ມີເດຍລາວແຂວງຄຳມ່ວນ ວັນທີ 21 ກໍລະກົດ 2021 ຢູ່ທີ່ຫ້ອງວ່າການປົກຄອງແຂວງຄໍາມ່ວນ, ທ່ານ ປອ. ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກພ້ອມດ້ວຍຄະນະໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຄໍາມ່ວນ, ໂດຍການຕ້ອນຮັບຂອງທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນພ້ອມດ້ວຍຄະນະສະເພາະກິດປ້ອງກັນ, ຄວບຄຸມ ແລະ ສະກັດກັ້ນການແຜ່ລະບາດພະຍາດໂຄວິດ-19 ຂັ້ນແຂວງເຂົ້າຮ່ວມຕ້ອນຮັບ.

ທ່ານ ນາງ ດຣ. ພາສຸກ ຄໍາມະນີທອງ ຮອງຫົວໜ້າພະແນກສາທາລະນະສຸກແຂວງຄໍາມ່ວນ, ຫົວໜ້າກອງເລຂາຄະນະສະເພາະກິດປ້ອງກັນ, ຄວບຄຸມ ແລະ ສະກັດກັ້ນການແຜ່ລະບາດພະຍາດໂຄວິດ-19 ແຂວງຄໍາມ່ວນໄດ້ລາຍງານສະພາບການປ້ອງກັນ,ຄວບຄຸມ ແລະ ແກ້ໄຂພະຍາດໂຄວິດ-19 ແລະ ພະຍາດຕາມລະດູການ ພາຍໃນແຂວງຄໍາມ່ວນ ໂດຍຫຍໍ້ໃນປີ 2021 ແຕ່ວັນທີ 01 ມັງກອນ ຫາ 21 ກໍລະກົດ 2021 ໄດ້ເປິດສູູນຈໍາກັດບໍລິເວນ ຈໍານວນ 02 ສູນ ( ສູນຂັ້ນເມືອງບໍ່ໄດ້ບໍລິການແຕ່ຮັກສາໄວ້ຄືເກົ່າ ) ຈໍານວນແຮງງານເຂົ້າຈໍາກັດບໍລິເວນທັງໝົດ 2.350 ຄົນ , ຍິງ 1.119 ຄົນ , ກັກກັນຄົບ 14 ວັນ 1.911 ຄົນ , ຍິງ 1.664 ຄົນ , ສືບຕໍ່ກັກກັນ 439 ຄົນ , ຍິງ 247 ຄົົນ ,ກວດຫາເຊື້ອໂຄວິດ-19 , ທັງໝົດ 2.350 ຄົນ , ພົບເຊື້ອ 64 ຄົນ ,ໄດ້ປິ່ນປົວຫາຍດີແລ້ວ 16 ຄົນ ,ຍັງກໍາລັງປິ່ນປົວຢູ່ 48 ຄົນ ( ຄົນຫວຽດນາມ 01 ຄົນ ) ມີອາການເບົາບາງ,

ທັງໝົດເຊື້ອພະຍາດນໍາເຂົ້າມາຈາກປະເທດເພື່ອນບ້ານ, ການກະກຽມຄວາມພ້ອມທາງດ້ານສະຖານທີ່ໃນການປິ່ນປົວພະຍາດໂຄວິດ-19 , ໄດ້ມີສູນປິ່ນປົວພະຍາດໂຄວິດ-19 ໃນຂັ້ນປານກາງ ແລະ ຮ້າຍແຮງ ຈໍານວນ 03 ແຫ່ງ, ສາມາດບັນຈຸໄດ້ 179 ຕຽງຄື: ຢູ່ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ ( ຫຼັງເກົ່າ )ສາມາດບັນຈຸໄດ້ 49 ຕຽງ, ໂຮງໝໍທະຫານແຂວງສາມາດບັນຈຸໄດ້ 100 ຕຽງ ແລະ ໂຮງໝໍຊຸມຊົນຍົມມະລາດ ສາມາດບັນຈຸໄດ້ 30 ຕຽງ, ເປັນບ່ອນປິ່ນປົວພະຍາດໂຄວິດ -19 ໃນກໍລະນີສຸກເສີນກະທັນຫັນຄື:ຜ່າຕັດໄສ້ຕິ່ງ, ຜ່າຕັດເອົາລູກອອກ ແລະ ຜ່າຕັດອື່ນໆສໍາລັບຜູ້ຕິດເຊື້ອພະຍາດ – 19, ສ້ອມແປງສູນປິ່ນປົວພະແນກ ຖວທ ຫຼັງເກົ່າ ຊັ້ນສອງສໍາເລັດ ສາມາດບັນຈຸໄດ້ ປະມານ 49 ຄົນ, ປັບປຸງສູນກັກກັນສະໜາມກິລາຈັດສັນເປັນລ໋ອກໄດ້ 06 ລ໋ອກ ແຕ່ລະລ໋ອກສາມາດບັນຈຸໄດ້ 20-30 ຄົນ, ໃນແຕ່ລະລ໋ອກມີອ່າງລ້າງມື 01 ຈຸດ ເພື່ອລ້າງມືໃຫ້ສະອາດ, ໄດ້ປັບປຸງສ້ອມແປງສາງເກັບຢາວັກຊີນ, ມີຕູ້ເກັບວັກຊີນຈໍານວນ 11 ໜ່ວຍ, ຕູ້ລິດບັ້ງນໍ້າກ້ອນ 01 ໜ່ວຍ, ໄດ້ຮັບຢາວັກຊີນທັງໝົດ 86.600 ໂດສ ( ຊີໂນຟາມ ຈໍານວນ 80.600ໂດສ ແລະ ອັດສະຕາເຊັນນີກາ 6.000 ໂດສ ),

ການສັກວັກຊິິນປ້ອງກັນພະຍາດໂຄວິດ -19 ແມ່ນໄດ້ເລີ່ມແຕ່ ວັນທີ 09 ມີນາ 2021 ມາຮອດວັນທີ 18 ກໍລະກົດ 2021 ສັກໄດ້ເຂັມທີ 01 ມີຈໍານວນ 45.328 ຄົນ ແລະ ເຂັມທີ 02 ສັກໄດ້ 32.594 ຄົນ ແລະ ຍັງໄດ້ລາຍງານກ່ຽວກັບການເຝົ້າລະວັງພະຍາດຕາມລະດູການຕື່ມອີກ . ຈາກນັ້ນທ່ານລັດຖະມົນຕີກະຊວງສາທາລະນສຸກ ພ້ອມຄະນະກໍ່ໄດ້ເດີນທາງໄປເຮັດວຽກ ແລະ ຊີ້ນໍາວຽກງານຢູ່ພະແນກສາທາລະນະສຸກແຂວງຄໍາມ່ວນ, ໃນໂອກາດທີ່ມາຄື່ອນໄຫວເຮັດວຽກຢູ່ແຂວງຄໍາມ່ວນໃນຄັ້ງນີ້ທ່ານ ປອ. ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ກໍ່ໄດ້ມອບເງິນຈໍານວນໜຶ່ງໃຫ້ທາງຄະນະສະເພາະກິດຂອງແຂວງ, ເພື່ອປະກອບສ່ວນເຂົ້າໃນວຽກງານການປ້ອງກັນ ,ຄວບຄຸມ ແລະ ສະກັດກັ້ນການແຜ່ລະບາດພະຍາດໂຄວິດ-19 ພາຍໃນແຂວງ ແລະ ມອບອຸປະກອນການແພດອີກຈໍານວນໜຶ່ງໃຫ້ພະແນກສາທາລະນະສຸກແຂວງຄໍາມ່ວນ.