ໝາກໄມ້ຖືວ່າມີຄວາມຈຳເປັນ ແລະ ສຳຄັນຫຼາຍກັບຮ່າງກາຍ ສະນັ້ນ ໝາກໄມ້ຈີ່ງຈັດຢູ່ໃນປະເພດ ອາຫານຫຼັກ 5 ໝູ່ ຊື່ງໝາກໄມ້ແຕ່ລະຊະນິດມີຄວາມສຳຄັນ ຊ່ວຍລ້າງສານພິດອອກຈາກຮ່າງກາຍ ສາມາດຂັບຖ່າຍໄດ້ດີ ມື້ນີ້ເຮົາຈີ່ງໄດ້ນຳສະເໜີສາລະດີໆ ກ່ຽວກັບໝາກໄມ້ມາຝາກທ່ານ ເພື່ອວ່າທ່ານໃດທີ່ບໍ່ມັກກິນໝາກໄມ້ ຈະໄດ້ສົນໃຈຫັນມາມັກກິນໝາກໄມ້.

ມັງຄຸດ

ມີສານ Xanthone ໃນເປືອກມັງຄຸດມີຄຸນສົມບັດໃນການຕໍ່ຕ້ານສານອະນຸມູນອິດສະລະ ຊື່ງມີຜົນຢຸດການຂະຫຍາຍໂຕຂອງເຊລມະເຮັງຕ່າງໆ ນອກຈາກນີ້ໃນເປືອກມັງຄຸດຍັງມີສານແທນນິນ ທີ່ຊ່ວຍໃນການຮັກສາບາດແຜ ແລະ ຢຸດການຂະຫຍາຍໂຕຂອງແບັດທີເລຍໄດ້ນຳອີກ.

ໝາກມ່ວງ

ຊ່ວຍລະລາຍຂີ້ກະເທີ ແກ້ອາການປວດຮາກ ແລະ ຊ່ວຍໃຫ້ເລືອດລົມໄຫຼວຽນດີ ແລະ ປະຈຳເດືອນຂອງທ່ານຍິງມາເປັນປົກກະຕິ ຫາກກິນໝາກມ່ວງສົດເປັນປະຈຳແລ້ວກໍ່ຈະຊ່ວຍເຮັດໃຫ້ອາການໄອ ຫອບຫືດ ຂີ້ກະເທີ ຫຼື ມີເລືອດອອກຕາມແຂ້ວສາມາດຫຼຸດລົງໄດ້.

ສະຕໍເບີຣີ້

ມີວິຕາມິນຊີ ຢູ່ເປັນຈຳນວນຫຼາຍ ມີສັບພະຄຸນຊ່ວຍຕ້ານສານອະນຸມູນອິດສະລະ ຊ່ວຍປ້ອງກັນການເກີດມະເຮັງ ໂລກຫຼອດເລືອດອຸດຕັນ ເປັນຫັວດ ແລະ ອາການພູມແພ້ ຊ່ວຍເຮັດໃຫ້ລະບົບການດູດຊືມອາຫານໃນຮ່າງກາຍໄດ້ດີ ຫຼຸດອາການຖອກທ້ອງ ຊ່ວຍໃຫ້ຈະເລີນອາຫານ.

ໝາກນ໋ອດ

ມີສັບພະຄຸນຊ່ວຍຫຼຸດຄວາມດັນຂອງເລືອດ ຫຼຸດໄຂມັນໃນເສັ້ນເລືອດ ເສີມສ້າງພູມຄຸ້ມກັນໃຫ້ກັບຮ່າງກາຍ ແກ້ອາການຮ້ອນໃນ ແລະ ປ້ອງກັນໄຂ້ຫັວດເປັນຢ່າງດີ.

ໝາກມັງກອນ

ມີສານອາຫານຫຼາຍຊະນິດ ເຊັ່ນ: ໂພແທັສຊຽມ ຟອສຟໍຣັສ ແຄລຊຽມ ແມັກນີຊຽມ ວິຕາມິນຊີ ແລະ ມີສັບພະຄຸນຊ່ວຍຫຼຸດຄໍເລສເຕີລໍ ປ້ອງກັນການອຸດຕັນຂອງຫຼອດເລືອດໃນຫົວໃຈ ຫຼຸດຄວາມດັນ ຄວບຄຸມນໍ້າໜັກ ແກ້ອາການທ້ອງເບັງ ປ້ອງກັນມະເຮັງລຳໃສ້ໃຫຍ່ ແລະ ເຮັດໃຫ້ຜິວສົດຊື່ນ.

