ມີເດຍລາວແຂວງຈຳປາສັກ ຂ່າວ-ພາບ: ພຸດທະສິນ ວົງວິໄລທອງ
ຕອນບ່າຍວັນທີ 21 ກໍລະກົດ 2021 ນີ້ທີ່ສະໂມສອນເມືອງໂຂງ ແຂວງຈຳປາສັກ ໄດ້ມີພິທີປະກາດການຈັດຕັ້ງຄະນະປະຈຳພັກເມືອງ, ຮອງເຈົ້າເມືອງ, ກຳມະການພັກເມືອງ, ຫົວໜ້າຄະນະຈັດຕັ້ງເມືອງ ແລະ ຫົວໜ້າຫ້ອງການພາຍໃນເມືອງ; ໃຫ້ກຽດເຂົ້າຮ່ວມເປັນປະທານໃນພິທີຄັ້ງນີ້ໂດຍທ່ານ ສະນັ່ນ ສີພາພົມມະຈັນ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ, ທ່ານນາງ ຄຳພູ ລິດທິສັກ ກຳມະການພັກແຂວງ ເລຂາພັກເມືອງ ເຈົ້າເມືອງໆໂຂງ, ມີບັນດາສະຫາຍໃນຄະນະປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງເຂົ້າຮ່ວມ.

ໃນພິທີ ໄດ້ຜ່ານຂໍ້ຕົກລົງຂອງທ່ານເຈົ້າແຂວງຈຳປາສັກ ເລກທີ 732/ຈຂ.ສຂ ວ່າດ້ວຍການແຕ່ງຕັ້ງຮອງເຈົ້າເມືອງ ເຫັນດີແຕ່ງຕັ້ງທ່ານ ຄຳສິງ ບຸນຈະເລີນ ຄະນະປະຈຳພັກເມືອງ ເປັນຮອງເຈົ້າເມືອງໆໂຂງ, ຊີ້ນຳຂົງເຂດວັດທະນະທຳ-ສັງຄົມ; ມະຕິຕົກລົງຂອງຄະນະປະຈຳພັກແຂວງ ເລກທີ 332/ຄຈພຂ.ຈສ ວ່າດ້ວຍການອະນຸມັດບົ່ງຕົວແຕ່ງຕັ້ງຄະນະປະຈຳພັກເມືອງໂຂງ ສະໄໝທີ VIII ຄະນະປະຈຳພັກແຂວງຕົກລົງອະນຸມັດບົ່ງຕົວແຕ່ງຕັ້ງສະຫາຍ ວົງສະກຸນ ສອນສົມບັດ ກຳມະການພັກເມືອງ ເປັນຄະນະປະຈຳພັກເມືອງໂຂງ, ມະຕິຕົກລົງຂອງຄະນະປະຈຳພັກເມືອງໂຂງ ເລກທີ 339/ຄຈພ.ມຂ ວ່າດ້ວຍການແຕ່ງຕັ້ງຫົວໜ້າຄະນະຈັດຕັ້ງເມືອງໂຂງ ຄະນະປະຈຳພັກເມືອງໂຂງຕົກລົງແຕ່ງຕັ້ງ ສະຫາຍ ວົງສະກຸນ ສອນສົມບັດ ເປັນຫົວໜ້າຄະນະຈັດຕັ້ງເມືອງ.

ຂໍ້ຕົກລົງຂອງທ່ານເຈົ້າເມືອງໆໂຂງ ເລກທີ 133/ຈມ.ຂ ວ່າດ້ວຍການຮັບເອົາ ແລະ ແຕ່ງຕັ້ງຫົວໜ້າຫ້ອງການພາຍໃນເມືອງ ເຈົ້າເມືອງໆໂຂງຕົກລົງເຫັນດີ ຮັບເອົາທ່ານ ໜູແສງ ຜຸຍບັນດິດ ພະນັກງານທີ່ຍົກຍ້າຍມາຈາກພາກສ່ວນອື່ນ ແຕ່ງຕັ້ງເປັນຫົວໜ້າຫ້ອງການພາຍໃນເມືອງ, ມະຕິຕົກລົງຂອງຄະນະປະຈຳພັກເມືອງ ເລກທີ 333/ຄຈພຂ.ຈສ ວ່າດ້ວຍການອະນຸມັດບົງຕົວແຕ່ງຕັ້ງກຳມະການພັກເມືອງ ສະໄໝທີ VIII ຄະນະປະຈຳພັກເມືອງຕົກລົງອະນຸມັດບົ່ງຕົວແຕ່ງຕັ້ງສະຫາຍ ໜູແສງ ຜຸຍບັນດິດ ເລຂາໜ່ວຍພັກຮາກຖານ ເປັນກຳມະການພັກເມືອງ.