ວັນທີ 8 ກັນຍາ 2019 ທີ່ຜ່ານມາ, ເລີ່ມຕົ້ນກິດຈະກຳສຳຫຼວດປະເທດຈີນທີ່ເມືອງບໍ່ນ້ຳພຸທຳມະຊາດນະຄອນຈີໜານຄັ້ງນີ້. ຄະນະສື່ມວນຊົນນາໆຊາດຈາກ 12 ປະເທດອາຊີ ແລະ ເອີຣົບ ໄດ້ທ່ຽວຊົມບໍ່ນ້ຳພຸເສືອດຳ ( Black Tiger Spring) ເຊິ່ງຕັ້ງຢູ່ລຸ່ມໜ້າຜາຫີນທີ່ສູງຊັນໃນເມືອງລີເຊຍນະຄອນຈີໜານ. ສຽງນ້ຳຕົກສາດມາຈາກໜ້າຜາເປັນຄ້າຍຄືກັບວ່າ ສຽງຄຳລາມຂອງເສືອ ນັ້ນຈິ່ງເປັນທີ່ມາຂອງຊື່ບໍ່ນ້ຳພຸເສືອດຳ. ບໍ່ນ້ຳພຸແຫ່ງນີ້ມີແຫຼ່ງກຳເນີດຢູ່ໃນຖ້ຳຕາມທຳມະຊາດທີ່ສູງ 2 ແມັດ,ເລິກ 3 ແມັດ ແລະ ກວ້າງ 1,7ແມັດ. ໃນບໍລິເວນບໍ່ນ້ຳພຸດັ່ງກ່າວຍັງໄດ້ສ້າງເປັນເໝືອນສະລອຍນ້ຳທີ່ສ້າງຂຶ້ນດ້ວຍຫີນກວ້າງ 17 ແມັດ,ເລິກ 3 ແມັດ. ມີປະລິມານນ້ຳໄຫຼ 41.000 ແມັດກ້ອນຕໍ່ວັນ. ຢູ່ທີ່ນີ້ຈະມີຮູບແກະສະຫຼັກດ້ວຍຫີນເປັນຫົວເສືອ 3 ຕົວຢູ່ຜາຜະໜັງໄປທາງທິດໃຕ້ ແລະ ມີບໍ່ນ້ຳພຸນ້ອຍໃຫຍ່ອອ້ມຮອບສະຖານທີ່ນີ້ເຖິງ 14 ບໍ່. ຢູ່ທີ່ນີ້ ຈະເຫັນກຸ່ມຄົນຜູ້ເຖົ້າຜູ້ແກ່ເປັນກຸ່ມເປັນກ້ອນລຽນຄິວກັນເຂົ້າອອກ ເພື່ອໂຕ່ງເອົານ້ຳພຸທີ່ໄຫຼອອກມາຈາກໂງ່ນຫີນ ເພື່ອນຳເອົາໄປປຸງແຕ່ງອາຫານ ຫຼື ເຄື່ອງດື່ມ ເຊິ່ງຫຼາຍຮ້ອຍປີມາແລ້ວປະຊາຊົນເຊື່ອວ່າເປັນນ້ຳທີ່ບໍລິສຸດ,ນ້ຳສັກສິດ ຖ້າໃຜໄດ້ກິນໄດ້ດື່ມກໍ່ຈະມີອາຍຸໝັ້ນຂວັນຍືນ.

ອອກຈາກບໍ່ນ້ຳພຸເສືອດຳ ຄະນະສື່ມວນຊົນພວກເຮົາໄດ້ສືບຕໍ່ນັ່ງເຮືອນຳທ່ຽວແບບເອກະລັກວັດທະນະທຳດັ້ງເດີມຂອງຊາວຈີນ ລ່ອງໄປຕາມລຳຄອງ ຂອງແມ່ນ້ຳຮູ້ເສີງ, ເປັນລຳຄອງນ້ອຍໆ ເລິກປະມານ 2-3 ແມັດ,ກວ້າງແຕ່ 10-20 ແມັດ ທີ່ມີສະພາບແວດລ້ອມສີຂຽວ ແລະ ສະອາດງາມຕາ ສອງຝັ່ງຖືກກໍ່ສ້າງເປັນຄູເມືອງ ຄ້າຍຄືຄູຫີນໃນທຳມະຊາດ ເປັນຊານລະບຽງຕາມແຄມນ້ຳ ປະດັບດ້ວຍສວນຫຍ້າ ແລະ ຕົ້ນໄມ້ເອກະລັກຂອງຕົວເມືອງຄືຕົ້ນຫຼິວເປັນຍອຍຍາວຢຽດລົງມາແຕ່ເທິງລົງລຸ່ມ ເຮັດໃຫ້ກ້ອງຕົ້ນໄມ້ເປັນພຸ່ມ ແລະ ຮົ່ມເຢັນດີ. ເພື່ອສືບຕໍ່ໄປຊົມບໍ່ນ້ຳພຸຢູ່ຖັດຂຶ້ນໄປທາງທິດເໜືອປະມານ 2 ກິໂລແມັດ ເຊິ່ງມີຊື່ເອີ້ນວ່າ: ສວນສາທາລະນະບໍ່ນ້ຳພຸເບົາຕູ ເຊິ່ງຕັ້ງຢູ່ໃຈກາງເມືອງຂອງນະຄອນຈີໜານ ທີ່ສ້າງຂຶ້ນມາແຕ່ປີ 1956 ມີເນື້ອທີ່ກວມເອົາ 10,5 ເຮັກຕາ.ເປັນສວນສາທາລະນະດ້ານວັດທະນະທຳບໍ່ນ້ຳພຸທຳມະຊາດທີ່ມີຊື່ສຽງທີ່ທົ່ວໂລກຮູ້ຈັກດີ.

