ປະຈຸບັນພຶດຕິກຳຂອງຄົນເຮົາມີແບບຜິດໆ ຫຼາຍຢ່າງ ໂດຍສະເພາະພຶດຕິກຳໃນຕອນເຊົ້າທີ່ຍັງເຮັດເປັນກິດຈະກຳປະຈຳວັນ ທັງໆ ທີ່ຮູ້ວ່າມັນຜິດ ຫຼື ບາງຄົນກໍ່ອາດຈະບໍ່ຮູ້ວ່າສີ່ງນັ້ນຄວນເຮັດ ຫຼື ບໍ່ຄວນເຮັດ? ເຮົາມາແຊປະສົບການ “ສີ່ງທີ່ບໍ່ຄວນເຮັດ” ໃນຕອນເຊົ້າ ເຊີ່ງຖືວ່າເປັນວິທີງ່າຍໆ ແລະ ເປັນການເລີ່ມຕົ້ນໃນມື້ໃໝ່ທີ່ດີ ດັ່ງນັ້ນ ມາເບີ່ງນຳກັນເລີຍວ່າພຶດຕິກຳໃດແດ່? ທີ່ເຮັດເປັນກິດຈະ ກຳປະຈຳວັນ ແລະ ເປັນຄວາມຜິດພາດທີ່ທ່ານບໍ່ຄວນເຮັດໃນຕອນເຊົ້າ ພ້ອມຂໍ້ແນະນຳທີ່ຈະເຮັດໃຫ້ທ່ານປ່ຽນໄລຍະຕອນເຊົ້າເປັນໄລຍະເວລາທີ່ດີທີ່ສຸດ.

ອາບນໍ້າອຸ່ນ

ການອາບນໍ້າອຸ່ນໃນຕອນເຊົ້າຫຼັງຈາກທີ່ຕື່ນນອນເຮັດໃຫ້ທ່ານຮູ້ສຶກດີ ແຕ່ມັນບໍ່ໄດ້ເຮັດໃຫ້ທ່ານຕື່ນ ຫຼື ສົດຊື່ນປານໃດແມ່ນບໍ່? ຍ້ອນຄວາມຮ້ອນຂອງນໍ້າເຮັດໃຫ້ຮ່າງກາຍຕ້ອງຜ່ອນຄາຍ ການເຕັ້ນຂອງຫົວໃຈຊ້າລົງກໍ່ເປັນໄດ້ ແລະ ຍັງເຮັດໃຫ້ທ່ານຮູ້ສຶກຍັງຢາກນອນ ດັ່ງນັ້ນ ຄວນອາບນໍ້າເຢັນໃນຕອນເຊົ້າຈະດີທີ່ສຸດທີ່ຈະເຮັດໃຫ້ຕື່ນ ແລະ ເຮັດໃຫ້ທ່ານອາລົມດີ ເພາະຄວາມເຢັນຈະເຮັດໃຫ້ສະໝອງຂອງທ່ານປ່ອຍສານເອນໂດຣຟິນ ເຮັດໃຫ້ທ່ານຮູ້ສຶກດີ ແລະ ຍັງປ່ອຍສານອະດິນາລິນນຳອີກ.

ການເລື່ອນໂມງປຸກ

ບາງເທື່ອການຕື່ນມາພ້ອມກັບສຽງປຸກ ຫຼື ສະຖານະການບໍ່ພືງປະສົງ ກໍ່ບໍ່ສາມາດຫຼີກລ່ຽງໄດ້ ພ້ອມດຽວກັນຍັງເຮັດໃຫ້ຮູ້ສຶກງຸດງິດ ແລະ ລຳຄານໃຈນຳອີກ ເພາະການຕື່ນນອນຈາກສຽງປຸກເທື່ອທີ 2 ຫຼື ເທື່ອທີ 3 ສາມາດເຮັດໃຫ້ສະໝອງຂອງທ່ານສັບສົນ ອິດອ່ອນໄປຕະຫຼອດມື້ ນັ້ນໝາຍຄວາມວ່າທ່ານຈະຮູ້ສຶກຢາກນອນເປັນເວລາຫຼາຍຊົ່ວໂມງ ຊື່ງທ່ານລອງປັບວິທີການຕື່ນໃໝ່ ເຊັ່ນ: ໃຊ້ສຽງເພັງທີ່ທ່ານມັກເປັນໂຕປຸກໃນຕອນເຊົ້າ ຫຼື ອາດຈະເຂົ້ານອນໄວກ່ວາປົກກະຕິ.

