແນວຄິດໃຫ້ສະມາຊິກພັກ, ພະນັກງານ-ລັດຖະກອນໃນຂົງເຂດແນວລາວສ້າງຊາດ, ປະຊາ ຊົນບັນດາເຜົ່າ, ຊັ້ນຄົນ, ສາສະໜາເພດໄວໃຫ້ຮັບຮູ້ເຂົ້າໃຈຕໍ່ແນວທາງຂອງພັກ-ລັດ, ຊຸກຍູ້-ຕິດຕາມການຈັດຕັ້ງປະ ຕິບັດຂະບວນການສ້າງຄອບຄົວ ແລະບ້ານສາມັກຄີປອງດອງໃນຂອບເຂດທົ່ວປະເທດ, ຊຸກຍູ້-ຕິດຕາມການເກັບກໍາ ຫາງສຽງຂອງປະຊາຊົນ ທີ່ໄດ້ຮັບຜົນກະທົບ, ອະນຸລັກຮັກສາຊຸດແຕ່ງກາຍ ຂອງບັນດາຊົນເຜົ່າ ໃນລາວໃຫ້ໄດ້ 50 ຊົນເຜົ່າ.

ຈາກນັ້ນ ບັນດາແຂວງໄດ້ຜັດປ່ຽນກັນຂື້ນຜ່ານບົດສະຫຼຸບວຽກງານຊົນເຜົ່າ ແລະແລກປ່ຽນຄໍາຄິດຄໍາເຫັນ ເພື່ອ ແລກປ່ຽນບົດຮຽນເຊິ່ງກັນ ແລະກັນຢ່າງກົງໄປກົງມາ.
ພາບ-ຂ່າວ: ພິພາພອນ