ໃນໂອກາດວັນແພດລາວ 18 ມິຖຸນາ ທີ່ໝູນວຽນມາຮອດອີກວາລະໜື່ງ (18 ມິຖຸນາ 1965 – 18 ມິຖຸນາ 2021) ທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ໄດ້ມີຄຳເຫັນສຳຄັນກ່ຽວກັບວັນດັ່ງກ່າວ ເຊີ່ງມີບາງຕອນທ່ານກ່າວວ່າ: “ສະເຫຼີມສະຫຼອງວັນແພດລາວ 18 ມິຖຸນາ ຍັງເປັນການປູກຈິດສຳນຶກໃຫ້ແກ່ພະນັກງານແພດໝໍ, ພະຍາບານ, ພະນັກງານສາທາລະນະສຸກລາວ ຮູ້ສືບທອດຮໍ່າຮຽນເອົາແບບຢ່າງອັນດີງາມຂອງແພດໝໍ, ພະນັກງານສາທາລະນະສຸກຮຸ່ນກ່ອນ, ອອກແຮງງານຝຶກຝົນຫຼໍ່ຫຼອມສ້າງຕົນເອງໃຫ້ພຽບພ້ອມໄປດ້ວຍຄຸນສົມບັດສິນທຳປະຕິວັດ ຈັນຍາທຳວິຊາຊີບ ແລະ ຄວາມຊຳນານງານດ້ານວິຊາສະເພາະເພື່ອກາຍເປັນແພດແຫ່ງຊາດ ແລະ ແພດປະຊາຊົນຢ່າງສົມກຽດສັກສີ ເປັນນັກຮົບເສື້ອຂາວປະຕິວັດຂອງພັກ”.

ໃນພຶດຕິກຳຕົວຈີງ ໂດຍສະເພາະກໍ່ແມ່ນໃນການແຜ່ລະບາດຂອງພະຍາດໂຄວິດ-19 ຮອບສອງຢູ່ປະເທດເຮົາໃຜກໍ່ຍອມຮັບ ແລະ ຍ້ອງຍໍສັນລະເສີນວົງການແພດລາວພວກເຮົາໃນການປີ່ນປົວກອບກູ້ເອົາຊີວິດຜູ້ຕິດເຊື້ອໄດ້ຫາຍດີເປັນຈຳນວນຫຼາຍ ເຖີງແມ່ນມີຜູ້ເສຍຊີວິດກໍ່ແມ່ນຈຳນວນໜ້ອຍ; ສະແດງວ່າຄວາມຊຳນານງານດ້ານວິຊາສະເພາະການປີ່ນປົວຕິດອັນດັບສາກົນ ຫຼື ວ່າລະດັບໂລກ.

ແຕ່ກໍ່ເປັນໜ້າຄິດຫງຳທີ່ຫາງສຽງສັງຄົມ ໂດຍສະເພາະສື່ສັງຄົມອອນລາຍ ຕັ້ງບັນຫາຂື້ນເລື່ອງປະກົດການຫຍໍ້ທໍ້ບາງກໍລະນີໃນຂະບວນການສັກວັກຊິນ ໂດຍສະເພາະຢູ່ນະຄອນຫຼວງວຽງຈັນ ເຊັ່ນວ່າ: ການອຳນວຍຄວາມສະດວກໃຫ້ພີ່ນ້ອງປ້ອງປາຍ; ຄົນໃກ້ຊິດເຂົ້າຮັບການສັກວັກຊິນ ຫຼື ມີການຮັບສິນນໍ້າໃຈ ເພື່ອໃຫ້ໄດ້ສັກວັກຊິນບາງຊະນິດທີ່ບໍ່ຢູ່ໃນກຸ່ມເປົ້າໝາຍ ສະນັ້ນ ເພື່ອເປັນການຮັກສາໄວ້ເຊີ່ງຈັນຍາທຳວິຊາຊີບຂອງແພດລາວ ຕ້ອງໄດ້ມີການກວດກາຢ່າງຮັດກຸມຄືນທັງໝົດ ແລະ ອອກມາຊີ້ແຈງ ແລະ ຢັ້ງຢືນເຖີງຄວາມປອດໃສ-ຂາວສະອາດ ຂອງນັກຮົບເສື້ອຂາວປະຕິວັດຂອງພັກ.

ຂໍເປັນກຳລັງໃຈໃຫ້ແພດລາວສູ້ໆ ຕີຖອຍຄຳກ່າວຫາຂອງສື່ອອນລາຍ!.

ທິດດີ