ມີເດຍລາວແຂວງບໍ່ແກ້ວ ພາບ,ຂ່າວ: ບຸນຈັນ ບຸນປັນຍາ
ວັນທີ 21 ກໍລະກົດນີ້, ຫ້ອງການສຶກສາທິການ ແລະ ກິລາເມືອງຫ້ວຍຊາຍ ຈັດຕັ້ງການສອບເສັງຈົບຊັ້ນມັດທະຍົມຕອນຕົ້ນ ປະຈຳສົກຮຽນ 2020-2021, ຂຶ້ນຢ່າງເປັນທາງການຢູ່ ສູນສອບເສັງໂຮງຮຽນມັດທະຍົມສົມບູນສັນຕິພາບ, ໃຫ້ກຽດເຂົ້າຮ່ວມມີ ທ່ານ ຫົງແກ້ວ ວິໄນວົງ ກໍາມະການພັກແຂວງ, ເລຂາພັກເມືອງ, ເຈົ້າໆເມືອງຫ້ວຍຊາຍ, ທ່ານ ວັນດີ ທໍາມະວົງ ຫົວໜ້າພະແນກສຶສາແຂວງບໍ່ແກ້ວ, ມີບັນດາຫົວໜ້າຫ້ອງການສຶກສາທິການ ແລະ ກິລາເມືອງຫ້ວຍຊາຍ, ມີບັນດາຜູ້ອຳນວຍການໂຮງຮຽນ, ຄູ-ອາຈານ, ອຳນາດການປົກຄອງບ້ານ, ແຂກຖຶກເຊີນ ຕະຫຼອດຮອດນ້ອງນັກຮຽນເຂົ້າຮ່ວມ.

ທ່ານ ອ່ອນໃຈ ແສງວິຈິດ ຮອງຫົວໜ້າຫ້ອງການສຶກສາທິການ ແລະ ກິລາເມືອງຫ້ວຍຊາຍ, ໄດ້ລາຍງານກ່ຽວກັບການກະກຽມສອບເສັງຈົບຊັ້ນມັດທະຍົມຕອນຕົ້ນ ມ4 ປະຈຳປີ 2021 ໃຫ້ຮູ້ວ່າ: ທົ່ວເມືອງມີ 13 ສູນສອບເສັງ, ມີນັກຮຽນເຂົ້າສອບເສັງທັງໝົດ 1,272 ຄົນ, ຍິງ 605 ຄົນ, ແບ່ງອອກເປັນ 84 ຫ້ອງສອບເສັງ, ການສອບເສັງໃນຄັ້ງນີ້ກໍ່ເພື່ອເຮັດໃຫ້ການສອບເສັງຈົບຊັ້ນມັດທະຍົມຕອນຕົ້ນ ມ4 ຄັ້ງນີ້ ມີຄວາມເປັນເອກະພາບກັນໃນຂອບເຂດທົ່ວເມືອງຫ້ວຍຊາຍ, ທາງຫ້ອງການສຶກສາທິການ ແລະ ກິລາ ໄດ້ແຕ່ງຕັ້ງຄະນະຮັບຜິດຊອບຂັ້ນເມືອງລົງປະຈໍາຢູ່ແຕ່ລະສູນ ຈໍານວນ 13 ທ່ານ, ວິຊາທີ່ສອບເສັງນຳມາສອບເສັງມີ 6 ວິຊາຄື: ວິຊາພາສາລາວ-ວັນນະຄະດີ, ວິຊາ ວິທະຍາສາດທຳມະຊາດ, ວິຊາ ວິທະຍາສາດສັງຄົມ, ວິຊາ ຄະນິດສາດ, ວິຊາ ພາສາອັງກິດ, ວິຊາ ສຶກສາພົນລະເມືອງ, ການສອບເສັງຈົບຊັ້ນມັດທະຍົມຕອນຕົ້ນ ມ4 ຄັ້ງນີ້ຈະດໍາເນີນໄປເປັນເວລາ 3 ວັນຈຶງສໍາເລັດ.

ໂອກາດນີ້, ທ່ານ ຫົງແກ້ວ ວິໄນວົງ ກໍາມະການພັກແຂວງ, ເລຂາພັກເມືອງ, ເຈົ້າໆເມືອງຫ້ວຍຊາຍ, ໄດ້ໃຫ້ທິດຊີ້ນຳ ແລະ ເນັ້ນໜັກໃຫ້ ບັນດາອະນຸກຳມະການຮັບຜິດທຸກພາກສ່ວນ, ຜູ້ອຳນວຍການໂຮງຮຽນ ຄູ-ອາຈານ ແລະ ນ້ອງນນັກຮຽນ ເອົາໃຈໃສ່ປະຕິບັດຕາມກົດລະບຽບການສອບເສັງ, ຮັບປະກັນຜົນສຳເລັດ, ການຕິດຕາມກວດກາການສອບເສັງຂອງນັກຮຽນ ໃຫ້ໄປຕາມກົດລະບຽບການສອບເສັງຈົບຊັ້ນຢ່າງເຂັ້ມງວດ, ຮຽກຮ້ອງນ້ອງນັກຮຽນທຸກຄົນ ຈົ່ງພ້ອມກັນເອົາໃຈໃສ່ເຮັດບົດສອບເສັງຂອງຕົນຢ່າງຕັ້ງໜ້າ, ເພື່ອເຮັດໃຫ້ການສອບເສັງສົກຮຽນນີ້ ມີຜົນສຳເລັດອັນພົ້ນເດັ່ນກວ່າ ສົກຮຽນທີ່ຜ່ານມາ ພ້ອມທັງຕັດຊອງເປີດຫົວບົດການສອບເສັງຈົບຊັ້ນ ມັດທະຍົມຕອນຕົ້ນ ມ4 ປະຈຳປີ 2021 ຢ່າງເປັນທາງການ.