ໃນວັນ 23 ກັນຍາ 2019 ທີ່ຜ່ານມາ ທ່ານ ປະສົງສິນ ຈະເລີນສຸກ ເຈົ້າເມືອງ ໆ ອຸທຸມພອນ ພ້ອມທີມງານພາກສ່ວນກ່ຽວຂ້ອງ ໄດ້ລົງຊູກຍູ້ ຕິດຕາມການສ້າງຂະບວນການອອກແຮງງານລວມ ຂອງພໍ່ແມ່ປະຊາຊົນ ເຂດບ້ານເຫຼົ່າໃຫຍ່ ແລະ ບ້ານໂນນວິໄລ ໂດຍການສ້ອມແປງຄືນເສັ້ນທາງທີ່ໄດ້ຮັບຄວາມເສຍ ຫາຍ ເນື່ອງຈາກເກີດມີຝົນຕົກໜັກ ແລະ ປານກາງຕິດຕໍ່ກັນຫຼາຍວັນ ໃນກາງເດືອນສິງຫາ ທີ່ຜ່ານມາ ເຮັດໃຫ້ເສັ້ນທາງເປັນບວກຂຸມ, ຖືກກັດເຊາະ, ຈຸດວາງທໍ່ລະບາຍນ້ຳຫຼາຍແຫ່ງ ຖືກນ້ຳກັດເຊາະ ເຮັດໃຫ້ເຊາະເຈື່ອນ ແລະ ຂາດ ໂດຍສະເພາະ ເສັ້ນທາງແຕ່ບ້ານໂນນວິໄລ ຫາບ້ານເຫຼົ່າໃຫຍ ແລະ ເສັ້ນທາງພາຍໃນບ້ານເຫຼົ່າໃຫຍ່ ເຊິ່ງບາງຈຸດດັ່ງກ່າວເປ້ເພເສຍຫາຍ ຈົນເຮັດໃຫ້ເສັ້ນທາງເກືອບບໍ່ສາມາດທຽວໄດ້.

ທ່ານ ສົມສີ ໄຊຍະລາດ ກຳມະການພັກເມືອງ ຜູ້ຊີ້ນຳກູ່ມບ້ານ ໄດ້ໃຫ້ຮູ້ວ່າ: ຕໍ່ກັບສະພາບການດັ່ງກ່າວ ພາຍຫຼັງທີ່ຝົນຢຸດຕົກມາໄດ້ໄລຍະໜຶ່ງ ທາງຄະນະອຳນາດການປົກຄອງກໍ່ໄດ້ມີການປະສານສົມທົບກັບພາກສ່ວນທີ່ ກ່ຽວຂ້ອງ ເພື່ອປຶກສາຫາລື ຫາວິທີທາງແກ້ໄຂສ້ອມແປງຄືນ ແຕ່ຂາດງົບປະມານ ດັ່ງນັ້ນຈຶ່ງໄດ້ປຸກລະດົມເອົາພໍ່ແມ່ ປະຊາຊົນທັງສອງບ້ານດັ່ງກ່າວ ສ້າງຂະບວນການອອກແຮງງານລວມສ້ອມແປງເສັ້ນທາງ ໂດຍການໃຊ້ລົດຝອດ ໄຖເປັນຮ່ອງລະບາຍນ້ຳລຽບສອງຂ້າງທາງ ແລ້ວໃຊ້ແຮງງານຄົນປັບລະດັບໜ້າທາງ ໂດຍການໃຊ້ຈົກ, ຊວ້ານ, ຂຸດດິນຖົມໃສ່ບ່ອນທີ່ເປັນບວກຂຸມ. ເຊິ່ງມີຈຳນວນພົນເຂົ້າຮ່ວມທັງໝົດ 350 ກວ່າຄົນ, ໂດຍແບ່ງເປັນ 3 ຈຸດຄື: ແຕ່ບ້ານໂນນວິໄລ ຫາບ້ານເຫຼົ່າໃຫຍ່ຄຸ້ມ 2, ແຕ່ບ້ານເຫຼົ່າໃຫຍ່ຄຸ້ມ 2 ຫາບ້ານເຫຼົ່າໃຫຍ່ຄຸ້ມ 1 ແລະ ແຕ່ບ້ານ ເຫຼົ່າໃຫຍ່ຄຸ້ມ 1 ຫາບ້ານເຫຼົ່າໃຫຍ່ຄຸ້ມ 3 ລວມໄລຍະທາງທັງໝົດ ເກືອບ 5 ກິໂລແມັດ.

ໂອກາດນີ້ ທ່ານເຈົ້າເມືອງໆອຸທຸມພອນ ກໍ່ໄດ້ສະແດງຄວາມຍ້ອງຍໍ້ຊົມເຊີຍຕໍ່ອົງການຈັດຕັ້ງ ຕະຫຼອດຮອດພໍ່ແມ່ປະຊາຊົນ ທີ່ໄດ້ປະກອບສ່ວນທາງດ້ານເຮື່ອແຮງ ແລະ ສະຕິປັນຍາ ເຂົ້າໃນການບູລະນະສ້ອມ ແປງເສັ້ນທາງຄັ້ງນີ້ ພ້ອມນັ້ນທ່ານກໍ່ຍັງໄດ້ຮຽກຮ້ອງມາຍັງທຸກພາກສ່ວນ ຈົ່ງໄດ້ພ້ອມກັນເປັນເຈົ້າການ ໃນການປົກປັກຮັກສາ ແລະ ສ້ອມແປງເສັ້ນທາງໃນຂອບເຂດຂອງບ້ານໃຜລາວເພື່ອໃຫ້ນຳໃຊ້ໄດ້ຢ່າງຍາວນານ.

ນັກຂ່າວເມືອງອຸທຸມພອນ
ພອນປະເສີດ ແຜນພັກດີ