ມີເດຍລາວແຂວງວຽງຈັນ ຂ່າວ: ຄໍາລຸນ ສົມວົງໄຊ
ເພື່ອເຮັດໃຫ້ມະຫາຊົນກ້າວໜ້າທີ່ຈະຂະຫຍາຍເຂົ້າເປັນສະມາຊິກພັກ ໄດ້ຮັບຮູ້-ເຂົ້າໃຈເບື້ອງຕົ້ນກ່ຽວກັບປະຫວັດ ຄວາມເປັນມາ, ອຸດົມການ, ທາດແທ້ຂອງພັກປະຊາຊົນປະຕິວັດລາວ. ສະນັ້ນ, ໃນຕອນເຊົ້າວັນທີ 22 ມີຖຸນາ 2021 ນີ້ ຢູ່ທີ່ສະໂມສອນເມືອງເຟືອງ ໄດ້ຈັດຝຶກອົບຮົມເອກະສານສະໜັບ ສະໜູນໃຫ້ມະຫາຊົນກ້າວໜ້າ ເພື່ອຂະຫຍາຍເຂົ້າພັກຕາມລະບຽບຂອງພັກປະຊາຊົນປະຕິວັດລາວວາງອອກ ເຊີ່ງມີມະຫາຊົນກ້າວໜ້າຈາກໜ່ວຍພັກສໍໍານັກງານ-ຫ້ອງການ, ໂຮງຮຽນ, ໂຮງໝໍ ແລະບ້ານອ້ອມຂ້າງເມືອງ ເຂົ້າຮ່ວມທັງໝົດ 31 ທ່ານ, ຍິງ 7 ທ່ານ.

ກອງປະຊຸມຄັ້ງນີ້ ທ່ານ ບຸນລາ ວົງຂຸນສີ ຄະນະປະຈໍາພັກເມືອງ ຫົວໜ້າຄະນະໂຄສະນາອົບຮົມເມືອງ ໄດ້ກ່າວເປີດກອງປະຊຸມ ພ້ອມທັງ ຜ່ານເອກະສານອົບຮົມເປົ້າໝາຍຂະຫຍາຍເຂົ້າພັກ ປີ 2021 ເຊີ່ງໄດ້ຍົກໃຫ້ຮູ້ເນື້ອໃນຕົ້ນຕໍ ທີ່ສໍາຄັນ ໂດຍສະເພາະ ແມ່ນຄວາມໝາຍ ຄວາມສໍາຄັນຂອງພັກການເມືອງ, ວັດຖຸປະສົງ, ອຸດົມການຂອງພັກ, ຮູ້ໄດ້ມາດຖານ ແລະເງື່ອນໄຂ ຜູ້ຈະເຂົ້າເປັນສະມາຊິກພັກ, ຮູ້ໜ້າທີ່ພັນທະ, ຜົນປະໂຫຍດ ແລະຂໍ້ຫ້າມຂອງສະມາຊິກພັກປະຊາຊົນປະຕິວັດລາວ. ພ້ອມດຽວກັນນີ້ ກໍໄດ້ເປີດໂອກາດໃຫ້ຜູ້ທີ່ເຂົ້າຮ່ວມ ໄດ້ສົນທະນາຖາມບາງເນື້ອໃນກ່ຽວກັບວຽກງານຂອງພັກໃຫ້ເຂົ້າໃຈຢ່າງເລິກເຊີ່ງ.

ໃຫ້ສືບຕໍ່ຝຶກຝົນຫຼໍ່ຫຼອມຕົນເອງ, ປະກອບສ່ວນເຂົ້າໃນວຽກງານທີ່ພັກ-ລັດ, ການຈັດຕັ້ງມອບໝາຍໃຫ້ມີຜົນສໍາເລັດເປັນຢ່າງດີ. ນອກຈາກນີ້ ຄະນະຮັບຜິດຊອບຂັ້ນເມືອງກໍຈະໄດ້ສືບຕໍ່ເຊື່ອມຊຶມໃຫ້ແກ່ມະຫາຊົນກ້າວໜ້າຢູ່ຮາກຖານບ້ານອີກຈໍານວນໜຶ່ງ ເຊີ່ງເປົ້າໝາຍລວມທັງໝົດສໍາລັບ ປີ 2021 ມີ 77 ທ່ານ, ຍິງ 22 ທ່ານ.