ມີເດຍລາວແຂວງຈຳປາສັກ ຂ່າວ: ທັດຊະນະ ໃນວັນທີ 20 ກໍລະກົດ 2021 ຜ່ານມານີ້, ທ່ານ ຄຳພັນ ພົມມະທັດ ກຳມະການກົມການເມືອງສູນກາງພັກ, ເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ ໄດ້ລົງເຄື່ອນໄຫວຢ້ຽມຢາມ ພື້ນ ຖານການຜະລິດກະສິກຳ ຢູ່ ເມືອງປາກຊ່ອງ ແຂວງຈຳປາສັກ. ໂດຍມີ ທ່ານ ວິໄລວົງ ບຸດດາຄໍາ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຈໍາປາສັກ, ທ່ານ ປະດິດ ວັນນະລັດສະໝີ ຄະນະປະຈຳພັກແຂວງ ປະທານກວດກາພັກ-ລັດແຂວງ, ມີ ຄະນະນຳຂອງແຂວງ ແລະ ເມືອງປາກຊ່ອງ ເຂົ້າຮ່ວມ.

ໂອກາດນີ້, ທ່ານ ຄຳພັນ ພົມມະທັດ ພ້ອມດ້ວຍຄະນະ ໄດ້ຢ້ຽມຢາມ ສວນປູກພືດຜັກໄຮໂດຣ ໂປນິກ, ຂອງ ບໍລິສັດ ອາໂກຣເຕັກ ໂປຣລາວ ຈຳກັດ ປະເທດ ມາເລເຊຍ ( AGRO VEGE FARM ) ຕັ້ງຢູ່ ບ້ານວັດຫລວງ, ເມືອງປາກຊ່ອງ, ແຂວງຈຳປາສັກ. ສວນປູກພືດຜັກໄຮໂດຣ ໂປນິກ ໄດ້ຮັບໃບຢັ້ງຢືນມາດຕະຖານກະສິກຳທີ່ດີລາວ ກ່ຽວກັບ ຄວາມປອດໄພຂອງຜົນຜະລິດ ຂອງ ກົມປູກຝັງ ກະຊວງກະສິກຳ ແລະປ່າໄມ້. ໃນເນື້ອທີ່ການຜະລິດປະມານ 40 ເຮັກຕາ ຊຶ່ງໄລຍະທີ່ໜຶ່ງແຜນພັດທະນາ 15 ເຮັກຕາ, ແມ່ນສໍາເລັດແລ້ວ 90% ໃນນັ້ນປະກອບມີ: ເຮືອນຮົ່ມ 23 ຫຼັງ, ເຮືອນຄັດເກດ 1 ຫຼັງ, ເຮືອນເພາະເບ້ຍ ແລະ ຍອດເມັດພັນ 1 ຫຼັງ, ໂຮງເຮືອນ ປ້ໍານ້ໍາ 2 ຫຼັງ, ເຮືອນພັກແບບຕູ້ຄອນເທນເນີ 8 ຫຼັງ, ຫ້ອງນ້ໍາຕູ້ຄອນເທນເນີ 1 ຫຼັງ, ຫໍພັກໃຫຍ່ 1 ຫຼັງ ປະກອບມີ 11 ຫ້ອງນອນ 4 ຫ້ອງນ້ໍາ , ເຮືອນພັກ ຈຳນວນ 3 ຫລັງ ແລະ ໂຮງເຮືອນລ້ຽງນົກ ແລະໄກ່. ສາມາດຜະ ລິດພືດຜັກປອດສານພິດເຊັ່ນ: ຜັກສະຫຼັດ, ໝາກເລັ່ນ, ໝາກແຕ່ງ, ຜັກກາດ, ຜັກຫອມໃບ, ໜໍ່ໄມ້ຝຣັ່ງ ແລະໝາກເຜັດໃຫຍ່ເປັນຕົ້ນ ໄດ້ປະມານ 1,000 ໂຕນ/ເດືອນ ແລະ ຍັງເກັບຊື້ກັບລູກຟາມທີ່ຢູ່ອ້ອມຂາງອີກປະ ມານ 1,200 ໂຕນ/ເດືອນ ລວມເປັນ 2,200 ໂຕນ/ເດືອນ.

ຂາຍຢູ່ພາຍໃນປະເທດ, ຮ້ານຊັບພະສິນ ຄ້າໃຫຍ່ ຕ່າງໆ 70%, ສົ່ງຂາຍ ນະຄອນຫລວງວຽງຈັນ ແມ່ນ 2 ຄັ້ງ ຕໍ່ ອາທິດ, ສະເລ່ຍຄັ້ງລະ 5 ໂຕນ, ພາຍໃນແຂວງຈຳປາສັກ ແຕ່ລະມື້ແມ່ນສະເລ່ຍ 1000 ກິໂລ ຕໍ່ມື້ ແລະ ອີກ 30% ແມ່ນສົ່ງອອກຕ່າງປະເທດ ເຊັ່ນ: ສິງກະໂປ, ຫົງກົງ ໄທ, ຫວຽດນາມ, ກຳປູເຈຍ, ຈີນ. ນອກນີ້ຍັງແປຮູບ ສະລັດໃນຮູບແບບເປັນກ່ອງທີ່ສາມາດກິນໄດ້ເລີຍ ແລະສົ່ງອອກຂາຍຕາມຮ້ານ ຊູບເປີມາເກັດໃຫຍ່ ຕ່າງໆ ແລະ ປັດຈຸບັນ ສະຖານທີ່ແຫ່ງນີ້ ຍັັງໄດ້ເປີດເປັນແຫລ່ງທ່ອງທ່ຽວ ເຊີງກະສິກຳ. ຈາກນັ້ນ ທ່ານປະທານຄະນະກວດກາສູນກາງພັກ ແລະຄະນະ ໄດ້ຢ້ຽມຢາມ ສວນກາເຟ ບໍລິລັດ ສົມໄຊຈະເລີນສົ່ງເສີມການກະເສດ ຢູ່ ເຂດພູພຽງບໍລະເວນ ໄດ້ປູກກາເຟ ພັນ Arabica ໃນເນື້ອທີ່ 1200 ເຮັກຕາ. ປູກເພື່ອສົ່ງເສີມການພັດທະນາ ກາເຟສະມັດຕະພາບສູງ ຕິດພັນກັບຕະຫລາດທີ່ໝັ້ນຄົງ.