ອະໂວກາໂດ

ອະໂວກາໂດມີສານກູລຕາໄທໂອນ ສາມາດຊ່ວຍຫຼຸດຄໍເລສເຕີລໍ ແລະ ປ້ອງກັນຫຼອດເລືອດອຸດຕັນ ເຮັດໃຫ້ເລືອດໄຫຼວຽນດີ ພ້ອມທັງຊ່ວຍຈັບສານພິດທີ່ເປັນຕົວກໍ່ໃຫ້ເກີດໂລກມະເຮັງໄດ້ 30% ແລະ ຊ່ວຍໃຫ້ຕັບທຳລາຍຂອງເສຍປະເພດສານເຄມີ ແລະ ໂລຫະໜັກຕ່າງໆ ການກິນອະໂວກາໂດສາມາດກິນໄດ້ສົດໆ ຫຼື ນຳມາດັດແປງເປັນສະລັດອະໂວກາໂດ ເພື່ອປ່ຽນລົດຊາດໃນການກິນໄດ້ດີອີກທາງໜື່ງ.

ໝາກໂມ

ສາມາດເຮັດໃຫ້ຖ່າຍໄດ້ດີຂື້ນ ດັ່ງນັ້ນມັນຈື່ງຊ່ວຍຟອກລ້າງໝາກໄຂ່ຫຼັງໄດ້ເປັນຢ່າງດີ ນອກຈາກນີ້ຍັງຊ່ວຍຮັກສາບາດແຜໃນກະເພາະອາຫານ ຫຼຸດຄວາມດັນໃນເລືອດ ແລະ ເຮັດໃຫ້ສະບາຍທ້ອງ ໝາກໂມເປັນໝາກໄມ້ຊະນິດມີຄວາມຊຸ່ມນໍ້າ ມີຄວາມເຢັນ ລົດຫວານ ກິນເປັນໝາກໄມ້ແກ້ອາການຮ້ອນໃນໄດ້ ຫຼື ດື່ມເປັນນໍ້າໝາກໄມ້ເພື່ອສຸຂະພາບກໍ່ໄດ້ເຊັ່ນກັນ ນໍ້າໝາກໂມຍັງເຮັດໃຫ້ຮ່າງກາຍຂັບຖ່າຍໄດ້ດີ ສະນັ້ນ ຈີ່ງມີຜົນຊ່ວຍລ້າງໝາກໄຂ່ຫຼັງ ລ້າງກະເພາະ ການຂັບຖ່າຍ ແລະ ບໍ່ເຮັດໃຫ້ຮ່າງກາຍມີການສະສົມກົດຍູຣິດ ຊື່ງເປັນສາເຫດຂອງການເກີດໂລກໄຂຂໍ້ ໂລກເກົາ.

ໝາກກ້ຽງ

ມີວິຕາມິນເອ ແລະ ຊີ ມີສັບພະຄຸນຊ່ວຍຕ້ານສານອະນຸມູນອິດສະລະ ຊ່ວຍຢຸດການຂະຫຍາຍໂຕຂອງເຊລມະເຮັງ ແລະ ເຮັດໃຫ້ຜິວພັນມີຄວາມສົດຊື່ນນຳອີກ.

ໝາກສີດາ

ມີວິຕາມິນຊີ ທີ່ມີສັບພະຄຸນບໍ່ໃຫ້ເກີດມະເຮັງ ຊ່ວຍສ້າງ ແລະ ບຳລຸງບາດແຜໃຫ້ດີໄວ ຊ່ວຍກະຕຸ້ນການເຮັດວຽກຂອງເມັດເລືອດຂາວ ຊ່ວຍຫຼຸດສານພິດໃນຮ່າງກາຍ ຖ້າກິນເປັນປະຈຳຈະເຮັດໃຫ້ຜິວສົດໃສ.

ໝາກຫຸ່ງ

ມີສັບພະຄຸນປ້ອງກັນການເກີດເຊລມະເຮັງໃນເມັດເລືອດຂາວໄດ້ເປັນຢ່າງດີ ແລະ ຍັງຊ່ວຍບຳລຸງອະໄວຍະວະຕ່າງໆ ໃນຮ່າງກາຍ ເຊັ່ນ: ມ້າມ ກະເພາະອາຫານ ລະບົບຍ່ອຍອາຫານ ແລະ  ຍັງຊ່ວຍເຮັດໃຫ້ຜິວດີນຳອີກ.

ກ້ວຍ

ມີວິຕາມິນບີສູງ ມີສັບພະຄຸນຊ່ວຍຫຼຸດຄວາມຕືງຄຽດ ຄວາມອິດເມື່ອຍ ເຮັດໃຫ້ຮ່າງກາຍຮູ້ສຶກຜ່ອນຄາຍ ອາລົມດີ ກ້ວຍຫອມຈະມີເສັ້ນໄຍອາຫານຫຼາຍເຮັດໃຫ້ລະບົບຂັບຖ່າຍໃນຮ່າງກາຍເຮັດວຽກໄດ້ດີ ແລະ ຍັງຊ່ວຍໃນການຍ່ອຍອາຫານໄດ້ດີເຊັ່ນກັນ.

