ມີເດຍລາວແຂວງຫຼວງພະບາງ ກອງປະຊຸມສະຫຼຸບວຽກງານ ປ້ອງກັນຊາດ-ປ້ອງກັນຄວາມສະຫງົບ (ປກຊ – ປກສ) ປະຈໍາປີ 2021 ແລະ ທິດທາງແຜນການປະຈໍາປີ 2022 ທົ່ວແຂວງຫຼວງພະບາງ ໄດ້ຈັດຂື້ນໃນຕອນບ່າຍຂອງວັນທີ 11 ມັງກອນ 2022 ນີ້ທີ່ສະໂມສອນຂອງກອງບັນຊາການທະຫານແຂວງ ໂດຍການເປັນປະທານ ຂອງທ່ານ ຮສ ປອ ພຸດ ສີມມາລາວົງ ກໍາມະການສູນກາງພັກ ລັດຖະມົນຕີກະຊວງສຶກສາທິການ ແລະ ກິລາ ຮອງຄະນະກໍາມະການສຶກສາອົບຮົມວຽກງານປ້ອງກັນຊາດ – ປ້ອງກັນຄວາມສະຫົງບ. ມີ ທ່ານ ບຸນເລື່ອມ ມະນີວົງ ຄະນະປະຈໍາພັກແຂວງ ຮອງເຈົ້າແຂວງຫຼວງພະບາງ ພ້ອມດ້ວຍຄະນະພັກ – ຄະນະບັນຊາສອງກອງບັນຊາການ ປກຊ – ປກສ ແຂວງ, ຕາງໜ້າກົມການທະຫານທ້ອງຖິ່ນ ແລະແຂກຖືກເຊີນຈາກບັນດາພະແນກການທີ່ກ່ຽວຂ້ອງອ້ອມຂ້າງແຂວງເຂົ້າຮ່ວມ.

ສະຫາຍ ພັນເອກ ວິລ່ຽມ ວົງທິສານ ຮັກສາການເລຂາຄະນະພັກ ຫົວໜ້າການທະຫານກອງບັນຊາການທະຫານແຂວງຫຼວງພະບາງ ໄດ້ຜ່ານບົດລາຍງານໃນການຈັດຕັ້ງປະຕິບັດວຽກງານໃນຊຸມປີຜ່ານມາແຂວງຫຼວງພະບາງ ມີໂຮງຮຽນມັດທະຍົມ ມໍປາຍທັງໝົດ 47 ແຫ່ງ, ມີໂຮງຮຽນເຕັກ – ນິກວິຊາຊີບ 1 ແຫ່ງ, ວິທະຍາໄລ 6 ແຫ່ງ ແລະ ມະຫາວິທະຍາໄລ 1 ແຫ່ງ. ຄະນະກໍາມະການສຶກສາອົບຮົມວຽກງານ ປກຊ – ປກສ ແຂວງ ໄດ້ຖືເອົາວຽກງານອົບ – ຮົມຫັດແອບປະຈໍາປີເປັນບັນຫາສໍາຄັນເພື່ອຊີ້ນໍາມອບໝາຍຄວາມຮັບຜິດຊອບເປັນຕົ້ນກອງບັນຊາການທະຫານເມືອງ, ກອງບັນຊາການ ປກສ ເມືອງ ສ້າງແຜນການຜ່ານອະນຸມັດປະທານ ປກຊ – ປກສ ເມືອງອົບຮົມໃຫ້ນັກຮຽນມໍປາຍ ມໍ 5 – 7, ພະແນກການທະຫານທ້ອງຖິ່ນໄດ້ສົມທົບກັບພະແນກສະກັດກັ້ນ ແລະ ຕ້ານອັກຄີໄພເພື່ອສ້າງແຜນການອະນຸມັດຄະນະກໍາມະການສຶກສາອົບຮົມຂັ້ນແຂວງເພື່ອອົບຮົມໃຫ້ສະຖາບັນຕ່າງໆ ໃນທົ່ວແຂວງຕາມພາລະບົດບາດ, ສິດ, ຂອບເຂດຮັບຜິດຊອບຂອງແຕ່ລະຂັ້ນ.

