ມີເດຍລາວແຂວງບໍ່ແກ້ວ ຂ່າວ ນາງ ມີເຮີ ວ່າເຊັ່ງຊົ່ງ
ວັນທີ 22 ມິຖຸນານີ້, ເມືອງຫ້ວຍຊາຍ ໄດ້ສົມທົບກັບຫ້ອງການແຮງງານ ແລະ ສະຫວັດດີການ-ສັງຄົມເມືອງ ລົງເຄື່ອນໄຫວຢ້ຽມຍາມອົບອຸ່ນຈິດໃຈ ແລະ ໃຫ້ການຊ່ວຍເຫຼືອເບື້ອງຕົ້ນ ຄອບຄົວທີ່ຖຶກອັກຄີໄພຢູ່ບ້ານ ບໍ່ເຫຼັກກຸ່ມໂພນທອງ ເມືອງຫ້ວຍຊາຍ ນຳໂດຍທ່ານ ສຸວັດ ເພັງພະຈັນຮອງເຈົ້າເມືອງເມືອງຫ້ວຍຊາຍຜູ້ຊີ້ນຳວຽກງານ ວັດທະນະທຳ-ສັງຄົມ, ພ້ອມດ້ວຍຄະນະທີມງານພາກສ່ວນກ່ຽວຂ້ອງ.

ປະຊາຊຊົນຜູ້ທີ່ເຫັນເຫດການ ໄດ້ເລົ່າເຖິງເຫດການໄຟໄໝ້ເຮືອນຄັ້ງນີ້ວ່າ: ໃນຕອນເຊົ້າຂອງວັນທີ 22 ມິຖຸນາ 2021 ເວລາ 8 ໂມງ 00 ແມ່ນໄດ້ມີໄຟໄໝ້ລຸກລາມຂຶ້ນສູ່ຫຼັງຄາຢ່າງໄວວາ ປະຊາຊົນຜູ້ເຫັນເຫດການ ແລະ ທະຫານຈໍານວນໜຶ່ງ ໄດ້ຊ່ວຍກັນເອົານໍ້າໄປມອດໄຟ ແລະ ໂທຫາລົດດັບເພີງໃຫ້ມາຊ່ວຍກັນດັບມອດໄຟທີ່ກຳລັງລຸກໄໝ້ຢ່າງແຮງ ເຖິງຈະພະຍາຍາມຊໍາໃດກໍ່ບໍ່ສາມາດຕ້ານພະລັງລຸກໄໝ້ຂອງໄຟໄດ້ ເນື່ອງຈາກສະພາບອາກາດອົບເອົ້າ ບວກກັບເຮືອນຊັ້ນເທິງທີ່ແອ້ມດ້ວຍໄມ້ ທີ່ເປັນເຊື້ອເພີງຢ່າງດີ ໄດ້ເຮັດໃຫ້ເຄື່ອງໃຊ້ຂອງສອຍ ຊັບສິນເງິນຄໍາທັງໝົດພາຍໃນເຮືອນຂອງທ້າວ ຄຳພັນ ຮອງນາຍບ້ານໆບໍ່ເຫຼັກ ເປັນເຮືອນສອງຊັ້ນ ປະກອບມີ ລົດຈັກ 2 ຄັນ, ຕູ້ໃສ່ເຄື່ອງ 3 ໜ່ວຍ, ຈັກດຸດນໍ້າ 1 ເຄື່ອງ, ຕູ້ເຢັນ, ໂທລະສັບ, ເງິນກີບ, ເງິນບາດ, ເຂົ້າສານ ເຄື່ອງນຸ່ງຫົ່ມ, ເຄື່ອງໃຊ້ທີ່ຈຳເປັນພາຍໃນຄົວເຮືອນ ແລະ ອື່ນໆພາຍໃນເຮືອນ ໄດ້ຖຶກເຜົາທຳລາຍທັງໝົດເສຍຫາຍ 100% ລວມມູນຄ່າເສຍຫາຍໃນເບື້ອງຕົ້ນທັງໝົດ 230 ລ້ານກ່ວາກີບ, ຕາມການໃຫ້ຂໍ້ມູນຂອງຜູ້ເຫັນເຫດການຄາດວ່າເກີດຈາກໄຟຟ້າລັດວົງຈອນ. ເຫດການດັ່ງກ່າວໄດ້ເຮັດໃຫ້ຄອບຄົວຂອງທ້າວ ຄຳພັນ ຕົກຢູ່ໃນສະພາບທີ່ຫຍຸ້ງຍາກຂາດເຂີນທີ່ສຸດ ຕໍ່ສະພາບການດັ່ງກ່າວ ຄະນະນຳຂອງເມືອງ ໄດ້ຊີ້ນຳຫ້ອງການແຮງງານ ແລະ ສະຫວັດດີການ-ສັງຄົມເມືອງ ສົມທົບກັບ ຄະນະພັກ, ອຳນາດການປົກຄອງບ້ານ ເຂົ້າໃຫ້ການຊ່ວຍເຫຼືອໃນທັນທີ.

