ມີເດຍລາວແຂວງບໍ່ແກ້ວ ພິທີປະກາດສ້າງຕັ້ງສະມາຄົມນັກທຸລະກິດໜຸ່ມແຂວງບໍ່ແກ້ວ ໄດ້ໄຂຂຶ້ນຢ່າງເປັນທາງການ ໃນຕອນເຊົ້ ວັນທີ 9 ກໍລະກົດ 2021 ຢູ່ທີ່ຫໍວັດທະນະທໍາແຂວງ, ໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ເຄື່ອນເພັດ ວົງຈັນ ຄະນະປະຈໍາພັກແຂວງ, ຮອງເຈົ້າແຂວງ ຜູ້ຊີ້ນໍາວຽກງານເສດຖະກິດ; ມີຄະນະປະຈໍາພັກແຂວງ, ກໍາມະການພັກແຂວງ, ຫົວໜ້າ – ຮອງຫົວໜ້າພະແນກການອ້ອມຂ້າງແຂວງ; ແຂກເຊີນຈາກຄະນະຊາວໜຸ່ມ ປປລ ແລະ ສະມາຄົມນັກທຸລະກິດໜຸ່ມນະຄອນຫຼວງວຽງຈັນ, ແຂວງຫຼວງນໍ້າທາ, ໄຊຍະບູລີ, ຫຼວງພະບາງ ແລະ ອຸດົມໄຊ,ຄະນະບໍລິຫານງານຊາວໜຸ່ມ ປປລ ແຂວງ, ເລຂາ – ຮອງເລຂາໜ່ວຍຊາວໜຸ່ມອ້ອມຂ້າງແຂວງເຂົ້າຮ່ວມຢ່າງພ້ອມພຽງ.

ໃນພິທີ ສະຫາຍ ນ. ດວງຕາ ໄຊຍະຫົງ ກໍາມະການພັກແຂວງ, ກໍາມະການສູນກາງຊາວໜຸ່ມ ເລຂາຄະນະບໍລິຫານງານຊາວໜຸ່ມ ປປລ ແຂວງ; ໄດ້ຂຶ້ນຜ່ານບົດລາຍງານການກະກຽມ, ການປຸກລະດົມສ້າງຕັ້ງສະມາຄົມນັກທຸລະກິດໜຸ່ມແຂວງ ເຊິ່ງໄດ້ຍົກໃຫ້ເຫັນຄວາມໝາຍສໍາຄັນ, ເຫດຜົນຂອງການສ້າງຕັ້ງ, ການກະກຽມເອກະສານຕ່າງໆທີ່ກ່ຽວຂ້ອງ, ຈັດກອງປະຊຸມປຶກສາຫາລື ແລະ ແຕ່ງຕັ້ງຄະນະຮັບຜິດຊອບປຸກລະດົມຂົນຂວາຍ; ຂໍທິດຊີ້ນໍາອົງການປົກຄອງແຂວງໃນແຕ່ລະໄລຍະ ແລະ ສະເໜີເຈົ້າແຂວງຂໍການພິຈາລະນາຕົກລົງສ້າງຕັ້ງສະມາຄົມນັກທຸລະກິດໜຸ່ມ;

ຈາກນັ້ນຄະນະຮັບຜິດຊອບໄດ້ຜ່ານຂໍ້ຕົກລົງຂອງທ່ານ ເຈົ້າແຂວງບໍ່ແກ້ວ ສະບັບເລກທີ 331/ຈຊ.ບກ, ລົງວັນທີ 19 ເມສາ 2021 ວ່າດ້ວຍການສ້າງຕັ້ງສະມາຄົມນັກທຸລະກິດໜຸ່ມແຂວງບໍ່ແກ້ວ ແລະ ຂໍ້ຕົກລົງວ່າດ້ວຍການບົ່ງຕົວແຕ່ງຕັ້ງຄະນະບໍລິຫານງານສະມາຄົມນັກທຸລະກິດໜຸ່ມແຂວງ ຈໍານວນ 11 ສະຫາຍ, ຍິງ 4 ສະຫາຍ; ໃນນີ້ແຕ່ງຕັ້ງ ສະຫາຍ ນ. ນົງລັກ ວິໄລສັກ ເປັນປະທານສະມາຄົມນັກທຸລະກິດໜຸ່ມແຂວງບໍ່ແກ້ວ; ແຕ່ງຕັ້ງຮອງປະທານຈໍານວນ 6 ສະຫາຍ ແລະ ກໍາມະການ ຈໍານວນ 4 ສະຫາຍ; ມີສະມາຊິກທັງໝົດ 41ຫົວໜ່ວຍທຸລະກິດ ໃນນີ້ເປັນສະມາຊິກສາມັນ 31ຫົວໜ່ວຍທຸລະກິດ ແລະ ສະມາຊິກວິສາມັນ 10ຫົວໜ່ວຍທຸລະກິດ.

