ມີເດຍລາວແຂວງບໍ່ແກ້ວ ຂ່າວ: ບຸນຈັນ ບຸນປັນຍາ
ບ້ານນໍ້າງາວ ເມືອງຫ້ວຍຊາຍ ໄດ້ຈັດກອງປະຊຸມໃຫ່ຍ ຄັ້ງທີ່ VIII ຂຶ້ນຢູ່ທີ່ຫໍປະຊຸມບ້ານ ໃນວັນທີ 22 ມິຖຸນານີ້ ໂດຍການເປັນປະທານຂອງທ່ານ ຄຳເສີນ ແສງອາລຸນ ນາຍບ້ານໆ ນໍ້າງາວ,ໃຫ້ກຽດເຂົ້າຮ່ວມຂອງ ທ່ານ ບຸນຄົງ ວົງຄຳຈັນ ຮອງເລຂາພັກເມືອງ, ປະທານກວດກາພັກ-ລັດເມືອງຫ້ວຍຊາຍ, ມີບັນດາຄະນະຊີ້ນຳກຸ່ມ, ຄະນະພັກຮາກຖານ, ອຳນາດການປົກຄອງບ້ານ,ອົງການຈັດຕັ້ງບ້ານ,ແຂກຖຶກເຊີນຕະຫຼອດຮອດພໍ່ແມ່ປະຊາຊົນພາຍໃນບ້ານເຂົ້າຮ່ວມ.

ທ່ານ ຄຳເສີນ ແສງອາລຸນ ນາຍບ້ານໆນໍ້າງາວ ຂຶ້ນຜ່ານບົດສະຫຼຸບໃນການຈັດຕັ້ງປະຕິບັດໃນໄລຍະຜ່ານມາ ບ້ານ ນໍ້າງາວເປັນບ້ານໜື່ງທທີ່ຂຶ້ນກັບບ້ານປຸງນາໜູນ ເມືອງຫ້ວຍຊາຍ ແຂວງບໍ່ແກ້ວ, ມີ 108 ຄົວເຮືອນ, ມີ 137 ຄອບຄົວ, ພົນລະເມືອງ 584 ຄົນ, ຍິງ 288 ຄົນ, ປະກອບມີ 2 ເຜົ່າ, ຖືສາສະໜາພຸດ ແລະ ສາສະໜາ ຜີ, ປະຊາຊົນໄດ້ຖືເອົາອາຊີບເຮັດນາເປັນຕົ້ນຕໍ່, ປູກຝັງ, ລ້ຽງສັດ ແລະ ຄ້າຂາຍເປັນສຳຮອງ, ໄລຍະຜ່ານມາ ອຳນາດການປົກຄອງບ້ານໄດ້ໄດ້ສົມທົບກັບຄະນະພັກ, ການຈັດຕັ້ງທຸກພັກສວນ ເອົາໃຈໃສ່ເຕົ້າໂຮມຄວາມສາມັກຄີພໍ່ແມ່ປະຊາຊົນບັນດາເຜົ່າພາຍໃນບ້ານເປັນເຈົ້າການຈັດຕັ້ງປະຕິບັດມະຕິຄຳສັ່ງຂອງຂັ້ນເທິງ ກໍ່ຄືຂໍ້ກຳນົດກົດໝາຍຕ່າງໆ ແລະ ແຜນພັດທະນາເສດຖະກິດສັງຄົມຂອງພັກ-ລັດໃນໄລຍະໃໝ່,ພ້ອມກັນຈັດຕັ້ງປະຕິບັດແກ້ໄຂບັນຫາເລື່ອງປະກົກການຫຍໍ້ທໍ້ຢູພາຍໃນບ້ານ, ໂດຍສະເພາະແມ່ນ ວຽກງານພັດທະນາຂອງບ້ານ ໃຫ້ພ້ອມກັນປະຕິບັດແຜນພັດທະນາພື້ນຖານໂຄງລ່າງຂອງບ້ານກໍ່ຄືທິດທາງແຜນການຂອງພັກ-ລັດວາງອອກ, ກອງປະຊຸມໄດ້ປ່ອນບັດຄັດເລືອກເອົານາຍບ້ານຊຸດໃໝ່, ມີຜູ້ລົງສະມັກ 05 ທ່ານ ແລະ ຄັດເລືອກເອົາ 3 ທ່ານ, ຜ່ານການປ່ອນບັດຄັດເລືອກ ແລະ ກອງປະຊຸມຂັ້ນປະຖົມມະລຶກສາມາດເລືອກໄດ້ ທ່ານ ຄຳເສີນ ແສງອາລຸນ ເປັນປະທານ, ທ່ານ ໄມ່ຈັນ ປັນຍາສັກ ແລະ ທ່ານ ຄຳພົງ ລາດສະຈອມ ເປັນຮອງ.

ໂອກາດນີ້ ທ່ານ ບຸນຄົງ ວົງຄຳຈັນ ຮອງເລຂາ ພັກເມືອງປະທານກວດກາພັກ-ລັດເມືອງ ຫ້ວຍຊາຍໄດ້ສະແດງຍ້ອງຍໍຊົມເຊີຍຕໍ່ຜົນງານ ທີ່ຄະນະບ້ານຊຸດເກົ່າຍາດມາໄດ້ ພ້ອມເນັ້ນໜັກໃຫ້ຄະນະບ້ານຊຸດໃໝ່ເພີ້ມທະວີຄວາມເອົາໃຈໃສ່ຕໍ່ໜ້າທີ່ວຽກງານທີ່ໄດ້ຮັບມອບໝາຍ, ຖືເອົາວຽກງານສຶກສາອົບຮົມການເມືອງ-ແນວຄິດເປັນກົກ, ເອົາໃຈໃສ່ຊຸກຍູ້ໃຫ້ປະຊາຊົນບັນດາເຜົ່າໃຫ້ຮັບຮູ້ ແລະ ເຂົ້າໃຈຢ່າງເລິກເຊີ່ງກ່ຽວກັບຂໍ້ກຳນົດກົດລະບຽບ, ແນວທາງນະໂຍບາຍຂອງພັກ-ລັດ ແລະ ພາລະບົດບາດ, ສິດ-ໜ້າທີ່ຂອງຕົນ, ເວົ້າລວມເວົ້າສະເພາະແມ່ນການປົກປັກຮັກສາ ແລະ ສ້າງສາພັດທະນາພັດບ້ານຂອງຕົນໃຫ້ຫຼຸດຜົ້ນຈາກຄວາມທຸກຍາກແລະ ມີຄວາມສະຫງົບປອດໄພເພື່ອນຳໄປສູ່ຜົນສຳເລັດເທື່ອລະກ້າວ.