ຊຸດອົບຮົມວຽກງານການແກ້ໄຂຂໍ້ຂັດແຍ່ງທາງດ້ານເສດຖະກິດ ໃຫ້ຫົວໜ້າ, ຮອງຫົວໜ້າພະແນກການ, ກົມກອງອ້ອມຂ້າງແຂວງ ໄດ້ຈັດຂຶ້ນໃນວັນທີ 24 ກັນຍາ 2019 ນີ້ຢູ່ທີ່ຫ້ອງປະຊຸມພະແນກຍຸຕິທໍາແຂວງໄຊຍະບູລີ. ເຂົ້າຮ່ວມເປັນກຽດມີທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ, ທ່ານ ນາງ ດວງມະນີ ລາວມາວ ຫົວໜ້າສູນແກ້ໄຂຂໍ້ຂັດແຍ່ງທາງດ້ານເສດຖະກິດກະຊວງຍຸຕິທໍາ ພ້ອມດ້ວຍພະນັກງານຫຼັກແຫຼ່ງພາຍໃນແຂວງເຂົ້າຮ່ວມ.

ທ່ານ ບຸນລ້ຽງ ດວງສົມພອນ ຮອງຫົວໜ້າພະແນກຍຸຕິທໍາແຂວງ ໄດ້ກ່າວວ່າ ຊຸດອົບຮົມຄັ້ງນີ້ຈະໃຊ້ເວລາ 2 ວັນຈຶ່ງສໍາເລັດ ສະນັ້ນຈຶ່ງຮຽກຮ້ອງໃຫ້ບັນດາທ່ານຈົ່ງເປັນເຈົ້າການຄົ້ນຄ້ວາບັນດານິຕິກໍາຕ່າງໆ, ບົດຮຽນທີ່ຄູສອນ ພ້ອມນັ້ນຕ້ອງຍາດແຍ່ງແລກປ່ຽນບົດຮຽນທັງພາກທິດສະດີ ແລະ ພຶດຕິກໍາຕົວຈິງນໍາຄູສອນ ແລະ ເພື່ອນຝຶກອົບຮົມດ້ວຍກັນ ເພື່ອຍົກສູງລະດັບຄວາມຮູ້ ແລະ ບົດຮຽນໃຫ້ແກ່ຕົນເອງເພື່ອນໍາໄປຈັດຕັ້ງປະຕິບັດໃຫ້ໄດ້ຮັບຜົນສໍາເລັດໃນຕໍ່ໜ້າ. ການອົບຮົມວຽກງານແກ້ໄຂຂໍ້ຂັດແຍ່ງທາງດ້ານເສດຖະກິດຄັ້ງນີ້ບັນດາຜູ້ເຂົ້າຮ່ວມຈະໄດ້ຮຽນຮູ້ຄວາມໝາຍຄວາມສໍາຄັນ ຄວາມຈໍາເປັນຂອງກົດໝາຍວ່າດ້ວຍການແກ້ໄຂຂໍ້ຂັດແຍ່ງທາງດ້ານເສດຖະກິດສະບັບປັບປຸງປີ 2018; ຂັ້ັນຕອນການແກ້ໄຂຂໍ້ຂັດແຍ່ງທາງດ້ານເສດຖະກິດ ການແຕ່ງຕັ້ງຜູ້ໄກ່ເກ່ຍ-ກຳມະການຕັດສິນຮັບຜິດຊອບໃນແກ້ໄຂຂໍ້ຂັດແຍ່ງທາງດ້ານເສດຖະກິດ ແລະ ສົນທິສັນຍາສາກົນ. ເຕັກນິກການດໍາເນີນການໄກ້ເກ່ຍ, ເຕັກນິກການດຳເນີນການຕັດສິນ, ການຕິດຕາມການປະຕິບັດຜົນຂອງການແກ້ໄຂຂໍ້ຂັດແຍ່ງທາງດ້ານເສດຖະກິດ, ຄໍາຊີ້ຂາດຂອງສານປະຊາຊົນຕໍ່ກັບຜົນຂອງການແກ້ໄຂຂໍ້ຂັດແຍ່ງທາງດ້ານເສດຖະກິດ. ທັງໝົດນັ້ນກໍ່ເພື່ອເປັນບ່ອນອີງຕໍ່ການຈັດຕັ້ງປະຕິບັດໃນວຽກງານດັ່ງກ່າວ ດ້ວຍການສົມທຽບທິດສະດີປຽບທຽບໃສ່ກັບພຶດຕິກໍາຕົວຈິງ ເພາະວ່າວຽກງານດັ່ງກ່າວແມ່ນວຽກໃໝ່ ແລະ ມີຫຼາຍສິ່ງທ້າທາຍ. ສະນັ້ນນັກຝຶກອົບຮົມຈົ່ງໄດ້ເອົາໃຈໃສ່ສົນທະນາແລກປ່ຽນບົດຮຽນ, ກ້າຍົກດ້ານດີ ແລະ ດ້ານຫຍໍ້ທໍ້ ໃນການກຽມປະຕິບັດໜ້າທີ່ວຽກງານຂອງຕົນ ເພື່ອຍົກໃຫ້ເຫັນດ້ານດີ-ດ້ານອ່ອນຂໍ້ທີ່ເປັນຊ່ອງຫວ້າງບັນຫາບໍ່ຄົບຖ້ວນ ຍ້ອນສາເຫດຕ່າງໆຢ່າງພາວະວິໄສເອກະພາບກັນ ພ້ອມກັນຊອກຫາວິທີປັບປຸງ ແກ້ໄຂໃຫ້ດີຂຶ້ນເປັນກ້າວໆ.

ຂ່າວ: ບຸນທີ.