ໂອກາດນີ້, ທ່ານ ເຄື່ອນເພັດ ວົງຈັນ ຄະນະປະຈໍາພັກແຂວງ ຮອງເຈົ້າແຂວງ ໄດ້ມີຄໍາເຫັນໂອ້ລົມ ເຊິ່ງທ່ານໄດ້ຍ້ອງຍໍຊົມເຊີຍຕໍ່ຄະນະບໍລິຫານງານຊາວໜຸ່ມ ປປລ ແຂວງທີ່ມີຄວາມເປັນເຈົ້າການໃນການປຸລະດົມຂົນຂວາຍ ແລະ ຮຽກຮ້ອງໃຫ້ຄະນະບໍລິຫານງານສະມາຄົມນັກທຸລະກິດໜຸ່ມແຂວງແບ່ງໜ້າທີ່ຄວາມຮັບຜິດຊອບໃນການຄຸ້ມຄອງບໍລິຫານຢ່າງຈະແຈ້ງ, ປະຕິບັດລະບອບສ່ອງແສງ – ລາຍງານໂດຍຍົກໃຫ້ເຫັນດ້ານອ່ອນຂໍ້ຄົງຄ້າງ, ຂໍ້ຫຍຸ້ງຍາກໃນການດໍາເນີນທຸລະກິດສະເໜີອໍານາດການປົກຄອງແຂວງຊ່ວຍເຫຼືອໃຫ້ທັນເວລາ; ເຄື່ອນໄຫວປົກປ້ອງສິດຜົນປະໂຫຍດອັນຊອບທຳຂອງນັກທຸລະກິດ;

ສ້າງຄວາມເຂົ້າໃຈເປັນເອກະພາບຕໍ່ແນວທາງນະໂຍບາຍຂອງພັກໃນແຕ່ລະໄລຍະໃຫ້ຈະແຈ້ງແລະພ້ອມກັນປະຕິບັດຢ່າງເຂັ້ມງວດ; ສ້າງໃຫ້ມີການພົບປະສະມາຊິກຢ່າງເປັນປະຈໍາເພື່ອແລກປ່ຽນຄໍາຄິດເຫັນໃນການພັດທະນາທຸລະກິດ, ສ້າງເງື່ອນໄຂໃຫ້ໄດ້ຮັບການຝຶກອົບຮົມ, ທັດສະນະສຶກສາຢູ່ຕ່າງເມືອງ, ຕ່າງແຂວງ, ຈັດການວາງສະແດງສິນຄ້າແລະກິດຈະກໍາອື່ນໆເພື່ອເປີດໂອກາດໃຫ້ສະມາຊິກໄດ້ເຂົ້າເຖິງຕະຫຼາດແລະແຫຼ່ງທຶນ, ສ້າງໃຫ້ກາຍເປັນເຄື່ອຂ່າຍທຸລະກິດທີ່ເຂັ້ມແຂງ; ເຕົ້າໂຮມບັນດານັກທຸລະກິດໜຸ່ມຫັນໜ້າເຂົ້າສູ່ການຈັດຕັ້ງ, ກໍ່ສ້າງຄະນະບໍລິຫານງານ, ສະມາຊິກໃຫ້ກາຍເປັນມະຫາຊົນທີ່ກ້າວໜ້າ ແລະ ເຂົ້າເປັນສະມາຊິກຂອງພັກໂດຍມອບໃຫ້ຄະນະພັກຄະນະຊາວໜຸ່ມແຂວງເປັນຜູ້ຕິດຕາມແລະກໍ່ສ້າງ;

ສ້າງຖັນແຖວນັກທຸລະກິດປະຕິວັດບໍ່ເນັ້ນແຕ່ຜົນກຳໄລພຽງຢ່າງດຽວແຕ່ຊອກຫາຜົນປະໂຫຍດມາສູ່ປະຊາຊົນບັນດາເຜົ່າ; ພ້ອມກັນນໍາໃຊ້ທ່າແຮງທີ່ຕັ້ງ, ພູມສັນຖານ, ຊັບພະຍາກອນທໍາມະຊາດແລະວັດທະນະທໍາເປັນທ່າແຮງໃນການພັດທະນາທຸລະກິດ, ຮ່ວມກັນສ້າງຜະລິດຕະພັນ, ສ້າງການບໍລິການໃຫ້ໄດ້ມາດຕະຖານ, ສ້າງແລະສົ່ງເສີມໃຫ້ຊາວໜຸ່ມກາຍເປັນຜູ້ປະກອບການ, ເປັນນັກທຸລະກິດເພື່ອຊ່ວຍຫຼຸດຜ່ອນອັດຕາການວ່າງງານແລະຫຼຸດຜ່ອນຄວາມທຸກຍາກຂອງປະຊາຊົນ ໄປພ້ອມກັບການເຕົ້າໂຮມຄວາມສາມັກຄີແໜ້ນແຟ້ນ ໃຕ້ຮົ່ມທຸງຂອງພັກ, ຊ່ວຍເຫຼືອເຊິ່ງກັນແລະກັນ, ສ້າງຄວາມສາມັກຄີລະຫວ່າງຜູ້ປະກອບການໜຸ່ມໃນຂອບເຂດທົ່ວແຂວງໃຫ້ເປັນອັນໜຶ່ງອັນດຽວເພື່ອກຽມຄວາມພ້ອມກໍາລັງແຮງສູ້ຮົບທາງດ້ານເສດຖະກິດທີ່ຢູ່ຄຽງຂ້າງພັກຢ່າງສະເໝີຕົ້ນສະເໝີປາຍແນ່ໃສ່ປະກອບສ່ວນຢ່າງຕັ້ງໜ້າເຂົ້າໃນການສ້າງສາພັດທະນາແຂວງບໍ່ແກ້ວໃຫ້ຈະເລີນຮັ່ງມີຂຶ້ນເລື້ອຍໆ.