ບໍ່ກິນເຂົ້າເຊົ້າ

ເຂົ້າເຊົ້າເປັນອາຫານທີ່ສຳຄັນທີ່ສຸດ ເຊື່ອວ່າຫຼາຍຄົນເຄີຍຈະໄດ້ຍິນປະໂຫຍກນີ້ ແຕ່ຄົນສ່ວນຫຼາຍບໍ່ມັກໃຫ້ຄວາມສຳຄັນ ແລະ ເບີ່ງຂ້າມການກິນອາຫານເຊົ້າ ຜູ້ຂຽນເອງກໍ່ເປັນຄືກັນ ເຊີ່ງເຊື່ອວ່າຄົງມີຫຼາຍທ່ານເປັນຄືກັນ ນີ້ກໍ່ເປັນສາເຫດດຽວກັນກັບການປະພຶດຕົນໃນຕອນເຊົ້າ ເພາະຄົນສ່ວນຫຼາຍມັກເບີ່ງຂ້າມອາຫານເຊົ້າບໍ່ສຳຄັນ ຫຼື ອາດຈະເປັນອາຫານທີ່ບໍ່ມີຄຸນຄ່າທາງໂພຊະນາການ ດັ່ງນັ້ນ ຄວນກິນເຂົ້າເຊົ້າທີ່ເຕັມໄປດ້ວຍສານອາຫານ ຄື: ຜັກ ໝາກໄມ້ ປະສົມກັບຄາຣ໌ໂບໄຮເດຣດ ແລະ ໂປຣຕີນ ເພື່ອເຮັດໃຫ້ຮ່າງກາຍມີພະລັງງານເຫຼືອໃຊ້ໝົດມື້.

ການເບີ່ງໂທລະສັບ

ພຶດຕິກຳນີ້ເປັນພຶດຕິກຳທີ່ທຸກຄົນມັກເຮັດເປັນປະຈຳຫຼາຍທີ່ສຸດຂອງຄົນໃນຍຸກນີ້ ຍຸກທີ່ທຸກຢ່າງເຄື່ອນໄຫວໄປກັບໂຊຊ້ຽວມີເດຍ ຊື່ງເຮັດໃຫ້ເຮົາຮູ້ປະເດັນຕ່າງໆ ເຖີງບ່ອນນອນໃນຕອນເຊົ້າ ແລະ ສາມາດເລືອກສະໄລໃນໜ້າຈໍເບີ່ງຂ່າວສານ, ອີເມວ… ແລະ ເປັນຄວາມຈີງແທ້ ຖ້າເຮົາບໍ່ເບີ່ງກໍ່ຈະກາຍເປັນຄົນຕົກກະແສ ແລະ ບໍ່ຮູ້ການເຄື່ອນໄຫວຕະຫຼອດເວລາ ແຕ່ທ່ານຮູ້ບໍ່ວ່າພຶດຕິກຳແບບນີ້ບໍ່ຄວນເຮັດຢ່າງຍີ່ງຫຼັງຈາກຕື່ນນອນ ກໍ່ຮູ້ວ່າຂໍ້ມູນທຸກຢ່າງຢູ່ໃນມືຖືທັງໝົດ ແຕ່ກໍ່ບໍ່ຈຳເປັນຕ້ອງເປີດອ່ານທັນທີຫຼັງຈາກຕື່ນນອນຕອນເຊົ້າ. ຖ້າຫຼີກລ່ຽງໄດ້ກໍ່ຄວນຫຼີກລ່ຽງ ແຕ່ຖ້າວຽກຈຳເປັນຕ້ອງເຊັກໃນມືຖືແທ້ໆ ຫຼື ອົດໃຈບໍ່ໄດ້ແທ້ໆ ສີ່ງທີ່ຕ້ອງເຮັດກໍ່ຄື ເລືອກເສບຂ່າວ, ຂໍ້ມູນ, ບົດຄວາມທີ່ເປັນທາງບວກເທົ່ານັ້ນ ຄວນເບີ່ງແຕ່ເພດທີ່ສ້າງສັນ ເພດໃຫ້ຂໍ້ຄິດີໆ ສັ້ນໆ.