ວຽກງານອົບຮົມ -ຫັດແອບໄດ້ຈັດຕັ້ງປະຕິບັດຄື. ອົບຮົມການນໍາພັກ – ລັດ ເປົ້າໝາຍ 3 – 4 ຊຸດທີ 5 ໄດ້ 1 ຊຸດ ມີຈໍານວນພົນເຂົ້າຮ່ວມ 40 ສະຫາຍ, ຍິງ 5 ສະຫາຍ ກໍານົດເວລາອົບຮົມ 160 ຊົ່ວໂມງ, ອົບຮົມຫັດແອບວຽກງານສຶກສາ ປກຊ – ປກສ ໃຫ້ນັກສຶກສາໄດ້ 7 ແຫ່ງ, ມີຈໍານວນພົນເຂົ້າຮ່ວມ 2.578 ຄົນ, ຍິງ 1.182 ຄົນ, ກໍານົດເວລາອົບຮົມ 128 ຊົ່ວໂມງ, ອົບຮົມໃຫ້ໂຮງຮຽນວິທະຍາໄລເຕັກນິກວິຊາຊີບຫຼວງພະບາງ ມີຈໍານວນພົນເຂົ້າຮ່ວມ 762 ຄົນ, ຍິງ 261 ຄົນ, ວິທະຍາໄລວິທະຍາສາດສຸຂະພາບມີຈໍານວນພົນເຂົ້າຮ່ວມ 192 ຄົນ, ຍິງ 87 ຄົນ, ໂຮງຮຽນເຕັກນິກວິຊາຊີບແບບປະສົມເມືອງນໍ້າບາກ ມີຈໍານວນພົນເຂົ້າຮ່ວມ 220 ຄົນ, ຍິງ 146 ຄົນ. ວິທະຍາໄລການເງີນພາກເໜືອມີຈໍານວນພົນເຂົ້າຮ່ວມ 235 ຄົນ, ຍິງ 125 ຄົນ, ມະຫາວິທະຍາໄລສຸພານຸວົງຫຼວງພະບາງ ມີຈໍານວນພົນເຂົ້າຮ່ວມ 8.83 ຄົນ, ຍິງ 346 ຄົນ ແລະ ວິທະຍາໄລກະສິກໍາ ແລະ ປ່າໄມ້ພາກເໜືອມີຈໍານວນພົນເຂົ້າຮ່ວມອົບຮົມ 170 ຄົນ, ຍິງ 58 ຄົນ. ໄດ້ອົບຮົມຫັດແອບວຽກງານສຶກສາພື້ນຖານປ້ອງກັນຕົວໃຫ້ນັກຮຽນຊັ້ນ ມໍປາຍ ມໍ 5 – ມໍ 7 ໄດ້ 47 ແຫ່ງໃນທົ່ວແຂວງ 11 ເມືອງ 1 ນະຄອນມີຈໍານວນພົນເຂົ້າຮ່ວມ 12.503 ຄົນ, ຍິງ 5.388 ຄົນ, ກໍານົດເວລາອົບຮົມແຕ່ລະຊັ້ນຮຽນຄື. ມໍ 5, 35 ຊົ່ວໂມງ, ມໍ 6, 42 ຊົ່ວໂມງ ແລະ ມໍ 7, 32 ຊົ່ວໂມງ, ເນື້ອໃນອົບຮົມຫັດແອບແຕ່ລະເປົ້າໝາຍແມ່ນໄດ້ປະຕິບັດຕາມຫຼັກສູດການຮຽນ – ການສອນທີ່ກະຊວງໄດ້ກໍານົດໄວ້, ພ້ອມທັງຍົກໃຫ້ເຫັນດ້ານດີ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ທີ່ຈະໄດ້ສຸມໃສ່ປັບປຸງແກ້ໄຂເພື່ອເຮັດໃຫ້ວຽກງານມີປະສິດທິຜົນສູງຂື້ນ. ພ້ອມທັງວາງທາງແຜນການອົບຮົມ – ຫັດແອບປີ 2022 ຄື. ສູ້ຊົນຂໍງົບປະມານນໍາຂັ້ນເທິງລົງປະກາດແຕ່ງຕັ້ງຄະນະກໍາມະການສຶກສາອົບຮົມວຽກງານ ປກຊ – ປກສ ຂັ້ນເມືອງໃນທົ່ວແຂວງໃຫ້ສໍາເລັດ, ຂື້ນແຜນອົບຮົມຫັດແອບໃຫ້ພະນັກງານການນໍາເປົ້າໝາຍ 3 -4 ຊຸດທີ 6 ໃຫ້ໄດ້ 1 ຄັ້ງ ແລະ ຂື້ນແຜນອົບຮົມຫັດແອບໃຫ້ໂຮງຮຽນເຕັກນິກວິຊາຊີບ, ວິທະຍາໄລ, ມະຫາວິທະຍາໄລທາງພາກລັດ ແລະ ເອກະຊົນໃຫ້ໄດ້ 8 ແຫ່ງ.

