ສະມາຄົມນັກຂ່າວແຫ່ງ ສປປ ລາວ(ສຂລ) ໄດ້ຈັດກອງປະຊຸມທົບທວນຜົນການຈັດຕັ້ງປະຕິບັດວຽກງານໃນໄລຍະຜ່ານມາ ແລະປຶກສາຫາລືແຜນວຽກ ທີ່ຈະດໍາເນີນງານໃນໜ້າ ຊຶ່ງຈັດຂຶ້ນໃນວັນທີ 19 ມິຖຸນາ 2021 ທີ່ນະຄອນຫຼວງວຽງຈັນ ໂດຍການໃຫ້ກຽດເປັນປະທານຂອງທ່ານ ສະຫວັນຄອນ ຣາຊມຸນຕີ ອະດີດຮອງລັດຖະມົນຕີ ກະຊວງຖະແຫຼງຂ່າວ, ວັດທະນາທໍາ ແລະທ່ອງທ່ຽວ, ປະທານ ສຂລ; ພ້ອມນີ້ ກໍ່ມີຄະນະບໍລິຫານງານ ສຂລ ຈໍານວນໜຶ່ງ ແລະເລຂາທິການ ສຂລ ເຂົ້າຮ່ວມ.

ການປະຊຸມຄັ້ງນີ້ ໄດ້ຈັດຂຶ້ນຢ່າງລຽບງ່າຍ ບົນຈິດໃຈຮັກສາສຸຂະພາບ, ມິດຕະພາບ ແລະປະຢັດເວລາ ໂດຍຜູ້ທີ່ເຂົ້າຮ່ວມໄດ້ສັງລວມເອົາໝາກຜົນແຫ່ງການເຄື່ອນໄຫວທີ່ພົ້ນເດັ່ນໃນຫຼາຍດ້ານ ເປັນຕົ້ນໄດ້ຈັດການຝຶກອົບຮົມ, ຖະແຫຼງຂ່າວ, ພົບປະກັບພາກລັດ-ພາກເອກະຊົນ, ເຂົ້າຮ່ວມໂຄງການ, ສ້າງກິດຈະກໍາຕ່າງໆ, ທັດສະນະສຶກສາຢຸ່ພາຍໃນ ແລະຕ່າງປະເທດ, ການຮ່ວມມືກັບອົງການຂ່າວ-ສະມາຄົມນັກຂ່າວຂອງບັນດາປະເທດເພື່ອນມິດ ບົນແນວທາງການຕ່າງປະເທດຂອງພັກ ແລະລັດຖະບານ ແລະບັນຫາອື່ນໆ ທີ່ຕິດພັນກັບພາລະບົດບາດໜ້າທີ່ຂອງ ສຂລ.

ພ້ອມນີ້ທີ່ປະຊຸມຍັງຍົກໃຫ້ເຫັນຂໍ້ຄົງຄ້າງຢ່າງພາວະວິໃສທີ່ຈະຕ້ອງຮັບການແກ້ໄຂຢ່າງຕັ້ງໜ້າ ຊຶ່ງກ່ອນອື່ນແມ່ນຄວາມສາມັກຄີພາຍໃນຄະນະນໍາ ສຂລ ທີ່ເປັນໃຈກາງໃນການຈັດຕັ້ງປະຕິບັດແນວທາງຂອງຂັ້ນເທິງ ກໍ່ຄືແຜນງານຂອງຕົນ, ພ້ອມນັ້ນ ກໍ່ຈະຕ້ອງເຮັດວຽກຢ່າງຈິງຈັງ ແລະຈິງໃຈ, ກ້າເສຍສະຫຼະເວລາ, ເຫື່ອແຮງ ແລະທຶນຮອນຈໍານວນໜຶ່ງ ເພື່ອໃຫ້ບັນລຸຄາດໝາຍສູ້ຊົນ; ໂດຍສະເພາະໃນຜ່ານມາ, ຍັງມີຫຼາຍບັນຫາທີ່ບໍ່ທັນໄດ້ຮັບການແກ້ໄຂຢ່າງເປັນຮູບປະທໍາ ເປັນຕົ້ນແມ່ນຮ່າງດໍາລັດ ວ່າດ້ວຍສະມາຄົມນັກຂ່າວແຫ່ງ ສປປ ລາວ, ກ່ຽວກັບນາມມະຍົດ,​ການຍ້ອງຍໍອົງການ/ບຸກຄົນ ທີ່ມີຜົນງານດີເດັ່ນ ແລະອື່ນໆ ຍັງບໍ່ໄດ້ຮັບການຈັດຕັ້ງປະຕິບັດ ອັນເນື່ອງມາຈາກມີຫຼາຍຂັ້ນຕອນ ແລະມີບາງຂັ້ນກໍ່ບໍ່ທັນເຫັນແຈ້ງພາລະບົດບາດໜ້າທີ່ຂອງ ສຂລ ເທົ່າທີ່ຄວນ.

