ມີເດຍລາວແຂວງຫຼວງພະບາງ ຂ່າວ: ເພັດສາຄອນ ສິມມະວົງ ວັນທີ 23 ມິຖຸນາ 2021 ທີ່ຫ້ອງປະຊຸມ ກອງບັນຊາການ ປ້ອງກັນຄວາມສະຫງົບແຂວງຫຼວງພະບາງ ສະຫະພັນກໍາມະບານແຂວງ ໄດ້ຈັດກອງປະຊຸມສະຫຼຸບ ວຽກງານກໍາມະບານ 6 ເດືອນຕົ້ນປີ 2021 ໂດຍການເປັນປະທານຂອງສະຫາຍ ສຸກັນ ບຸນຍົງ ຮອງເລຂາພັກແຂວງ ,ມີສະຫາຍ ສົມມາລີ ຄໍາເກັ່ງ ປະທານ ສະຫະພັນກໍາມະບານແຂວງ ພ້ອມດ້ວຍຄະນະ ແລະ ປະທານສະຫະພັນກໍາມະບານບັນດາພະແນກການ,ເມືອງ ແລະ ສະມາຊິກກໍາມະບານເຂົ້າຮ່ວມ.

ສະຫາຍ ສົມມາລີ ຄໍາເກັ່ງ ປະທານ ສະຫະພັນກໍາມະບານແຂວງ ກ່າວວ່າ: ກອງປະຊຸມຄັ້ງນີ້ ໄດ້ຮັບຟັງບົດສະຫຼຸບຕີລາຄາ ສະພາບການຈັດຕັ້ງປະຕິບັດວຽກງານກໍາມະບານໃນທົ່ວແຂວງ ໄລຍະ 6 ເດືອນຕົ້ນປີ 2021 ແລະ ທິດທາງໃນຕໍ່ໜ້າ,ພ້ອມກັນນັ້ນກໍໄດ້ພ້ອມກັນຄົ້ນຄ້ວາ ປະກອບຄວາມຄິດເຫັນ ແລະເປັນເອກະພາບກັນຮັບຮອງເອົາກົດລະບຽບກອງທຶນຊ່ວຍເຫຼືອເຊິ່ງກັນ ແລະກັນຂອງສະຫະພັນກໍາມະບານແຂວງ ສະບັບປັບປຸງໃໝ່ 2021,ກອງປະຊຸມຍັງຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການຮັບຮອງເອົາຄະນະບໍລິຫານງານສະຫະພັນກໍາມະບານແຂວງ ຊຸດທີ VIII ແລະຜ່ານມະຕິຮັບຮອງເອົາບົດສະຫຼຸບວຽກງານ 6 ເດືອນຕົ້ນປີ2021.

ສໍາລັບວຽກງານ 6 ເດືອນຕົ້ນປີ2021 ສະຫະພັນກໍາມະບານແຂວງ ໄດ້ມີຜົນສໍາເລັດຫຼາຍດ້ານ ເປັນຕົ້ນແມ່ນ ໂຄສະນາ ແລະສຶກສາອົບຮົມການເມືອງແນວຄິດ ພ້ອມທັງເຜີຍແຜ່ບັນດາມະຕິຄໍາສັ່ງຕ່າງໆ ແລະ ມູນເຊື້ອວັນສໍາຄັນຕ່າງໆຂອງຊາດ ເຂົ້າໃນຖັນແຖວພະນັກງານ,ສະມາຊິກກໍາມະບານ,ກໍາມະກອນ ແລະ ຊາວຜູ້ອອກແຮງງານ ເຮັດໃຫ້ ກໍາມະບານແຕ່ລະຂັ້ນ ເຄື່ີອນໄຫວວຽກງານໄດ້ເປັນຢ່າງດີ.ໄດ້ປະກອບສ່ວນ ວັດຖຸປັດໄຈ ທີ່ໄດ້ຮັບຈາກການຈັດຕັ້ງກໍາມະບານພາຍໃນແຂວງໄປມອບໃຫ້ທະຫານທີ່ຢູ່ແນວໜ້າ ແລະ ຄະນະສະເພາະກິດຕ້ານ ແລະ ແກ້ໄຂການລະບາດຂອງພະຍາດໂຄວິດ-19 ລວມເປັນເງິນທັງໝົດ 12.100.000 ກີບ.

