ໂຮງຮຽນ ປກສ ຊັ້ນສູງເລກ III ແຂວງສະຫວັນນະເຂດຈັດພິທີປິດຊຸດຮຽນລະບົບກໍ່ສ້າງ 2ປີ ກຳລັງ ປກສ ຮຸ່ນທີ່ IX ສົກຮຽນ 2017-2019 ພິທີດັ່ງກ່າວໄດ້ຈັດຂື້ນໃນໃນທ້າຍອາທິດທີ່ຜ່ານມານີ້ ໂດຍການເປັນປະທານຂອງທ່ານ ພັອ ລຳຄູນວໍລະວົງຮອງກອງບັນຊາການ ປກສ ແຂວງ, ທ່ານພັທ ບຸນທະວິ ວົງສູນທອນ ຮອງກົມກໍ່ສ້າງກຳລັງ ກົມໃຫຍ່ການເມືອງກະຊວງປ້ອງກັນຄວາມສະຫງົບ, ມີຄະນະອຳນວຍການໂຮງຮຽນ, ຄະນະກອງບັນຊາການ ປກສ ແຂວງ 6ແຂວງພາກກາງ, ຄະນະກອງບັນຊາການ ປກສ ເມືອງທັງ 14ຕົວເມືອງ, 1ນະຄອນ, ພະນັກງານຄູ-ອາຈານ ຕະຫຼອດຮອດນັກຮຽນເຂົ້າຮ່ວມທັງໝົດ 320ສະຫາຍ, ຍິງ 45ສະຫາຍ
ທ່ານ ພັທ ສົມວິໄຊ ພົມມະຈັນ ຮອງອຳນວຍການໂຮງຮຽນ ປກສ ຊັ້ນສູງເລກIII ໄດ້ຂື້ນຜ່ານບົດສະຫຼຸບ-ຕີລາຄາຜົນໂຄງການ ການຮຽນ-ການສອນ ຂອງນັກຮຽນຮຸນທີ່ IX ລະບົບກໍ່ສ້າງ ເຊິ່ງມີນັກຮຽນທັງໝົດ276/42 ສະຫາຍ, ໄດ້ແບ່ງອອກເປັນ 2ກອງຮ້ອຍ, 2ຂະແຫນງການ ຮຽນຄື:

ຂະແຫນງສັນຕິບານ ຈໍານວນ 136/16 ສະຫາຍ ແລະ ຂະແຫນງຕາໍຫຼວດ ຈໍານວນ 138/19ສະຫາຍ ຕະຫຼອດໄລຍະການຈັດຕັ້ງປະຕິບັດໂຄງການທີ່ຜ່ານມານັ້ນພະນັກງານຄູ-ອາຈານໄດ້ເອົາໃຈໃສ່ຄົ້ນຄວ້າ ແລະ ອອກຕາຕະລາງສິດສອນຢ່າງເປັນປົກກະຕິຕາມກະຊວງສຶກສາທິການວາງອອກ ໄດ້ເອົາໃຈໃສ່ດໍາເນີນວຽກງານສຶກສາອົບຮົມການເມືອງແນວຄິດຢ່າງເປັນປົກກະຕິເຊັ່ນ: ໄດ້ນາໍເອົາຂໍ້ກໍານົດກົດລະບຽບຂອງໂຮງຮຽນ, ມະຕິ, ຄໍາສັ່ງ, ກົດຫມາຍຕ່າງໆມາເຜີຍແຜ່ ເພື່ອໃຫ້ຮັບຮູ້ ແລະ ພ້ອມກັນຈັດຕັ້ງປະຕິບັດ, ຜ່ານການຄັ້ນຄ້ວາຮ່ຳຮຽນ ແລະ ສອບເສັງຈົບຊັ້ນ ສາມາດຄັດເລືອກນັກຮຽນທີ່ຮຽນດີຮຽນເກັ່ງດັ່ງນີ້: ຮຽນເກັ່ງ ຄະແນນ 9ໝົດ 3ວິຊາມີ 67/07ສະຫາຍກວມ 24/45%, ຮຽນດີຄະແນນ 8ຂື້ນໄປ ມີ149/30ສະຫາຍ ກວມ 54,37%, ຮຽນດີພໍໃຊ້ຄະແນນ 7ຂື້ນໄປມີ 58/05 ສະຫາຍ ກວມ21,16%, ຈາກນັ້ນທ່ານພັທ ພຸດທະສັກ ສິລິ ຮອງອຳນວຍການໂຮງຮຽນ ປກສ ຊັ້ນສູງເລກIII ໄດ້ຂື້ນຜ່ານຂໍ້ຕົກລົງຂອງກົມໃຫຍ່ການເມືອງປ້ອງກັນຄວາມສະຫງົບ ສະບັບເລກທີ 2839/ມປສ ວ່າດ້ວຍການອະນຸມັດຮັບຮອງຈົບຊັ້ນ ແລະປິດຊຸດຮຽນໃຫ້ແກ່ນັກຮຽນຮຸ່ນທີ່ IX ໂຮງຮຽນ ປກສຊັ້ນສູງເລກIIIແຂວງສະຫວັນນະເຂດ, ແລະ ຍັງໄດ້ຜ່ານຂໍ້ຕົກລົງເລື່ອນຊັ້ນປະດັບຊັ້ນ, ຊັບຊອນ, ຂໍ້ຕົກລົງຍ້ອງຍໍ ແລະ ໃບກິດຕິຄຸນໃນນາມລວມ ແລະ ບຸກຄົນ ໃຫ້ນັກສຳມະນາກອນຮຸ່ນດັ່ງກ່າວ ເປັນກຽດມອບໂດຍທ່ານ ພັອ ລຳຄູນວໍລະວົງຮອງກອງບັນຊາການ ປກສ ແຂວງ ສະຫວັນນະເຂດ.

ພາບ- ຂ່າວ: ສີສະເຫຼີມສັກ ສິມມາລາ