ມີເດຍຍລາວແຂວງສາລະວັນ ທ່ານ ໂສພາ ຈັນທະວົງ ຫົວໜ້າຫ້ອງການຊາວໜຸ່ມແຂວງ ຜູ້ຊີ້ນໍາການເຄື່ອນໄຫວກິດຈະກໍາໃນຄັ້ງນີ້ ໄດ້ສຳພາດ ວ່າ: ເພື່ອເປັນການສ້າງຂະບວນການ, ອອກແຮງງານຂ່ຳນັບຮັບຕ້ອນວັນສໍາຄັນຕ່າງໆຂອງພັກ-ຂອງຊາດ, ກໍ່ຄືວັນສ້າງຕັ້ງກອງທັບປະຊາຊົນລາວຄົບຮອບ 73 ປີ ( 20 ມັງກອນ 1949 – 20 ມັງກອນ 2022) ທີ່ຈະມາເຖີງໃນໃນມໍ່ໆນີ້ ໃຫ້ມີບັນຍາກາດຟົດຟື້ນ, ໂດຍສະເພາະການຮັກສາຄວາມສວຍງາມ, ຄວາມສະອາດຂອບເຂດເທສະບານເມືອງ ກໍ່ຄືແຂວງສາລະວັນ.

ການອອກແຮງງານອະນາໄມສະຖານທີ່ຕ່າງໆຕາມແຄມທາງ, ໜ້າສຳນັກງານຕ່າງໆ ມີ 4 ຈຸດຄື: ຈຸດທີ1 ເລີ່ມແຕ່ທາງເຂົ້າເດີ່ນບິນ ຫາ 4 ແຍກຂົວຂ້າມເຊໂດນ, ຈຸດທີ2: ແຕ່ແຍກຫ້ອງການຊາວໜຸ່ມ ຫາ ບ້ານພັກສາຍເຊ, ຈຸດທີ3: ເລີ່ມແຕ່ແຍກຫ້ອງວ່າການແຂວງ ຫາ ສູນການສຶກສານອກໂຮງຮຽນ ແລະ ຈຸດທີ4: ເລີ່ມແຕ່ສູນການສຶກສານອກໂຮງຮຽນ ຫາ ສີ່ແຍກໄຟແດງ, ເຊີ່ງໄດ້ມີການນຳພາກັນອະນາໄມ, ເກັບຂີ້ເຫຍື່ອ, ປັດກວາດຕາມຟຸດບາດສອງຟາກທາງ, ຕາມໜ້າເຮືອນຂອງພໍ່ແມ່ປະຊາຊົນລຽບຕາມສາຍທາງ, ສຳນັກງານຫ້ອງການ ບ່ອນທີ່ຮົກເຮື້ອ ແລະ ສະຖານທີ່ຕ່າງໆ. ເຊີ່ງກິດຈະກຳດັ່ງກ່າວ ໄດ້ຈັດຂຶ້ນເລື້ອຍໆ ເພື່ອຮັກສາຄວາມສະອາດຈົບງາມ ແລະ ຂ່ຳນັບຮັບຕ້ອນວັນສຳຄັນຕ່າງໆ.

ຂະບວນດັ່ງກ່າວ ໄດ້ຈັດຂຶ້ນໃນວັນທີ 14 ມັງກອນ 2022, ນໍາພາໂດຍ ທ່ານ ໂສພາ ຈັນທະວົງ ຫົວໜ້າຫ້ອງການຊາວໜຸ່ມແຂວງສາລະວັນ, ມີບັນດາທ່ານເລຂາໜ່ວຍຮາກຖານຊາວໜຸ່ມອ້ອມຂ້າງແຂວງ, ສະມາຊິກຊາວໜຸ່ມ ເຂົ້າຮ່ວມຢ່າງເປັນຂະບວນ.

ໂດຍ: ກິນດາວັນ ອ້ວນນາຄູ