ຮ່ວມບໍລິຈາກເລືີອດໃນວັນສໍາຄັນຕ່າງໆຂອງຊາດ ຈໍານວນ 214 ທ່ານ, ຍິງ 97 ທ່ານ.ສາມາດຂະຫຍາຍສະມາຊິກກໍາມະບານໃໝ່ໄດ້ 326 ຄົນ, ຍິງ 118 ຄົນ, ປະຈຸບັນທົ່ວແຂວງມີສະມາຊິກກໍາມະບານທັງໝົດ 18.141 ສະຫາຍ, ຍິງ 8.354 ສະຫາຍ,ໃນນີ້ພະນັກງານກໍາມະບານອາຊີບ 103 ສະຫາຍ, ຍິງ 43 ສະຫາຍ, ມີ 11 ສະຫະພັນກໍາມະບານເມືີອງ, 1 ນະຄອນ, 12 ສະຖາບັນໃຫຍ່ ແລະ 63 ຮາກຖານ.ໃນໄລຍະ 6 ເດືີອນ ຜ່ານມາ ໄດ້ຮັບເງິນສະຕິຈາກສະມາຊິກກໍາມະບານໃນທົ່ວແຂວງ ລວມເປັນເງິນທັງໝົດ 57.500.000 ກີບ.ໄດ້ປະຕິບັດນະໂຍບາຍຍ້ອງຍໍໃຫ້ສະມາຊິກກໍາມະບານທີ່ມີຜົນງານດີເດັ່ນໃນການເຄືີ່ອນໄຫວວຽກງານໄລຍະຜ່ານມາ ຈໍານວນ 218 ທ່ານ, ຍິງ 104 ທ່ານ ແລະ ອອກໃບຍົກຍ້າຍໃຫ້ສະມາຊິກກໍາມະບານທີ່ໄປປະຈໍາການຢູ່ຕ່າງປະເທດ ແລະ ຕ່າງແຂວງ ຈໍານວນ 11 ທ່ານ, ຍິງ 06 ທ່ານ.ໄດ້ໃຫ້ຄໍາປຶກສາທາງດ້ານກົດໝາຍແກ່ກໍາມະກອນ ຈໍານວນ 18 ຄັ້ງ, 24 ຄົນ, ຍິງ 04 ຄົນ.

ໄດ້ສ້າງຂະບວນການດ້ານຕ່າງໆເຊັ່ນ: ຂະບວນການແຂ່ງຂັນປະຕິບັດໜ້າທີ່ວິຊາສະເພາະຕາມການມອບໝາຍ, ກິລາ, ສີລະປະວັນນະຄະດີ, ອອກແຮງງານອານາໄມລວມຕາມສໍານັກງານອົງການ ເພືີ່ອຂໍ່ານັບຮັບຕ້ອນວັນສໍາຄັນຕ່າງໆຂອງຊາດ, ຂອງພັກ, ສໍາເລັດການປະກາດນາມຍົດ ເປັນສະຫະພັນກໍາມະບານ 5 ເປັນເຈົ້າ ປະຈໍາປີ 2020-2021 ໄດ້ 7 ເມືີອງ, 9 ສະຖາບັນໃຫຍ່ ແລະ 47 ຮາກຖານ ເທົ່າ 77% ຂອງຈໍານວນໜ່ວຍທັງໝົດ,ໄລຍະ 6 ເດືີອນຜ່ານມາສະມາຊິກກອງທຶນເພີ່ມຂຶ້ນໃໝ່ ຈໍານວນ 180 ຄົນ, ຍິງ 57 ຄົນ, ປະຈຸບັນມີສະມາຊິກກອງທຶນທັງໝົດ 12.396 ຄົນ, ຍິງ 5.521 ຄົນ.ມີເງິນໝູນວຽນໃນກອງທຶນ ທັງໝົດ 3.056.187.760 ກີບ.


ຈາກນັ້ນຢູ່ກອງປະຊຸມຄະນະຈັດຕັ້ງແຂວງ ກໍໄດ້ຜ່ານມະຕິຕົກລົງຮັບຮອງເອົາຄະນະບໍລິຫານງານສະຫະພັນກໍາມະບານຊຸດທີ VIII ຢ່າງເປັນທາງການ ໃນທົ່ວແຂວງຈໍານວນ 42 ສະຫາຍ.ພ້ອມດຽວກັນນີ້ຍັງໄດ້ຮັບຟັງການຊີ້ນໍາຈາກສະຫາຍ ສຸກັນ ບຸນຍົງ ຮອງເລຂາພັກແຂວງ ໂດຍໄດ້ເນັ້ນໃຫ້ເອົາໃຈໃສ່ໂຄສະນາ ແລະສຶກສາອົບຮົມວຽກງານການເມືອງແນວຄິດໃຫ້ ພະນັກງານກໍາມະບານ,ກໍາມະກອນ ແລະ ຊາວຜູ້ອອກແຮງງານ, ໂດຍສະເພາະແມ່ນຊາວຜູ້ອອກແຮງງານຢູ່ພາຍໃນແຂວງ ແລະແຮງງານເຄື່ອນຍ້າຍ ພ້ອມທັງຕິດຕາມກວດກາບັນດາແຮງງານດັ່ງກ່າວຢ່າງເຂັ້ມງວດ,ເນື່ອງຈາກວ່າຢູ່ໃນຊ່ວງການເຝົ້າລະວັງພະຍາດໂຄວິດ-19 ທີ່ລັກຫຼອບເຂົ້າມາໃນປະເທດ ກໍຄືແຂວງຫຼວງພະບາງ ແລະອາດເກີດການລະບາດຮອບໃໝ່ ແລະວຽກງານອື່ນໆຕື່ມອີກ.