ມີເດຍລາວແຂວງເຊກອງ (ຂ່າວ:ສີສັກດາ)
ວັນທີ 21 ກໍລະກົດ 2021 ນີ້ ຢູ່ທີ່ສູນໂຮງຮຽນ ມສ ເມືອງດາກຈຶງແຂວງ ເຊກອງ ໄດ້ເປີດພິທີການສອບເສັງຈົບຊັ້ນມໍ 4 ປະຈໍາສົກຮຽນ 2020-2021 ຂຶ້ນຢ່າງເປັນທາງການ, ພາຍໃຕ້ການເປັນປະທານພ້ອມເປີດຫົວບົດສອບເສັງຂອງທ່ານ ຄຳເພັດ ສອນຈະເລີນ ກຳມະການພັກເມືອງ ຮອງເຈົ້າເມືອງ ຜູ້ຊີ້ນຳວຽກງານຂົງເຂດວັດທະນາທຳສັງຄົມຂັ້ນເມືອງ, ມີທ່ານ ພູອິນ ສຸວັນນີ ຫົວໜ້າຂະແໜ່ງພັດທະນາຄູ ແຂວງເຊກອງ, ທ່ານ ນາງ ທວມ ມະລາວັນ ກຳມະການພັກເມືອງຫົວໜ້າຫ້ອງການສຶກສາທິການ ແລະ ກິລາ ເມືອງ, ມີຄະນະກຳມະການຍາມຫ້ອງສອບເສັງ, ຄູ-ອາຈານ ພ້ອມດ້ວຍນັກສອບເສັງຊັ້ນ ມ 4 ເຂົ້າຮ່ວມ.

ການສອບເສັງຈົບຊັ້ນມໍ 4 ໃນປີນີ້ ແມ່ນຈະໄດ້ດຳເນີນໄປເປັນເວລາ 3 ວັນຄື: ວັນທີ 21-23 ກໍລະກົດ 2020, ຊຶ່ງມີນັກຮຽນຊັ້ນມໍ 4 ມີທັງໝົດ 367 ຄົນ,ຍິງ 200 ຄົນ, ໃນນີ້ມີນັກຮຽນມາສອບເສັງຕົວຈິງຈຳນວນ 360 ຄົນ, ຍິງ 197 ຄົນ, ບໍ່ມາສອບເສັງ 7 ຄົນ, ຍິງ 3 ຄົນ, ສຳລັບວິຊາສອບເສັງຄັ້ງນີ້ແມ່ນມີ 6 ວິຊາຄື: ວິຊາພາສາລາວ-ວັນນະຄະດີ, ວິທະຍາສາດສັງຄົມ, ວິທະຍາສາດທຳມະຊາດ, ສຶກສາພົນລະເມືອງ, ຄະນິດສາດ ແລະ ວິຊາພາສາອັງກິດ, ສະນັ້ນຜູ້ທີຖືກແຕ່ງຕັ້ງຄະນະຮັບຜິດຊອບ ແລະ ຄະນະກຳມະການຍາມຫ້ອງສອບເສັງ, ໜ່ວຍປ້ອງກັນ, ແພດປະຈໍາພາກສະໜາມ, ໂດຍສະເພາະແມ່ນນັກສອບເສັງທີ່ມາແຕ່ບ້ານໄກເພື່ອເບິ່ງແຍງດູແລ ແລະໃກ້ຊິດຕິດຕາມສຸຂະພາບຂອງນັກສອບເສັງທຸກຄົນ, ຮັບປະກັນດ້ານຄວາມສະຫງົບ, ປອດໄພ, ຄວາມສາມັກຄີໃຫ້ເປັນປຶກແຜ່ນແໜ້ນໜາຊ່ວຍເຫຼືອເຊິ່ງກັນແລະກັນ, ຄະນະກຳມະການກວດກາບົດຕ້ອງຮັບປະກັນທາງດ້ານເນື້ອໃນ, ໂດຍສະເພາະແມ່ນໃຫ້ຖືກຕ້ອງຕາມຂະໜານຕອບຂອງກະຊວງສຶກສາທິການ ແລະ ກິລາວາງອອກຢ່າງເຂັ້ມງວດ.