ທ່ານປະທານ ສຂລ ສະຫວັນຄອນ ຣາຊມຸນຕີ ໄດ້ມອບໝາຍໜ້າວຽກອັນລະອຽດໃຫ້ແກ່ບັນດາສະຫາຍຄະນະບໍລິຫານງານ ສຂລ ໃນນີ້ບັນຫາສໍາຄັນແມ່ນການກະກຽມຄວາມພ້ອມຮອບດ້ານໃຫ້ແກ່ກອງປະຊຸມ ສຂລ ໃນທົ່ວປະເທດ ທີ່ຈະສະເໜີຜ່ານຂັ້ນເທິງພິຈາລະນາເພື່ອຈະເປີດຂຶ້ນໃນຕໍ່ໜ້າ; ຂະນະດຽວກັນກໍ່ກະກຽມຮ່າງລາຍງານການເມືອງ-ແຜນການດໍາເນີນງານໃນຕໍ່ໜ້າ, ເລືອກເຟັ້ນບຸກຄະລາກອນທີ່ຈະສະໝັກເຂົ້າໃນໂຄງປະກອບຄະນະບໍລິຫານງານຊຸດໃໝ່; ​ເພີ່ມການພົວພັນຮ່ວມມືລະຫວ່າງພະນັກງານ, ສຂລ ກັບສະມາຄົມນັກຂ່າວບັນດາປະເທດເພື່ອນມິດ ແລະປະເທດໃກ້ຄຽງລວມທັງອາຊຽນແລະສາກົນຕາມການຕົກລົງຂອງຂັ້ນເທິງ; ນອກນີ້ ຍັງຈະຊອກຫາແຫຼ່ງທຶນ, ການສ້າງກິດຈະກໍາໃນວັນສໍາຄັນຕ່າງໆ, ການຈັດຝຶກອົບຮົມ…ພາຍຫຼັງບໍ່ມີພະຍາດໂຄວິດ; ທ່ານປະທານ ສຂລຍັງເນັ້ນໃຫ້ເລຂາທິການ ສຂລປະສານກັບພາກສ່ວນກ່ຽວຂ້ອງ ແລະຂໍທິດຊີ້ນໍາຈາກຂັ້ນເທິງ ເພື່ອເຮັດໃຫ້ດໍາລັດ ວ່າດ້ວຍສະມາຄົມນັກຂ່າວແຫ່ງ ສປປ ລາວ, ນາມມະຍົດ, ​ການຍ້ອງຍໍຮັບການຈັດຕັ້ງປະຕິບັດຖືກຕ້ອງ, ຖືກທິດ ແລະທັນເວລາ ເພື່ອຮັບປະກັນໃຫ້ ສຂລ ດໍາເນີນງານໄປດ້ວຍປະສິດທິພາບ ແລະປະສິດທິຜົນສູງຂຶ້ນກ່ວາເກົ່າ.

Medialaos MMD (ແຫຼ່ງຂໍ້ມູນຈາກ: ສຂລ)