ຕອນບ່າຍວັນທີ 20 ກໍລະກົດນີ້ ຢູ່ທີ່ຫ້ອງປະຊຸມສະພາປະຊາຊົນແຂວງ ທ່ານ ບຸນຄົງ ຫຼ້າຈຽມພອນ ກໍາມະການສໍາຮອງສູນກາງພັກ, ເລຂາພັັກແຂວງ-ເຈົ້າແຂວງອຸດົມໄຊ ໄດ້ພົບປະໂອ້ລົມ ຄະນະນຳ ແລະ ພະນັກງານ-ລັດຖະກອນ ສະພາປະຊາຊົນແຂວງ.


ກ່ອນອື່ນ ທ່ານ ເຈົ້າໄດ້ຮັບຟັງລາຍງານການເຄື່ອນໄຫວວຽກງານຂອງສະພາປະຊາຊົນແຂວງ ໂດຍສະເພາະແມ່ນຜົນສຳເລັດກອງປະຊຸມຄັ້ງປະຖົມມະລຶກຂອງສະພາປະຊາຊົນແຂວງອຸດົມໄຊ ຈາກທ່ານ ຄຳດີ ວົງລ້ອມ ຮອງເລຂາພັກແຂວງ, ປະທານສະພາປະຊາຊົນແຂວງອຸດົມໄຊ.

ໂອກາດດັ່ງກ່າວ ທ່ານ ບຸນຄົງ ຫຼ້າຈຽມພອນ ເລຂາພັັກແຂວງ-ເຈົ້າແຂວງອຸດົມໄຊ ກໍໄດ້ກ່າວສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດທີ່ທາງສະພາປະຊາຊົນແຂວງຍາດມາໄດ້ໃນໄລຍະຜ່ານມາ ພ້ອມດຽວກັນ ທ່ານ ເຈົ້າແຂວງຍັງໄດ້ຍົກໃຫ້ເຫັນສະພາບລວມພາຍໃນປະເທດ ໂດຍສະເພາະແມ່ນຄວາມຫຍຸ້ງຍາກທາງດ້ານເສດຖະກິດ ທີ່ໄດ້ຮັບຜົນກະທົບຈາກສະພາບການລະບາດຂອງພະຍາດໂຄວິດ 19 ທີ່ພວມເປັນໄພຄຸກຄາມຊີວິດອິນຊີຂອງມວນມະນຸດໃນທົ່ວໂລກ ລວມທັງພາຍໃນປະເທດ ແລະ ສະພາບປາກົດການຫຍໍ້ທໍ້ຕ່າງໆ ເຊິ່ງໄດ້ຜົນສົ່ງສະທ້ອນຕໍ່ການຊີ້ນຳໆພາ ແລະ ການເຄື່ອນໄຫວວຽກງານຂອງພາກລັດ ລວມເຖິງການດຳລົງຊີວິດຂອງປະຊາຊົນ ສະນັ້ນ ຈິ່ງເນັ້ນໃຫ້ຄະນະນຳ ແລະ ພະນັກງານ-ລັດຖະກອນ ພາຍໃນສະພາປະຊາຊົນແຂວງເຫັນໄດ້ຄວາມຈຳເປັນ, ພ້ອມກັນສູ້ຊົນຈັດຕັ້ງປະຕິບັດໜ້າທີ່ວຽກງານຕາມພາລະບົດບາດຂອງຕົນດ້ວຍຄວາມຮັບຜິດຊອບສູງ, ມີຄວາມໜັກແໜ້ນດ້ານແນວຄິດການເມືອງ, ນຳໃຊ້ທ່າແຮງ ແລະ ເງື່ອນໄຂທີ່ມີຢູ່ປັບປຸງແບບແຜນວິທີເຮັດວຽກແຕ່ລະຂັ້ນໃຫ້ນັບມື້ດີຂຶ້ນຕາມຍຸກສະໄໝ, ເຕົ້າໂຮມຄວາມສາມັກຄີໃຫ້ເປັນປຶກແຜ່ນແໜ້ນໜາ ແລະ ເປັນເອກະພາບໃນການຈັດຕັ້ງປະຕິບັດວຽກງານໃຫ້ໄດ້ຮັບຜົນສຳເລັດ.

ພາບ-ຂ່າວ: ແສງອາທິດ