ມີເດຍລາວແຂວງບໍ່ແກ້ວ ຂ່າວ-ພາບ: ສອນສຸພານິດ ໄຊຍະກອນ
ວັນທີ 21 ກໍລະກົດ 2021 ນີ້ຄະນະບໍລິຫານງານສະຫະພັນແມ່ຍິງເມືອງ ຜາອຸດົມ ແຂວງບໍ່ແກ້ວ ໄດ້ປາຖະກະຖາເລົ່າຄືນມູນເຊື້ອວັນສ້າງຕັ້ງສະຫະພັນແມ່ຍິງລາວ ຄົບຮອບ 66 ປີ ຂຶ້ນຢູ່ທີ່ສະໂມສອນເມືອງ; ໂດຍການເປັນປະທານຂອງ ທ່ານ ຈັນທອນ ພົນທະລາ ກຳມະການພັກແຂວງ ເລຂາພັກເມືອງ ເຈົ້າເມືອງໆຜາອຸດົມ ເຂົ້າຮ່ວມມີຄະນະປະຈໍາພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ຄະນະບໍລິຫານສະຫະພັນແມ່ຍິງເມືອງ ຕະຫຼອດຮອດຫົວໜ້າສະຫະພັນແມ່ຍິງຂັ້ນບ້ານ ເຂົ້າຮ່ວມ.

ທ່ານ ສຸນທອນ ວັນສະຫວ່າງ ຄະນະປະຈໍາພັກເມືອງ ປະທານແນວລາວສ້າງຊາດ ໄດ້ກ່າວວ່າ: ເພື່ອເປັນການທົບທວນຫວນຄືນປະຫວັດມູນເຊື້ອ ການກຳເນີດເຕີບໃຫຍ່ຂະຫຍາຍຕົວ ຂອງອົງການຈັດຕັ້ງສະຫະພັນແມ່ຍິງລາວ ໄດ້ປະກອບສ່ວນອຸທິດຕົນເພື່ອພາລະກິດຕໍ່ສູ້ປົດປ່ອຍຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ ກໍ່ຄືພາລະກິດພັດທະນາແມ່ຍິງລາວ ຕະຫຼອດໄລຍະ 66 ປີຜ່ານມາ, ອົງການຈັດຕັ້ງສະຫະພັນເເມ່ຍິງໄດ້ຮັບການສ້າງຕັ້ງຂື້ນພາຍໃຕ້ການຊີ້ນຳນຳພາຂອງພັກປະຊາຊົນລາວ ເພື່ອຮັບຜິດຊອບໂດຍກົງຕໍ່ພາລະກິດປະຫວັດສາດຂອງການປະຕິວັດລາວ ແລະ ຖືວ່າແມ່ຍິງເປັນສ່ວນໜຶ່ງໃນກຳລັງແຮງທີ່ສຳຄັນຂອງພັກ, ການຕໍ່ສູ້ປະຕິວັດຂອງແມ່ຍິງໃນໂລກ ທີ່ເລັ່ງທວງໃຫ້ປະຕິບັດສິດເສລິພາບ, ຄວາມສະເໝີພາບ ລະຫວ່າງ ຍິງ-ຊາຍ ທາງດ້ານການເມືອງ-ເສດຖະກິດ, ວັນທະນະທຳສັງຄົມ, ສະນັ້ນ, ອົງການຈັດຕັ້ງແມ່ຍິງຂັ້ນຮາກຖານຈື່ງໄດ້ເກີດຂື້ນໂດຍການເລີ່ມຈາກ ການຈັດຕັ້ງໜ່ວຍແມ່ຍິງນັກຮົບຢູ່ຊົນນະບົດ (ໜ່ວຍຍຸວັນນາລີ ຢູ່ຕາມຕົວເມືອງ) ການຈັດຕັ້ງດັ່ງກ່າວ, ໄດ້ເຄື່ອນໄຫວ ແລະ ເຕີບໃຫຍ່ຂະຫຍາຍຕົວ ນັບມື້ນັບກວ້າງຂວາງ, ມາຮອດວັນທີ 20 ກໍລະກົດ 1955 ພັກໄດ້ຈັດຕັ້ງໜ່ວຍຄົ້ນຄວ້າວຽກງານແມ່ຍິງຂື້ນຢ່າງເປັນທາງການເຊິ່ງ ເປັນຕົ້ນກຳເນີດຂອງອົງການຈັດຕັ້ງສະຫະພັນແມ່ຍິງລາວປະຈຸບັນ.

ທັງນີ້, ກໍ່ເພື່ອເຮັດໃຫ້ອົງການຈັດຕັ້ງສະຫະພັນເເມ່ຍິງຂັ້ນເມືອງ-ຂັ້ນບ້ານ ໄດ້ຮັບຮູ້ເຂົ້າໃຈ ເຖິງມູນເຊື້ອອັນອົງອາດກ້າຫານຂອງສະຫະພັນເເມ່ຍິງລາວເຂົ້າຮ່ວມຈັດຕັ້ງປະຕິບັດ 2 ໜ້າທີຍຸດທະສາດຄື: ປົກປັກຮັກສາ ເເລະ ສ້າງສາພັດທະນາປະເທດຊາດ ເປັນເຈົ້າການຮັກສາປະເພນີອັນດີງາມຂອງຊາດຂອງເຜົ່າ ເວົ້າລວມກໍຄື ການພັດທະນາເເມ່ຍິງໃນທຸກດ້ານ ເເລະ ເອົາໃຈໃສ້ເສີມຂະຫຍາຍມູນເຊື້ອພິລະອາດຫານ ໃຫ້ເອື້ອຍນ້ອງເເມ່ຍິງຮໍ່າຮຽນເອົາຄຸນສົມບັດ, ສິນທຳປະຕິວັດອັນດີງາມຂອງເເມ່ຍິງອາວຸໂສ ຮັກສາມູນເຊື້ອການຊີ້ນໍາ-ນຳພາຂອງແມ່ຍິງລາວລຸ້ນກ່ອນໄວ້ໃຫ້ໝັ້ນຄົງ ແລະ ຕັ້ງໜ້າປະຕິບັດຄຳຂວັນທີ່ວ່າ: ພັດທະນາຄວາມສະເໝີພາບຍິງ-ຊາຍຕິດພັນກັບການພັດທະນາປະເທດຊາດ ແລະ ປະຕິບັດຂະບວນການແຂ່ງຂັນ 3 ດີ ຂອງແມ່ຍິງລາວ ໃຫ້ປະກົດຜົນສຳເລັດ.