ມີເດຍລາວແຂວງວຽງຈັນ ໃນວັນທີ 12 ມັງກອນ 2022 ນີ້ ທີ່ສະໂມສອນໃຫຍ່ຫ້ອງວ່າການແຂວງວຽງຈັນ ໄດ້ມີກອງປະຊຸມສ້າງແຜນກຳນົດພະນັກງານນຳພາ-ຄຸ້ມຄອງ ຫ້ອງວ່າການແຂວງ ໂດຍການເປັນກຽດເຂົ້າຮ່ວມຂອງ ທ່ານ ສົມດີ ແກ້ວດາລາວິນ ຄະນະປະຈຳພັກແຂວງ, ປະທານກວດກາພັກ, ຫົວໜ້າອົງການກວດກາລັດແຂວງວຽງຈັນ, ທ່ານ ປອ ສີວຽງໄຊ ອໍລະບູນ ກຳມະການພັກແຂວງ, ຫົວໜ້າຫ້ອງວ່າການແຂວງວຽງຈັນ, ມີຄະນະຮັບຜິດຊອບການສ້າງແຜນກຳນົດພະນັກງານນຳພາ-ຄຸ້ມຄອງຂັ້ນແຂວງ, ພ້ອມດ້ວຍພະນັກງານຫ້ອງວ່າການ ແລະ ຫໍ່ພິພິດຕະພັນແຂວງເຂົ້າຮ່ວມ.

ຈຸດປະສົງ ຂອງກອງປະຊຸມຄັ້ງນີ້ ເພື່ອເປັນການສ້າງແຜນກໍານົດພະນັກງານນໍາພາ-ຄຸ້ມຄອງຄາດຄະເນ ເປົ້າໝາຍພະນັກງານທີ່ຈະຈັດວາງເຂົ້າໃນຕໍາແໜ່ງນໍາພາ-ຄຸ້ມຄອງຫ້ອງວ່າການ, ແນໃສ່ຮັບປະກັນລັກສະນະສືບທອດປ່ຽນແທນຕໍ່ເນື່ອງໃນສະເພາະໜ້າ ແລະ ຍາວນານ.
ໃນໂອກາດນີ້ ທ່ານ ສົມດີ ແກ້ວດາລາວິນ ຄະນະປະຈຳພັກແຂວງ, ປະທານກວດກາພັກ, ຫົວໜ້າອົງການກວດກາລັດແຂວງວຽງຈັນ ໄດ້ຜ່ານມະຕິຂອງກົມການເມືອງສູກາງພັກສະບັບເລກທີ 032/ກມສພ ວ່າດ້ວຍວຽກງານສ້າງແຜນກຳນົດພະນັກງານນຳພາ-ຄຸ້ມຄອງ ເພື່ອໃຫ້ບັນດາພະນັກງານ-ລັດຖະກອນ ກໍຄືສະມາຊິກພັກ ໄດ້ຮັບຮູ້ ແລະ ເຂົ້າໃຈ ຕໍ່ວຽກງານດັ່ງກ່າວ.

ທ່ານ ຄຳປອງ ຄຳສີດາ ເລຂາໜ່ວຍພັກ, ຮອງຫົວໜ້າຄະນະຈັດຕັ້ງແຂວງ ກໍ່ໄດ້ຜ່ານມະຕິຂອງກົມການເມືອງສູກາງພັກສະບັບເລກທີ 030/ກມສພ ວ່າດ້ວຍມາດຕະຖານຂອງພະນັກງານນຳພາ-ຄຸ້ມຄອງ ແລະ ໄດ້ແນະນຳວິທີການທາບທາມບຸກຄະລາກອນເຂົ້າແຜນກຳນົດພະນັກງານນຳພາ-ຄຸ້ມຄອງ ໂດຍແບ່ງອອກເປັນ 3 ຮອບຄື: ຮອບທີ I ເຊິ່ງມີພະນັກງານລັດຖະກອນພາຍໃນຫ້ອງວ່າຫານແຂວງທັງໝົດ, ຮອບທີ2: ເຊິ່ງມີສະມາຊິກພັກສົມບູນພາຍໃນໜ່ວຍພັກຫ້ອງວ່າການແຂວງ ແລະ ຮອບທີ 3: ເຊິ່ງມີຄະນະໜ່ວຍພັກ ຫ້ອງວ່າການແຂວງວຽງຈັນ.

ທັງນີ້, ກໍເພື່ອເປັນການເລືອກເຟັ້ນພະນັກງານນໍາພາ-ຄຸ້ມຄອງຕອບສະໜອງດ້ານຈໍານວນ, ຄຸນນະພາບໂຄງປະກອບບຸກຄະລາກອນໃຫ້ຄົບຕາມຈໍານວນ ແລະ ຕາມຄວາມຮຽກ ຮ້ອງຕ້ອງ ການຂອງໜ້າທີ່ວຽກງານໃນລະບົບການເມືອງ, ເພື່ອຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ການຫັນເປັນອຸດສາຫະກໍາ ແລະ ທັນສະໄໝເທື່ອລະກ້າວ, ແນໃສ່ປົກປັກຮັກສາປະເທດຊາດຕາມຈຸດໝາຍສັງຄົມນິຍົມ.
ພາບ-ຂ່າວ : ບຸນມາ ແກ້ວບຸດດາ.