ມີເດຍລາວແຂວງເຊກອງ (ຂ່າວ:ຫຼານປູ່)
ການແຂ່ງຂັນກິລາບານເຕະຊິງຂັນທ່ານເຈົ້າແຂວງຄັ້ງທີ II ປະຈຳປີ 2021ທີ່ຈະເປີດສາກຂຶ້ນໃນທ້າຍເດືອນ ກໍລະກົດ 2021ນີ້ ທິມບານເຕະຊາຍຊຸດໃຫຍ່ຈາກແດນວິລະຊົນເມືອງດາກຈຶງຕັ້ງເປົ້າຈະເຮັດໃຫ້ດີກວ່າຄັ້ງກ່ອນ,ໃນງານແຂ່ງຂັນກິລາບານເຕະເພື່ອຂໍ່ານັບຮັບຕ້ອນ ບັ້ນເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະພາປະຊາຊົນແຂວງຊຸດທີ II ທີ່ແຂວງເຊກອງ ເຊິ່ງຄັ້ງນັ້ນທິມເມືອງດາກຈຶງສາມາດຍາດໄດ້ຮອງຊະນະເລີດອັນດັບ I.

ທ່ານ ພູວົງ ໝັ້ນຍືນ ຫົວໜ້າໜ່ວຍງານ ກິລາ-ກາຍະກຳ ຫ້ອງການສຶກສາທິການ-ກິລາ ເມືອງດາກຈຶງ ທັງເປັນຫົວໜ້າຄູຝຶກນັກກິລາໃຫ້ຮູ້ວ່າ: ສຳລັບການກະກຽມນັກກິລາທຶມປະສົມເມືອງດາກຈຶງເພື່ອຮ່ວມແຂ່ງຂັນບານເຕະຊິງຂັນທ່ານເຈົ້າແຂວງຄັ້ງທີ II ປະຈຳປີ 2021ແມ່ນໄດ້ເລີ່ມເກັບໂຕຝຶກຊ້ອມມາແຕ່ວັນທີ 15 ມີຖຸນາ 2021 ມາຮອດປະຈຸບັນເຫັນວ່າມີຄວາມພ້ອມເຕັມຮ້ອຍທີ່ຈະເຂົ້າຮ່ວມການແຂ່ງຂັ້ນທັງເລື່ອງເຕັກນິກການຫຼິ້ນ ແລະ ດ້ານກຳລັງແຮງ,ກຳລັງໃຈຂອງນັກກິລາແມ່ນມີເຕັມ 100% ແລະ ພ້ອມທີ່ຈະສູ້ເອົາແຊ້ມລາງວັນຊະນະເລີດມາຕ້ອນພີ່ນ້ອງຊາວເມືອງດາກຈຶງ,ທັງນີ້ ກໍ່ຍ້ອນຄວາມເອົາໃຈໃສ່ຂອງຄະນະນຳທຸກພາກສ່ວນຂອງເມືອງ,ໂດຍສະເພາະຄະນະສະຫະພັນບານເຕະເມືອງທີ່ໄດ້ເອົາໃຈໃສ່ໃກ້ຊິດຕິດແທດ ແລະ ກະຕຸກຊຸກຍູ້ສົ່ງເສີມ ທັບນັກກິລາຂອງເມືອງໄດ້ດີຕະຫຼອດມາ ລວມທັງ ຫຼາຍພາກສ່ວນບຸກຄົນ,ຫ້າງຮ້ານ, ບໍລິສັດ ແລະ ເອກະຊົນ ທີ່ໄດ້ໃຫ້ການ ປະກອບສ່ວນ ອຸປະຖຳ ສົ່ງເສີມ ທາງດ້ານວັດຖຸ ແລະ ຈິດໃຈ ໃນການເຂົ້າຮ່ວມງານແຂ່ງຂັນໃນຄັ້ງນີ້ ຢ່າງຫຼວງຫຼາຍ, ແລະ ອີກດ້ານໜຶ່ງກໍ່ ຍ້ອນຄວາມຕັດສິນໃຈເສຍສະລະສູງ ດ້ານເຫື່ອແຮງ , ສະຕິປັນຍາ ແລະ ມີຄວາມສາມັກຄີ ເປັນເລີດ ຂອງຄະນະນຳຄູເຝິກ ແລະ ນັກກິລາ ທີ່ຈະເຂົ້າຮ່ວມງານແຂ່ງຂັນກິລາໃນຄັ້ງນີ້ໃຫ້ໄດ້ຮັບຜົນສຳດີທີ່ສຸດ.


ພ້ອມນີ້ທ່ານຫົວໜ້າກິລາ-ກາຍະກຳ ຍັງໄດ້ກ່າວສະແດງຄວາມຂອບໃຈຢ່າງລົ້ນເຫຼືອ ຕໍ່ທຸກພາກສ່ວນ ທີ່ໄດ້ໃຫ້ການອຸປະຖຳ ແລະ ຊຸກຍູ້ສົ່ງເສີມ ທັບນັກກິລາທິມຂອງຕົນ ໃຫ້ໄດ້ເຂົ້າຮ່ວມງານແຂ່ງຂັນໃນຄັ້ງນີນີ້ ແລະ ສັນຍາວ່າຈະພະຍາມເຮັດໃຫ້ດີທີ່ສຸດ ແລະ ສູ້ຢ່າງສຸດຄວາມສາມາດ,ສູ້ໃຫ້ສົມສັກສີ ເພື່ອນໍາເອົາໄຊຊະນະ ມາໃຫ້ພີ່ນ້ອງຊາວເມືອງດາກຈຶງ.