ມີເດຍລາວແຂວງສາລະວັນ
ແຂວງສາລະວັນ ຈັດພິທີສະເຫຼີມສະຫຼອງ ວັນສ້າງຕັ້ງກິລາ-ກາຍະກຳແຫ່ງຊາດລາວ ຄົບຮອບ 55 ປີ, ຕອນເຊົ້າວັນທີ 9 ກໍລະກົດ 2021 ສະໂມສອນຂອງແຂວງ ເຂົ້າຮ່ວມໃນພິທີໂດຍທ່ານ ປອ ໂພໄຊ ໄຊຍະສອນ ກຳມະການສູນກາງພັກ ເລຂາພັກແຂວງ ເຈົ້າແຂວງ ສາລະວັນ, ມີບັນດາທ່ານຄະນະປະຈຳພັກແຂວງ, ກຳມະການພັກແຂວງ, ບັນດາຫົວໜ້າພະແນກ-ຮອງຫົວໜ້າພະແນກອ້ອມຂ້າງແຂວງ, ກົມກອງ, ຫ້ອງການ, ລັດວິສະຫະກິດ, ພະນັກງານລັດທະກອນ, ອຳນາດການປົກຄອງບ້ານ ແລະພໍ່ແມ່ປະຊາຊົນ ບ້ານເທດສະບານເມືອງສາລະວັນເຂົ້າຮ່ວມ.

ໃນພິທີ ທ່ານ ສີລິສັກ ຖະໜອມຮັກ ຫົວໜ້າພະແນກສຶກສາທິການ ແລະ ກິລາແຂວງ, ໄດ້ຂຶ້ນຜ່ານປະຫວັດຄວາມເປັນມາຂອງວັນປະຫວັດສາດຂອງວຽກງານກິລາກາຍະກຳ ເຊິ່ງທ່ານໄດ້ເລົ່າໃຫ້ຮູ້ວ່າ: ກິລາ – ກາຍະກໍາແຫ່ງຊາດລາວ ນັ້ນແມ່ນປະກົດມາແຕ່ດົນນານແລ້ວ ນັບແຕ່ທ້າຍສະຕະວັດທີ XX ສືບເນື່ອງມາຈາກການປະຍຸກບັນດາອາວຸດ ຍຸດທະພັນທີ່ໃຊ້ສຳລັບການເຮັດເສິກສົງຄາມເພື່ອຕໍ່ສູ້ປົກປ້ອງປິຕຸພູມກັບພວກສັດຕູ ໃຫ້ກາຍມາເປັນເຄື່ອງມືເພື່ອການກິລາເຊັ່ນ: ກິລາແລ່ນ, ຍິງໜ້າ, ຍິງທະນູ, ຍິງປືນ, ຟັນດາບ, ຕີມວຍ, ມວຍປ້ຳ, ຊັດຫຼອກ ແລະ ຊັດຫຼາວເຫຼົ່ານີ້ເປັນຕົ້ນ,

ແຂ່ງຂັນກິລາຍັງສ້າງຄວາມເບີກບານມ່ວນຊື່ນ ແລະ ຄວາມສາມັກຄີຮັກແພງເຊິ່ງກັນ ແລະ ກັນ, ຜ່ານມາໄດ້ມີການແຂ່ງຂັນໃນວົງການແຄບ ຂະຫຍາຍອອກສູ່ວົງການກ້ວາງ -ຈາກລະດັບທ້ອງຖິ່ນໄປສູ່ລະດັບຊາດ ແລະ ສາກົນ. ວັນສ້າງຕັ້ງກິລາ – ກາຍະກໍາແຫ່ງຊາດລາວແມ່ນໄດ້ປະກາດສ້າງຕັ້ງ ຂື້ນໃນວັນທີ 13 ກໍລະກົດ ປີ 1966 ໂດຍແມ່ນທ່ານ ພົນເອກ ສີສະຫວາດ ແກ້ວບຸນພັນ ຫົວໜ້າເສນາທິການສູງສຸດ ກອງທັບປົດປ່ອຍປະຊາຊົນລາວເປັນຜູ້ປະກາດແຕ່ງຕັ້ງ ໃນສະໄໜນັ້ນ ແລະ ນັ້ນຄືຂີດໜາຍແຫ່ງການກຳເນີດກິລາລາວສູ່ຍຸກສະໄໜ ຫຼັງຈາກປະເທດຊາດໄດ້ຮັບການສະຖາປະນາ ວົງການກິລາລາວ ເປັນພຽງກົມໜຶ່ງທີ່ຂຶ້ນກັບກະຊວງສຶກສາທິການ ຈົນມາຮອດປີ 1993 ລັດຖະບານຈຶ່ງໄດ້ຕົກລົງຍົກຖານະຂອງກົມກິລາຂຶ້ນ ເປັນຄະນະກຳມະການກິລາແຫ່ງຊາດໂດຍມີບົດບາດເທົ່າທຽມກັບທະບວງ ເຮັດໃຫ້ວຽກງານກິລາ – ກາຍະກຳລາວ ໃນໄລຍະນີ້ ໄດ້ມີການເຕີບໃຫຍ່ຂະຫຍາຍຕົວ ທັງດ້ານປະລິມານ ແລະຄຸນນະພາບ ຈາກສູນກາງລົງເຖິງທ້ອງຖິ່ນ.

ວຽກງານກິລາແມ່ນເປັນວຽກງານທີ່ສໍາຄັນ ແລະ ພ້ອມກັນປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມຂອງຊາດ-ທ້ອງຖິ່ນ ແລະເຕົ້າໂຮມຄວາມສາມັກຄີໃຫ້ເປັນປຶກແຜ່ນແໜ້ນໜາ ທັງເປັນການສົ່ງເສີມໃຫ້ຊາວໝຸ່ມ – ເຍົາວະຊົນ ກໍ່ຄືທົ່ວສັງຄົມຫັນມາຫິ້ນກິລາ ເພື່ອສຸຂະພາບ ໃຫ້ມີຮ່າງກາຍທີ່ແຂງແຮງ, ສວຍງາມ ມີຈິດໃຈເບີກບານມ່ວນຊື່ນ ສະໝອງໄດ້ຮັບການພັດທະນາ ມີຄວາມຊຳນິຊຳນານ ມີປະສົບການທາງດ້ານເທັກນິກ ມີມິດຕະພາບ ແລະ ການນໍາໃຊ້ເວລາຫວ່າງໃຫ້ເກີດປະໂຫຍດ ແລະມີຄຸນຄ່າ, ບໍ່ມົ້ວສຸມກັບສິ່ງເສບຕິດອື່ນໆ.

ຈາກນັ້ນຂະບວນການເຕັ້ນແອໂຣບິກເພື່ອສຸຂະພາບ ກໍ່ໄດ້ເລີ່ມຕົ້ນຂຶ້ນທີ່ເດີ່ນສະໂມສອນຂອງແຂວງ ຢ່າງມີບັນຍາກາດຟົດຟື້ນ ແລະ ເບີກບານມ່ວນຊື່ນ ເຕັມໄປດ້ວຍຄວາມໜາຍຄວາມສຳຄັນ, ຄວາມາມັກຄີ ນຳໃຈນັກກິລາ ແລະ ໄມຕີຈິດທີ່ດີຕໍ່ກັນ.
ໂດຍ: ກິນດາວັນ ອ້ວນນາຄູ