ວັນທີ 20 ກັນຍາ 2019 ຮາກຖານຊາວໜຸ່ມພະແນກ ຖວທ ໄດ້ນຳເຄື່ອງລົງມອບໃຫ້ແກ່ໂຮງຮຽນ ມສ ຕານເທິງ ເມືອງໜອງບົກ ເພື່ອຊຸກຍູ້ຊ່ວຍເຫຼືອແກ່ໂຮງຮຽນທີ່ຖືກຜົນກະທົບຈາກພາຍຸແລະ ເພື່ອເປັນກຳລັງແຮງໃຈ ໃຫ້ພະນັກງານຄູ-ອາຈານ ກໍ່ຄືນ້ອງນັກຮຽນໃນໂຮງຮຽນດັ່ງກ່າວມີຄວາມຫ້າວຫັນປະຕິບັດໜ້າທີ່ ວຽກງານ ການຮຽນ-ການສອນ ແລະ ສອນດີ-ຮຽນເກັ່ງຕາມຄຳຂວັນທີ່ທາງກະຊວງສຶກສາທິການ ແລະ ກິລາວາງອອກ ໂດຍເຄື່ອງທີ່ ໄດ້ນຳລົງມອບຄັ້ງນີ້ປະກອບມີ: ຄອມພິວເຕີຕັ້ງໂຕະ 1 ຊຸດ ແລະ ເຄື່ອງກິລາຈຳນວນ 15 ຊຸດ ລວມມີມູນຄ່າທັງໝົດ 2.800.000 ກີບ.

ເປັນກຽດມອບໂດຍທ່ານ ລຸຍ ຄຳວົງສາ ເລຂາຮາກຖາຊາວໜຸ່ມ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງຄຳມ່ວນ ກ່າວຮັບໂດຍທ່ານ ບຸນຫອມ ແກ້ວມະນີ ຜູ້ອຳນວຍການໂຮງຮຽນ ມສ ຕານເທິງ ໂດຍມີທ່ານ ສົມສັກດາ ແກ້ວມະນີ ຄະນະປະຈຳຄະນະບໍລິຫານງານຊາວໜຸ່ມ ແຂວງຄຳມ່ວນ, ມີຄະນະຮາກຖານ, ສະມາຊິກຊາວໜຸ່ມ, ພະນັກງານຄູ-ອາຈານ ແລະ ນ້ອງນັກຮຽນເຂົ້າຮ່ວມເປັນ ສັກຂີພິຍານ. ໂອກາດດຽວກັນທ່ານ ບຸນຫອມ ແກ້ວມະນີ ຍັງໄດ້ກ່າວຂອບໃຈມາຍັງຄະນະຮາກຖານຊາວໜຸ່ມພະແນກ ຖວທ ແຂວງ ທີ່ໄດ້ນຳເຄື່ອງມາມອບ ພ້ອມນັ້ນທາງໂຮງຮຽນຍັງໄດ້ມອບໃບກຽດຕິຄຸນໃຫ້ແກ່ຮາກຖານຊາວໜຸ່ມ ພະແນກ ຖວທ ແຂວງ ຕໍ່ຜົນງານດັ່ງກ່າວນຳອີກ.