ໂອກາດນີ້, ທ່ານ ສຸວັດ ເພັງພະຈັນ ໄດ້ສະແດງຄວາມເສຍໃຈກັບຄອບຄົວຂອງຜູ້ຖືກເຄາະຮ້າຍ ພ້ອມທັງ ເນັ້ນໜັກໃຫ້ພາກສ່ວນກ່ຽວຂ້ອງ ແລະ ອໍານາດການປົກຄອງບ້ານຮີບຮ້ອນຄົ້ນຄວ້າວັດຖຸປັດໃຈອັນພື້ນຖານການປຸກສ້າງເຮືອນຫຼັງໃໝ່ ໃຫ້ຄອບຄົວດັ່ງກ່າວເປັນສຳຄັນ ຕິດພັນກັບ ການສ້າງຄວາມອົບອຸ່ນປົວແປງຈິດໃຈຄອບຄົວດັ່ງກ່າວໃຫ້ດີຂຶ້ນ ແລະ ກັບຄືນສູ່ສະພາບປົກກະຕິໂດຍໄວ ພ້ອມນັ້ນ, ໄດ້ນຳເອົາເຄື່ອງນຸ່ງຫົ່ມ, ເຄື່ອງບ່ອນນອນ, ເຄື່ອງໃຊ້ໃນຄົວເຮືອນ ເຂົ້າສານ, ອາຫານແຫ້ງ, ນ້ຳດື່ມ, ເຄື່ອງໃຊ້ທີ່ຈຳເປັນອື່ນໆ ແລະ ເງິນສົດຈຳນວນໜຶ່ງ ສະເພາະໜ້າມອບໃຫ້ຄອບຄົວດັ່ງກ່າວ ລວມມູນຄ່າທັງໝົດ 1,200,000 ກີບ ແລະ ໃນຕອນບ່າຍຂອງວັນດຽວກັນສາທຸ ແລະ ອາຈານວັດ ໂພນສະຫວ່າງ ເຂດດ່ານຖິ່ນໄດ້ນຳເອົາ ຜ້າເສືອ 6 ຜືນ,ຜ້າຫົ່ມ 6 ຜືນ, ສາດ, ໝໍ້ຫຸ່ງເຂົ້າ 1 ໜ່ວຍ, ໝໍ້ແກງ, ໝໍ້ຂາງ, ກະຕິກໃສ່ນ້ຳ, ໝໍ້ໜຶ້ງ, ໝອນ ແລະ ເຄື່ອງໃຊ້ທີ່ຈຳເປັນອື່ນໆໃນຄົວເຮືອນ ລວມເປັນມູນຄ່າທັງໝົດ 2,500,000 ກີບ ມອບໃຫ້ຄອບຄົວດັ່ງກ່າວຢ່າງທັນການ.