ການດື່ມກາເຟໃນຕອນເຊົ້າ

ບໍ່ແມ່ນເລື່ອງຜິດຖ້າທ່ານຈະດື່ມກາເຟໃນຕອນເຊົ້າເປັນສິ່ງທີ່ທຳອິດ ແຕ່ບໍ່ຄວນດື່ມຫຼັງຈາກຕື່ນນອນໃນຕອນເຊົ້າ ສີ່ງທຳອິດທີ່ຄວນເຮັດແມ່ນການດື່ມນໍ້າ ເພາະຈະເຮັດໃຫ້ທ່ານສົດຊື່ນ ແລະ ມັນຈະຊ່ວຍເຮັດໃຫ້ລະບົບເມຕາບໍລິຊືມ ຂອງທ່ານເຮັດວຽກໃຫ້ດີຂື້ນ ນອກຈາກນີ້ຍັງສົ່ງຜົນດີຕໍ່ລຳໃສ້ ເພາະມັນຈະຖ່າຍສານພິດອອກຈາກຮ່າງກາຍ ຊ່ວຍປ້ອງກັນການເຈັບທ້ອງ ຊ່ວຍໃຫ້ຮ່າງກາຍຕື່ນຕົວ ແລະ ນໍ້າຍັງເປັນສ່ວນຊ່ວຍໃນການຄວບຄຸມການເຮັດວຽກຂອງຮ່າງກາຍ ແລະ ສະໝອງ ຊື່ງຈະມີຜົນຕໍອາລົມຂອງທ່ານໃນແຕ່ລະມື້ ແລະ ຄວນເປັນນໍ້າໃນອຸ່ນຫະພູມໃນຫ້ອງເທົ່ານັ້ນ.

ປິດຜ້າກັ້ງ

ແສງສະຫວ່າງໃນຕອນເຊົ້າຈະເປັນວິທີປຸກຄົນໃຫ້ຕື່ນໄດ້ດີ ແສງແດດທຳມະຊາດເຮັດໃຫ້ຄໍຕິຊອລ ໃນຮ່າງກາຍປ່ອຍອອກມາ ຊື່ງສາມາດເຮັດໃຫ້ທ່ານມີສະມາທິ ແລະ ຕັດສິນໃຈໄດ້ຢ່າງສະຫຼາດສະຫຼຽວຕະຫຼອດໝົດມື້.

ການມ້ຽນບ່ອນນອນ

ການມ້ຽນບ່ອນນອນໃນຕອນເຊົ້າເປັນສີ່ງທີ່ງ່າຍ ແລະ ໄວ ແຕ່ຫຼາຍຄົນກໍ່ຍັງປະລະເລີຍທີ່ຈະມ້ຽນ ເພາະຄິດວາການມ້ຽນບ່ອນນອນບໍ່ເປັນປະໂຫຍດ ແລະ ເຮັດໃຫ້ເສຍເວລາ ແຕ່ທ່ານຮູ້ບໍ່ວ່າການມ້ຽນບ່ອນນອນສາມາດເຮັດໃຫ້ທ່ານປະສົບຜົນສຳເລັດໄດ້ ເພາະການມ້ຽນຕຽງນອນ ຫຼື ບ່ອນນອນໃນຕອນເຊົ້າ ກໍ່ຄືກັນກັບເປັນການຝຶກວິໄນຂອງທ່ານເອງ ເພາະຖ້າເຮັດສີ່ງນີ້ແລ້ວໃນຕອນເຊົ້າມັນຈະສົ່ງຜົນໃຫ້ທ່ານຢາກເຮັດສີ່ງອື່ນໆ ນຳອີກ ແລະ ທ່ານຈະໄດ້ເຮັດຢ່າງມີປະສິດທິພາບ ແລະ ມີແຮງບັນດານໃຈໃນການຈັດການກັບສີ່ງທີ່ຕ້ອງພົບໃນມື້ນັ້ນ.