ຈາກນັ້ນ ສະຫາຍ ພັນໂທ ຄໍາອຸ້ຍ ເມກສະຫັວນ ຮອງຫົວໜ້າພະແນກສຶກສາ ປກຊ ກົມການທະຫານທ້ອງຖິ່ນ ກອງເລຂາສຶກສາອົບຮົມວຽກງານ ປກຊ – ປກສ ສູນກາງໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະກໍາມະການສຶກສາອົບຮົມວຽກງານ ປກຊ – ປກສ ຂັ້ນສູນກາງນາຍົກລັດຖະມົນຕີຕົກແຕ່ງຕັ້ງ 12 ສະຫາຍ ແລະ ຂໍ້ຕົກລົງຂອງລັດຖະມົນຕີກະຊວງປ້ອງກັນປະເທດຄະນະກໍາມະການສຶກສາອົບຮົມວຽກງານ ປກຊ -ປກສ ຂັ້ນສູນກາງ ວ່າດ້ວຍການແຕ່ງຕັ້ງຄະນະກໍາມະການສຶກສາອົບຮົມວຽກງານ ປກຊ – ປກສ ຂັ້ນແຂວງຫຼວງພະບາງ 12 ສະຫາຍ.
ໂອກາດດັ່ງກ່າວນີ້ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ ກໍ່ໄດ້ມີຄໍາເຫັນຊີ້ນໍາເພີ່ມເຕີມກ່ຽວກັບບັນດາສະຫາຍທີ່ໄດ້ຖືກແຕ່ງຕັ້ງເປັນຄະນະກໍາມະການສຶກສາອົບຮົມວຽກງານ ປກຊ – ປກສ ຂັ້ນແຂວງ ຕ້ອງຖືສໍາຄັນກ່ຽວກັບວຽກງານດັ່ງກ່າວໃຫ້ກາຍເປັນໜ້າທີ່ຂອງທົ່ວປວງຊົນປ້ອງກັນຊາດ, ເຄື່ອນໄຫວຖືກຕ້ອງຕາມພາລະບົດບາດອັນດີງາມ ແລະ ມີຄວາມຮັບຜິດຊອບສູງຕໍ່ໜ້າທີ່ວຽກງານທີ່ໄດ້ຮັບການມອບໝາຍ.
ຕອນທ້າຍກອງປະຊຸມຍັງໄດ້ຮັບຟັງການໂອ້ລົມ ແລະ ເນັ້ນໜັກດ້ວຍຫຼາຍບັນຫາທີ່ສໍໍາຄັນຈາກ ທ່ານ ຮສ ປອ ພຸດ ສີມມາລາວົງ ກໍາມະການສູນກາງພັກ ລັດຖະມົນຕີກະຊວງສຶກສາທິການ ແລະ ກິລາ ຮອງຄະນະກໍາມະການສຶກສາອົບຮົມວຽກງານ ປກຊ – ປກສ ສູນກາງຕື່ມອີກ.
ໂດຍ: ໄຊຍະສອນ ລັດຕະນະວົງ.