ໃນວັນທີ 23 ກັນຍາ 2019 ນີ້ ຢູ່ທີ່ຮ້ານກິນດື່ມກິກສະໜາ ທາງຄະນະກຳມະການແກ້ໄຂປະກົດການ ຫຍໍ້ທໍ້ ຢູ່ຮ້ານອາຫານ, ຮ້ານກິນດື່ມ-ປິ້ງແກ້ມ ແລະ ສະຖານທີ່ບັນເທີງ ທົ່ວເມືອງອຸທຸມພອນ ນຳໂດຍທ່ານ ຄຳຮຸ່ງ ຈັນໂທສິດທິພອນ ຮອງຫົວໜ້າຫ້ອງການ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງ ໄດ້ລົງກວດກາການປະຕິບັດແຈ້ງການຂອງພະແນກ ຖວທ ແຂວງ ສະບັບເລກທີ 0749/ຖວທ.ສຂ ລົງວັນທີ 6 ພຶດສະພາ 2019 ເລື່ອງ ການຢຸດຕິ ການບໍລິການ ການສະແດງກາງແຈ້ງ ຢູ່ຮ້ານບັນເທີງ, ຮ້ານອາຫານ, ຮ້ານກິນດື່ມ-ປີ້ງແກ້ມ ສຳລັບຜູ້ປະກອບການ ທຸລະກິດ ຢູ່ຮ້ານບັນເທິງ, ຮ້ານອາຫານ, ຮ້ານກິນດື່ມປີ້ງ-ແກ້ມ.

ທ່ານ ຄຳຮຸ່ງ ຈັນໂທສິດທິພອນ ໄດ້ໃຫ້ຮູ້ວ່າ: ໃນໄລຍະທີ່ຜ່ານມາ ພາຍຫຼັງທີ່ທາງພະແນກ ຖວທ ແຂວງ ໄດ້ອອກແຈ້ງການ ສະບັບເລກທີ 0749/ຖວທ.ສຂ ລົງວັນທີ 6 ພຶດສະພາ 2019 ເລື່ອງ ການຢຸດຕິ ການບໍລິການ ການສະແດງກາງແຈ້ງ ຢູ່ຮ້ານບັນເທີງ, ຮ້ານອາຫານ, ຮ້ານກິນດື່ມ-ປີ້ງແກ້ມ ທາງຫ້ອງການ ຖວທ ເມືອງ ກໍ່ໄດ້ມີການແຈ້ງຕໍ່ບັນດາຮ້ານອາຫານ, ຮ້ານກິນດື່ມ-ປິ້ງແກ້ມ ແລະ ສະຖານທີ່ບັນເທີງ ພາຍໃນເມືອງໃຫ້ຮັບຮູ້ ແລະ ພ້ອມກັນຈັດຕັ້ງປະຕິບັດ. ແລະ ເພື່ອປະຕິບັດຕາມໜັງສືແຈ້ງຂອງພະແນກ ຖວທ ແຂວງ ສະບັບເລກທີ 1143/ຖວທ.ສຂ ລົງວັນທີ 17 ກໍລະກົດ 2019 ເລື່ອງ ການຈັດຕັ້ງປະຕິບັດ ແກ້ໄຂ ປະກົດການຫຍໍ້ທໍ້ ຢູ່ຮ້ານບັນເທີງ, ຮ້ານອາຫານ, ຮ້ານກິນດື່ມ-ປີ້ງແກ້ມ.

ທາງຄະນະກຳມະການຂອງພວກເຮົາ ແມ່ນຈະໄດ້ລົງກວດກາ ການປະຕິບັດແຈ້ງການຂອງພະແນກ ຖວທ ແຂວງ ສະບັບເລກທີ 0749/ຖວທ.ສຂ ຢູ່ຮ້ານອາຫານ, ຮ້ານກິນດື່ມ-ປິ້ງແກ້ມ ແລະ ສະຖານທີ່ບັນເທີງ ທົ່ວເມືອງອຸທຸມພອນ ເຊິ່ງວ່າ ຮ້ານກິກສະໜາ ແມ່ນຮ້ານທຳອິດ ທີ່ລົງກວດກາ ແລະ ຈະສືບຕໍ່ເຄື່ອນໄຫວກວດກາທຸກຮ້ານພາຍໃນເມືອງ ເພື່ອປັບປຸງໃຫ້ເຂົ້າຕາມລະບຽບການ.

ນັກຂ່າວເມືອງອຸທຸມພອນ
ພອນປະເສີດ ແຜນພັກດີ