ການຢືດຮ່າງກາຍ ແລະ ອອກກຳລັງກາຍ

ເມື່ອທ່ານຕື່ນນອນ ສີ່ງທຳອິດທີ່ເຮັດໃນຕອນເຊົ້າກໍ່ຄືການເຊັກເມວ ໂທລະສັບ ແລະ ເລີ່ມຕົ້ນກັບເລື່ອງຫຍຸ້ງໆ ທ່ານເປັນແນວນັ້ນ ຫຼື ບໍ່? ກໍ່ຄືກັບທຸກໆ ມື້ໃນຕອນເຊົ້າ ທ່ານຕື່ນນອນກໍ່ຈະເຂົ້່າສູ່ພາວະປົກກະຕິນັ້ນກໍ່ຄືການເຮັດວຽກ ຊື່ງຟັງຄືເປັນເລື່ອງທຳມະດາແຕ່ມັນເປັນຜົນຮ້າຍຫຼາຍກ່ວາຜົນເສຍ ເພາະທ່ານຍັງບໍ່ໄດ້ວອມອັບສະໝອງ ແລະ ຮ່າງກາຍໃຫ້ກຽມພ້ອມຮັບມືກັບທຸກຢ່າງ.

ທ່ານຄວນຫາເວລາຕອນເຊົ້າເພື່ອເຮັດສະມາທິ ອອກກຳລັງກາຍ ຫຼື ເຮັດບາງຢ່າງທີ່ທ່ານມັກ ຊື່ງເປັນການ “Reset” ສະໝອງຂອງທ່ານໃຫ້ດີຂື້ນ ເພື່ອໃຫ້ມີສະມາທິພຽງພໍກັບການເຮັດວຽກໃນມື້ໃໝ່ໄດ້ຢ່າງມີປະສິດທິພາບໃຫ້ຫຼາຍທີ່ສຸດ.

ຖູແຂ້ວຫຼັງອາຫານເຊົ້າ

ທ່ານຈະສັງເກດເຫັນວ່າໃນຕອນເຊົ້າທ່ານມັກບໍລິໂພກສີ່ງທີ່ເປັນກົດ ເຊັ່ນ: ຊາ ກາເຟ ຫຼື ໝາກໄມ້ ຊື່ງກົດນັ້ນຈະເຄືອບໃນແຂ້ວຂອງທ່ານ ຍ້ອນແນວນີ້ທ່ານຄວນຖູແຂ້ວຫຼັງອາຫານເຊົ້າ.

ລົມໂທລະສັບ

ເວລາຕື່ນນອນໃໝ່ໆ ໃນຕອນເຊົ້າຄົງຈະບໍ່ມີໃຜພ້ອມຈະລົມໂທລະສັບດອກ ແລະ ກໍ່ເປັນເຫດຜົນໜື່ງທີ່ວ່າທ່ານຄວນຈະລົມກັບສາຍທີ່ສຳຄັນໃນຕອນບ່າຍ ແທນທີ່ຈະເປັນຕອນເຊົ້າ ຖ້າໃຫ້ດີຄວນຈະຖ້າເຖີງປະມານ 9:30 ຈີ່ງເລີ່ມລົມໂທລະສັບ ແຕ່ຖ້າຫາກທ່ານຈຳເປັນຕ້ອງຕິດຕໍ່ກັບບາງຄົນທີ່ສຳຄັນ ການສົ່ງຂໍ້ຄວາມບອກເຂົາກ່ອນກໍ່ເປັນວິທີທີ່ດີເພື່ອໃຫ້ເຂົາຮູ້ເຖີງພາລະກິດທີ່ເຂົາຈະຕ້ອງລົມກັບທ່ານ.

ພຶດຕິກຳທີ່ກ່າວມາຂ້າງເທີງນັ້ນມັກຈະເກີດຂື້ນກັບໂຕເຮົາ ແລະ ຄົນອ້ອມຂ້າງເຮົາ ດັ່ງນັ້ນ ຕ້ອງຮີບປ່ຽນແປງຕົນເອງດ່ວນ ເພາະການລົງທຶນທີ່ແພງທີ່ສຸດແມ່ນເຮັດໃຫ້ຮ່າງກາຍ ແລະ ຈິດໃຈ ສົດຊື່ນແຈ່ມໃສ ແລະ ພຶດຕິກຳໃນຕອນເຊົ້າຈະບອກໄດ້ວ່າມື້ນີ້ທ່ານຈະເປັນແບບໃດ? ອາລົມແນວໃດ? ຊື່ງ “ໝາຍຄວາມວ່າພຶດຕິກຳໃນຕອນເຊົ້າຂອງທ່ານເອງນັ້ນແລະ ທີ່ເປັນສີ່ງກຳນົດຊີວິດຂອງທ່ານ”