ມີເດຍລາວແຂວງໄຊສົມບູນ ຂ່າວ: ພາພອນ ນະວົງໄຊ ພະແນກແຮງງານ ແລະ ສະຫວັດດີການສັງຄົມ ແຂວງໄຊສົມບູນ ຈັດພິທີເລື່ອນສະມາຊິກພັກສໍາຮອງຂື້ນເປັນສົມບູນ ໃນຕອນບ່າຍຂອງວັນທີ 22 ມີຖຸນາ ນີ້ ທີ່ຫ້ອງປະຊຸມຂອງຕົນ. ໂດຍການເປັນປະທານຂອງ ສະຫາຍ ນາງ ເພັດສະໄໝ ໂພໄຊຍະວົງ ຄະນະປະຈໍາພັກແຂວງ, ປະທານກວດກາພັກ-ລັດ ແຂວງ, ສະຫາຍ ວັນຄໍາເກັ່ງ ຢ່າຊົ່ງກົວ, ກຳມະການພັກແຂວງ, ເລຂາໜ່ວຍພັກພະແນກແຮງງານ ແລະ ສະຫວັດດີການສັງຄົມ ແຂວງ, ມີເລຂາ-ຮອງເລຂາໜ່ວຍພັກ ຈາກຂົງເຂດວັດທະນະທໍາສັງຄົມ, ຕາງໜ້າຄະນະຈັດຕັ້ງແຂວງ ແລະ ສະມາຊິກພັກພາຍໃນໜ່ວຍ ເຂົ້າຮ່ວມ.

ໂອກາດດັ່ງກ່າວ ສະຫາຍ ຈັນຖະໝອມ ສິດທິນໍລາດ ຮອງຫົວໜ້າຄະນະຈັດຕັ້ງແຂວງ ໄດ້ຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການອະນຸມັດ ເລື່ອນສະຊິກພັກສໍາຮອງຂື້ນສົມບູນ ໃຫ້ໜ່ວຍພັກພະແນກແຮງງານ ແລະ ສະຫວັດດີການສັງຄົມ ແຂວງ ຈໍານວນ 1 ສະຫາຍ ຄື ສະຫາຍ ບຸນຖອງ ບຸນເພັງຈັນສຸກ. ຈາກນັ້ນ, ສະຫາຍ ວັນຄໍາເກັ່ງ ຢ່າຊົ່ງກົວ ໄດ້ຂື້ນຈັບມື ພ້ອມທັງມອບມະຕິຕົກລົງ ເພື່ອເປັນການຮັບຮອງສະມາຊິກພັກສົມບູນ ຢ່າງເປັນທາງການ.

ໂອກາດດັ່ງກ່າວ ສະຫາຍ ນາງ ເພັດສະໄໝ ໂພໄຊຍະວົງ ໄດ້ມີຄໍາເຫັນໂອ້ລົມຕໍ່ພິທີ ຊຶ່ງສະຫາຍໄດ້ສະແດງຄວາມຍ້ອງຍໍຊົມເຊີຍ ຕໍ່ສະມາຊິກພັກສໍາຮອງ ທີ່ໄດ້ເອົາໃຈໃສ່ຝຶກຝົນຫລໍ່ຫລອມຕົວເອງ ໃຫ້ມີຄວາມບຸກບືນຫ້າວຫັນ ຕໍ່ການຈັດຕັ້ງປະຕິບັດວຽກງານຕ່າງໆ ຈົນສາມາດຜ່ານມາດຖານ, ເງື່ອນໄຂ ສະໄໝສໍາຮອງ ແລະ ໄດ້ເລື່ອນເປັນສົມບູນໃນຄັ້ງນີ້. ນອກນີ້ ສະຫາຍ ຍັງໄດ້ຮຽກຮ້ອງໃຫ້ຄະນະພັກຕະຫຼອດສະມາຊິກພັກທຸກສະຫາຍ ຈົ່ງເພີ່ມທະວີຄວາມເອົາໃຈໃສ່ ຄົ້ນຄ້ວາຮໍ່າຮຽນ, ເຊື່ອມຊຶມມະຕິ, ຄໍາສັ່ງ, ແນວທາງນະໂຍບາຍ ແລະ ລະບຽບການຕ່າງໆຂອງພັກ ໃຫ້ເລິກເຊິ່ງ ເປັນຕົ້ນແມ່ນ ມະຕິ XI ຂອງພັກ ແລະ ແນວທາງທິດສະດີມາກ-ເລນິນ, ແນວຄິດໄກ ສອນ ພົມວິຫານ ດ້ວຍການປະຕິບັດໃຫ້ໄດ້ຕາມຄໍາປະຕິຍານຂອງຕົນ ກ່ອນຈະເຂົ້າເປັນສະມາຊິກພັກ. ທັງນີ້ ກໍເພື່ອຮັບປະກັນໃຫ້ສະມາຊິກພັກທຸກສະຫາຍ ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຄວາມສາມັກຄີເປັນປຶກແຜ່ນ ພ້ອມທັງເຮັດສໍາເລັດໜ້າທີ່ວຽກງານ ທີ່ຂັ້ນເທິງມອບໝາຍ ແລະ ພ້ອມກັນເອົາໃຈ ໃສ່ກໍ່ສ້າງໜ່ວຍພັກຂອງຕົນ ໃຫ້ກາຍເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ໃນອານາຄົດ.