ແຂວງສາລະວັນ ກຽມຄວາມພ້ອມຫຼາຍດ້ານ ຢ່າງຮີບດ່ວນ, ຮັບມືກັບການລະບາດຂອງພະຍາດໂຄວິດ-19 ຮອບໃໝ່ ທີ່ຈະເຂົ້າມາກັບແຮງງານລາວ ທີ່ກັບຈາກປະເທດເພື່ອນບ້ານ ເປັນຈຳນວນຫຼາຍ ຢ່າງຕໍ່ເນື່ອງ, ໂດຍສະເພາະກຽມດ້ານບຸກຄະລາກອນ, ແພດ-ພະຍາບານ, ເຈົ້າໜ້າທີ່ສະເພາະ, ເຈົ້າໜ້າທີ່ ປກຊ-ປກສ, ບັນດາໜ່ວຍງານຕ່າງໆ, ທິມແພດສຸກເສີນ ປະຈຳການຕະຫຼອດ 24 ຊົ່ວໂມງ, ທັງໄດ້ກຽມສະຖານທີ່ຮອງຮັບກັກບໍລິເວນແຮງງານນຳເຂົ້າ, ໂຮງໝໍພາກສະໜາມ, ອຸປະກອນການແພດຕ່າງໆ. ເນື່ອງຈາກປັດຈຸບັນ ມີແຮງງານນໍາເຂົ້າ 300 ກວ່າຄົນ ພຽງແຕ່ 1 ອາທິດເທົ່ານັ້ນ ແລະ ພົບຜູ້ຕິດເຊື້ອໂຄວິດ-19 ແລ້ວ ຈຳນວນ 51 ຄົນ.

ທ່ານ ດຣ ວົງດາວ ສຸລິນທາ ຮອງຫົວໜ້າພະແນກສາທາລະນະສຸກແຂວງສາລະວັນ ກອງເລຂາຄະນະສະເພາະກິດໂຄວິດ-19 ແຂວງ ທັງແມ່ນຫົວໜ້າສູນຈໍາກັດບໍລິເວນຢູ່ໂຮງຮຽນສາມັນກິນນອນຊົນເຜົ່າແຂວງ ໄດ້ເປີດເຜີຍວ່າ: ພາຍຫຼັງ ແຂວງສາລະວັນ ໄດ້ຮັບເອົາແຮງງານລາວ ທີ່ກັບຈາກປະເທດໄທ ຢູ່ດ່ານສາກົນວັງເຕົ່າ ເມືອງໂພນທອງ ແຂວງຈຳປາສັກ ນັບແຕ່ວັນທີ 13-21 ກໍລະກົດ 2021 ເປັນຕົ້ນມາ: ມີຈຳນວນແຮງງານລາວ ເດີນທາງກັບທັງໝົດ 310 ຄົນ, ຍິງ 150 ຄົນ ແລະ ກວດພົບຜູ້ຕິດເຊື້ອໂຄວິດ-19 ແລ້ວ ຈຳນວນ 51 ຄົນ ພຽງແຕ່ອາທິດດຽວເທົ່ານັ້ນ ແລະ ຍັງລໍຖ້າຜົນກວດອີກ 109 ຄົນ.

ປັດຈຸບັນນີ້ ແຂວງສາລະວັນ ຕ້ອງຮັບມື ແລະ ກຽມຄວາມພ້ອມຫຼາຍດ້ານ ເພື່ອຮອງຮັບແຮງງານລາວກັບຈາກປະເທດໄທ ເປັນຈຳນວນຫຼວງຫຼາຍ ເປັນຕົ້ນ: ດ້ານບຸກຄະລາກອນ ແພດໝໍ-ພະຍາບານ, ອຸປະກອນການແພດ, ອຸປະກອນຮັບໃຊ້, ເຈົ້າໜ້າທີ່ສະເພາະ ແລະ ກຳລັງ ປກຊ-ປກສ ເພື່ອອຳນວຍຄວາມສະດວກ ແລະ ປະຕິບັດໜ້າທີ່ ຢ່າງເຂັ້ມງວດ. ທັງກໍານົດເອົາໂຮງຮຽນຊົນເຜົ່າແຂວງສາລະວັນ ເປັນສູນລວມ ແລະ ທັງເປັນໂຮງໝໍພາກສະໜາມ ເພື່ອປີ່ນປົວຜູ້ຕິດເຊື້ອໂຄວິດ-19 ທີ່ຢູ່ໃນອາການເບົາບາງ ແລະ ຈຳກັດບໍລິເວນແຮງງານລາວ ສາມາດຮອງຮັບໄດ້ 300 ຕຽງ, ໃນນັ້ນຮອງຮັບການປີ່ນປົວຜູ້ຕິດເຊື້ອ 100 ຕຽງ. ນອກຈາກນັ້ນແລ້ວ ໄດ້ກະກຽມສະຖານທີ່ຕ່າງໆ ທີ່ຈະຮອງຮັບ ຕື່ມອີກ, ຖ້າຫາກມີແຮງງານລາວ ຍັງສືບຕໍ່ເດີນທາງກັບບ້ານ ເພື່ອຈຳກັດບໍລິເວນ ແລະ ລະບາຍຈັດສົ່ງໃຫ້ກັບບັນດາເມືອງ, ຫຼັງຈາກກັກບໍລິເວນຄົບ 14 ວັນ ໃຫ້ບັນດາເມືອງ ສືບຕໍ່ກັກບໍລິເວນຕື່ມອີກ ຮັບປະກັນຄວາມໝັ້ນໃຈ ແລະ ປອດໄພ.

ທ່ານຮອງຫົວໜ້າພະແນກສາທາລະນະສຸກແຂວງສາລະວັນ ໄດ້ຮຽກຮ້ອງເຖີງແຮງງານລາວ ທີ່ເດີນທາງກັບບ້ານ ຈົ່ງພ້ອມກັນເອົາໃຈໃສ່ປະຕິບັດຕາມລະບຽບຂອງສູນກັກບໍລິເວນ ຢ່າງເຂັ້ມງວດ, ປະຕິບັດມາດຕະການຕ່າງໆ ເຊັ່ນ: ໃສ່ຜ້າອັດປາກ-ອັດດັງ, ໝັ່ນລ້າງມືດ້ວຍສະບູ ຫຼື ເຈວ, ຮັກສາໄລຍະຫ່າງ, ຮັກສາຄວາມສະອາດ ນັບແຕ່ການກິນ, ຢູ່, ນອນ ແລະ ຖ້າຫາກຕົນເອງ ມີອາການຫາຍໃຈຝຶດ, ແໜ້ນໜ້າເອິກ, ມີໄຂ້ ໃຫ້ລາຍງານແພດປະຈຳສູນດ່ວນ. ພ້ອມນັ້ນຍົກສູງຄວາມຮັບຜິດຊອບຮ່ວມກັນ, ສູ້ຊົນ, ອົດທົນ ແລະ ເອົາໃຈໃສ່ໃນການຈຳກັດບໍລິເວນຕົນເອງ ໃຫ້ຄົບກຳນົດ 14 ວັນ ເພື່ອຄອບຄົວ ແລະ ສັງຄົມ ປອດໄພ ຈາກເຊື້ອພະຍາດໂຄວິດ-19.
ພາບ-ຂ່າວ: ວິໄລວອນ ສິດທິໄຊ