ລຳໄຍ

ເປັນໝາກໄມ້ທີ່ມີສັບພະຄຸນຊ່ວຍໃນການບຳລຸງຫົວໃຈ ລະບົບປະສາດ ແລະ ລະບົບຍ່ອຍອາຫານ ນອກຈາກນີ້ຍັງບຳລຸງຮ່າງກາຍແມ່ຍິງຫຼັງເກີດລູກ.

ອະງຸ່ນ

ເປັນສານສະເພາະຟອກລ້າງຜິວໜັງ ຕັບ ລຳໄສ້ ແລະ ໝາກໄຂ່ຫຼັງ ໃນຮ່າງກາຍອະງຸ່ນມີພະລັງງານສູງ ອຸດົມດ້ວຍເກືອແຮ່ ດັ່ງນັ້ນ ຈື່ງຊ່ວຍບຳລຸງເລືອດ ແລະ ຊ່ວຍສ້າງເຊລໃນຮ່າງກາຍ ການກິນອະງຸ່ນເປັນປະຈຳຈະຊ່ວຍໃຫ້ບຳລຸງສະໝອງ ບຳລຸງຫົວໃຈ ຂັບຖ່າຍໄດ້ດີ ບຳລຸງຮ່າງກາຍ ຄົນທີ່ຮ່າງກາຍຈ່ອຍແຫ້ງ ແກ່ກ່ອນໄວ ບໍ່ມີແຮງ  ແລະ ສາມາດເຮັດໃຫ້ຮ່າງກາຍຄ່ອຍໆ ແຂງແຮງຂື້ນໄດ້.

ໝາກໂປມ

ໝາກໄມ້ທີ່ດີທີ່ສຸດ ສຳລັບການທຳລາຍຂອງເສຍອອກຈາກຮ່າງກາຍ ໝາກໂປມມີສານສຳຄັນຫຼາຍຊະນິດ ເຊັ່ນ: ເບຕາແຄໂລທີນ ວິຕາມິນຊີ ແລະ ເສັ້ນໄຍໄຟເບີຊະນິດລະລາຍນໍ້າທີ່ຊື່ເພດທີນ ຊື່ງສານນີ້ຈະຊ່ວຍທຳລາຍສານພິດ ປ້ອງກັນໂປຣຕີນໃນລຳໄສ້ທີ່ກໍ່ເຮັດໃຫ້ເກີດການບູດເນົ່າ ຍັງເຮັດຄວາມສະອາດລຳໄສ້ ຊ່ວຍໃຫ້ຕັບ ແລະ ລະບົບຍ່ອຍອາຫານເຮັດວຽກໄດ້ດີ ການກິນໝາກໂປມຄວນລ້າງໃຫ້ສະອາດ ແລະ ຖ້າປອກເປືອກໝາກໂປມຈະເຮັດໃຫ້ເສຍຄຸນຄ່າທາງໂພຊະນາການ.

ລີ້ນຈີ່

ມີວິຕາມິນບີ 1 ແລະ ບີ 2 ແລະ ວິຕາມິນຊີ ມີສັບພະຄຸນຊ່ວຍປ້ອງກັນໂລກຊາ ປ້ອງກັນໄຂມັນອຸດຕັນໃນເສັ້ນເລືອດ ຊ່ວຍຍ່ອຍອາຫານ ຊ່ວຍບຳລຸງມ້າມ ບຳລຸງອະໄວຍະວະພາຍໃນ ບຳລຸງລະບົບປະສາດ ແລະ ຍັງແກ້ອາການທ້ອງອືດໄດ້ດີນຳອີກ.

ໝາກນັດ

ມີປະລິມານຂອງວິຕາມິນ ແຮ່ທາດ ແລະ ເສັ້ນໄຍໄຟເບີທີ່ມີຢູ່ຫຼາຍ ມີສັບພະຄຸນຊ່ວຍຍ່ອຍອາຫານ ສາມາດດູດຊືມອາຫານໃນຮ່າງກາຍໄດ້ດີ ຫຼຸດຄວາມຮ້ອນໃນຮ່າງກາຍ ແລະ ແກ້ອາການຮ້ອນໃນ ຫາກກິນໝາກນັດເປັນປະຈຳຈະຊ່ວຍຫຼຸດຄວາມສ່ຽງຂອງການເປັນໝາກໄຂ່ຫຼັງອັກເສບ ແລະ ຄວາມດັນເລືອດສູງ.