ມີເດຍລາວແຂວງເຊກອງ ຂ່າວ:ພຸດທະສອນ ເພື່ອເປັນການສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ຄັ້ງທີ VIII ຂອງຜູ້ແທນແມ່ຍິງລາວທົ່ວປະເທດ ທີ່ຈະໄຂຂຶ້ນໃນມໍ່ໆນີ້ ແລະເນື່ອງໃນໂອກາດ ວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 66 ປີ, ສະນັ້ນ ໃນຕອນເຊົ້າວັນທີ 21 ກໍລະກົດ ນີ້ ສະຫະພັນແມ່ຍິງແຂວງ ນໍາໂດຍ ທ່ານ ວິໄລວັນ ດາລາສິນ ປະທານສະຫະພັນແມ່ຍິງແຂວງ ພ້ອມສະຫະພັນແມ່ຍິງໜ່ວຍອ້ອມຂ້າງ ຮ່ວມກັບອົງການພັດທະນາ ແລະບໍລິຫານຕົວເມືອງ ແລະສະຫະພັນແມ່ຍິງເມືອງລະມາມ ໄດ້ຈັດຂະບວນການປູກຕົ້ນໄມ້ ລຽບຕາມເສັ້ນທາງ 16B ເຊກອງ-ດາກຈຶງ ເລີ່ມແຕ່ 3 ແຍກ ຫ້ອງການ ປກສ ເມືອງລະມາມ ໄປຫາ ຫົວຂົວຂ້າມນ້ຳເຊກອງ.

ໃນພິທີທ່ານ ນາງ ວິໄລວັນ ດາລາສິນ ກ່າວວ່າ: ເພື່ອຂໍ່ານັບຮັບຕ້ອນ 2 ວັນດັ່ງກ່າວ, ຄະນະນຳສະຫະພັນແມ່ຍິງແຂວງ ພ້ອມດ້ວຍສະຫະພັນແມ່ຍິງໜ່ວຍອ້ອມຂ້າງແຂວງ ແລະສະຫະພັນແມ່ຍິງເມືອງລະມາມ ໄດ້ແບ່ງອອກເປັນ 7 ກຸ່ມ ໄດ້ສ້າງຂະບວນການປູກຕົ້ນໄມ້ປະດັບເທສະບານແຂວງ ກໍຄືເມືອງລະມາມ ລວມທັງໝົດ 30 ຕົ້ນ ເພື່ອຮັກສາສະພາບແວດລ້ອມ ແລະເຮັດໃຫ້ເທສະບານແຂວງ ກໍຄືຕົວເມືອງລະມາມ ມີຄວາມສວຍງາມ, ຄວາມສະອາດ ແລະເປັນລະບຽບຮຽບຮ້ອຍ ຮັກສາໄດ້ຄວາມຊຸ່ມເຢັນ, ກາຍເປັນເມືອງສີຂຽວ ຕາມແຜນຍຸດທະສາດເປົ້າໝາຍ 4 ສໍ ໃຫ້ປະກົດຜົນເປັນຈິງ,

ນອກນີ້ ປະທານສະຫະພັນແມ່ຍິງແຂວງ ຍັງໄດ້ຮຽກຮ້ອງເອື້ອຍນ້ອງແມ່ຍິງທຸກຄົນ ເອົາໃຈໃສ່ນຳພາສະມາຊິກໃນຄອບຄົວຂອງຕົນ ຮັກສາອານາໄມ 3 ສະອາດ ແລະປູກຕົ້ນໄມ້ເພື່ອສ້າງຂະບວນການຕ້ອນຮັບວັນສຳຄັນດັ່ງກ່າວໃຫ້ເປັນຂະບງນກວ້າງຂວາງ ໂດຍປະຕິບັດມາດຕະການປ້ອງກັນ, ຄວບຄຸມ ແລະຕ້ານການລະບາດພະຍາດໂຄວິດ-19 ແລະພະຍາດໄຂ້ຍູງລາຍ ທີ່ຂັ້ນເທິງວາງອອກຢ່າງເຂັ້ມງວດ.