ພິທີປາຖະກະຖາ ວັນສຳຄັນຕ່າງໆ ທາງປະຫວັດສາດ ໂດຍສະເພາະແມ່ນ ວັນສ້າງຕັ້ງ ພັກຄອມມູນິດ ຈີນ ຄົບຮອບ 100 ປີ ( 1 ກໍລະກົດ 1921 – 1 ກໍລະກົດ 2021 ) ວັນຄ້າຍວັນເກີດ ປະທານສຸພານຸວົງ ຄົບຮອບ 112 ປີ ( 13 ກໍລະກົດ 1909 – 13 ກໍລະກົດ 2021 ) ວັນຜ່າວົງປິດລ້ອມ ຂອງກອງພັນທີ່ 2 ວິລະຊົນ ທີ່ທົ່ງໄຫຫີນ ຊຽງຂວາງ ໃນວັນທີ 18 ພຶດສະພາ 1995 ແລະ ວັນວິລະກຳ ໂຕນຄຸກຢ່າງມະຫັດສະຈັນ ຂອງບັນດາທ່ານ ຜູ້ນຳຂອງພັກ ໃນວັນທີ 24 ພຶດສະພາ 1960 ໄດ້ຈັດຂຶ້ນໃນວັນທີ 20 ກໍລະກົດ 2021 ທີ່ສະໂມສອນ ຂອງໂຮງຮຽນການເມືອງ ແລະ ການປົກຄອງ ແຂວງອຸດົມໄຊ ເຊິ່ງໃຫ້ກຽດປາຖະກະຖາ ໂດຍທ່ານ ຄຳຟອງ ພັດທະມາວົງ ເລຂາຫນ່ວຍພັກ,ອຳນວຍການໂຮງຮຽນການເມືອງ ແລະ ການປົກຄອງແຂວງ

ການປາຖະກະຖາ ວັນສຳຄັນທາງປະສາດ ຄັ້ງນີ້ ກໍເພື່ອເຮັດໃຫ້ ບັນດາຄູ – ອາຈານ ແລະ ນັກສຶກສາ ພາຍໃນໂຮງຮຽນ ຮັບຮູ້, ເຂົ້າໃຈ ຕໍ່ກັບຄວາມຫມາຍ, ຄວາມສຳຄັນ,  ເຫດການ, ຄວາມເປັນມາຂອງວັນສຳຄັນທາງປະຫວັດສາດດັ່ງກ່າວ ແລະ ພ້ອມກັນນຳເອົາບາງບົດຮຽນທີ່ສອດຄ່ອງກັບສະພາບຕົວຈິງໃນປັດຈຸບັນ ມາຫມູນໃຊ້ ໃຫ້ເກີດປະໂຫຍດ. ນອກນັ້ນ ຍັງຖືເອົາການປາຖະກະຖາ ດັ່ງກ່າວ ເປັນການຖ່າຍທອດບົດຮຽນ ໃຫ້ແກ່ນັກສຶກສາຕື່ມອີກ. ທ່ານ ຄຳຟອງ ພັດທະມາວົງ ເລຂາຫນ່ວຍພັກ,ອຳນວຍການ ໂຮງຮຽນການເມືອງ ແລະ ການປົກຄອງແຂວງອຸດົມໄຊ ກ່າວວ່າ: ວັນສ້າງຕັ້ງ ພັກຄອມມູນິດຈີນ ຄົບຮອບ 100 ປີ ເປັນວັນສຳຄັນທາງປະຫວັດສາດ ຂອງ ສປຈີນ ເຊິ່ງຕະຫລອດໄລຍະຜ່ານມາ ນັບແຕ່ການສ້າງຕັ້ງພັກຄອມມູນນິດຈີນ ຈົນຮອດປັດຈຸບັນເຫັນວ່າ ມີການເຕີບໃຫຍ່ຂະຫຍາຍຕົວ ແລະ ເປັນຂີດຫມາຍສຳຄັນ ທີ່ເຮັດໃຫ້ ປະເທດ ສປຈີນ ກາຍມາເປັນປະເທດທີ່ພັດທະນາອັນດັບຕົ້ນຂອງໂລກ ແລະ ເປັນປະເທດທີ່ປະຊາຊົນ ມີຄວາມອີ່ມຫນຳສຳລານ ແລະ ວັນຄ້າຍວັນເກີດຂອງປະທານສຸພານຸວົງ ກໍເປັນວັນສຳຄັນ ຂອງຊາດ ເນື່ອຈາກ ປະທານສຸພານຸວົງ ເປັນບຸກຄົນສຳຄັນ ທີ່ນຳພາປະຊາຊົນລາວ ຕໍ່ສູ້ຕ້ານການຮຸກຮານ ຂອງພັກຕ່າງດ້າວ ແລະ ເຮັດໃຫ້ປະເທດຊາດ ໄດ້ຮັບການປົດປ່ອຍ ຈົນໄດ້ຮັບການພັດທະນາມາເຖິງປັດຈຸບັນ.

  ສ່ວນ ວັນຜ່າວົງປິດລ້ອມ ຂອງກອງພັນທີ່ 2 ວິລະຊົນ ທີ່ທົ່ງໄຫຫີນ ຊຽງຂວາງ ແລະ ວັນວິລະກຳ ໂຕນຄຸກຢ່າງມະຫັດສະຈັນ ຂອງບັນດາທ່ານ ຜູ້ນຳຂອງພັກ ກໍເປັນວັນຫນຶ່ງ ທີ່ສະແດງໃຫ້ເຫັນເຖິງຄວາມອົງອາດ,ກ້າຫານ,ຄວາມສະຫລຽວ,ສະຫລາດ, ຄວາມຕັດສິນໃຈສູນ ແລະ ຄວາມເສຍສະ ຫລະ ຂອງບັນດາທ່ານຜູ້ນຳພັກ ແລະ ນັກຮົບປະຕິວັດລາວ ເພື່ອປະເທດຊາດ ແລະ ເພື່ອປະຊາຊົນລາວ ເຊິ່ງການປາຖະກະຖາ ດັ່ງກ່າວ ຍັງເປັນການເຊີດຊູບົດບົດ,ຜົນງານຄຸນງາມຄວາມດີ ຂອງຜູ້ນຳພັກ ແລະ ນັກຮົບປະຕິວັດລາວ ທີ່ີມີຕໍ່ປະເທດຊາດ ພິທີປາຖະກະຖາ ໃນຄັ້ງນີ້້ ມີບັນດາຄູ – ອາຈານ ຕະຫຼອດຮອດນັກສຶກສາ ພາຍໃນໂຮງຮຽນ ການເມືອງ ແລະ ການປົກຄອງ ແຂວງອຸດົມໄຊ ເຂົ້າຮ່ວມ.

ພາບ-ຂ່າວ: ຄານມະນີ ຮຽນດໍຈັນ