ຫວນກັບໄປ 3.500 ກວ່າປີຄືນຫຼັງ, ເຈົ້າຈັກກະພັດສຽນຫຼົງ (1711-1799) ໄດ້ມາຢ້ຽມຢາມນະຄອນຈີໜານ ພະອົງໄດ້ດື່ມນ້ຳຊາທີ່ປຸງຈາກບໍ່ນ້ຳພຸ ໄດ້ເຮັດໃຫ້ພະອົງຮູ້ສຶກມີຄວາມປະທັບໃຈ ແລະ ສຳຜັດໄດ້ເຖິງລົດຊາດ ແລະ ກິ່ນຫອມຂອງມັນ ພະອົງຈິ່ງໄດ້ໃຫ້ສາຍານາມວ່າ: “ເປັນບໍ່ນ້ຳທີ່ດີທີ່ສຸດຢູ່ໃຕ້ສະຫວັນ” ເລື່ອງລາວການຢ້ຽມຢາມຂອງພະອົງໄດ້ຖືກຈາລຶກໄວ້ໃນກ້ອນຫີນສີຂາວຢູ່ດ້ານຂ້າງຂອງບໍ່ນ້ຳພຸ.ຕົ້ນກຳເນີດຂອງບໍ່ນ້ຳພຸເບົາຕູ ແມ່ນຢູ່ຕໍ່ໜ້າຂອງຫໍໄຫວ້ພາຍໃນສວນສາທາລະນະ, ເປັນບໍ່ນ້ໍາພຸທີ່ໄຫຼແຮງ ພົ່ນອອກມາຈາກຮູຖ້ຳໃຕ້ດິນ 3 ບໍ່ ເຊິ່ງມີປະລິມານນ້ຳໄຫຼ 70.000 ແມັດກ້ອນຕໍ່ວັນ. ເຊິ່ງເປັນໜຶ່ງໃນ 3 ອັນດັບຂອງສະຖານທີ່ທ່ອງທ່ຽວທີ່ສວຍງາມຂອງນະຄອນຈີໜານ ລວມມີພູເຂົາສຽນຟົງ ແລະ ທະເລສາບດ້າໝິງ.ເຊິ່ງບໍ່ນ້ຳພຸດັ່ງກ່າວໄດ້ຈັດເຂົ້າໃນບັນຊີລາຍຊື່ເປັນອັນດັບ 5 ຂອງສະຖານທີ່ທ່ອງທ່ຽວແຫ່ງຊາດ.

ອອກຈາກສວນສາທາລະນະບໍ່ນ້ຳພຸເບົາຕູ ຄະນະພວກເຮົາໄດ້ສືບຕໍ່ນັ່ງເຮືອໄປຕາມລຳຄອງນ້ອຍໆ ຢູ່ໃຈກາງເມືອງ ແຕ່ແວດລ້ອມໄປດ້ວຍຄວາມສະອາດສວຍງາມຂອງສອງຟາກຝັ່ງທີ່ເປັນຄູເມືອງ ເພື່ອມຸ້ງໜ້າອອກສູ່ທະເລສາບດ້າໝິງໃນເມືອງລີເຊຍນະຄອນຈີໜານ ທີ່ກຳເນີດມາຈາກບໍ່ນ້ຳພຸຈຳນວນມະຫາສານພາຍໃນຕົວເມືອງ. ປະລິມານ້ຳທີ່ໃສ,ຕົ້ນໄມ້ ແລະ ດອກບົວ, ຫໍວິຫານ ແລະ ຊານລະບຽງອອ້ມຮອບຕາມແຄມນ້ຳ ເຮັດໃຫ້ສະຖານທີ່ດັ່ງກ່າວກາຍເປັນທັດສະນີຍະພາບທີ່ໜ້າຊື່ນຊົມຫຼາຍ.ໃນບໍລິເວນແມ່ນ້ຳນີ້ລວມມີ 58 ເຮັກຕາ ແຕ່ມີຄວາມເລິກສະເລ່ຍພຽງແຕ່ 2 ແມັດ. ທະເລສາບແຫ່ງນີ້ໄດ້ກາຍເປັນສະຖານທີ່ທີ່ຮູ້ຈັກກັນດີຂອງນັກທ່ອງທ່ຽວທັງພາຍໃນ ແລະ ຕ່າງປະເທດ.

ຢູ່ໃຈກາງແມ່ນ້ຳຍັງມີດອນນ້ອຍແຫ່ງໜຶ່ງ ແລະ ມີຫໍວິຫານທີ່ເກົ່າແກ່ບູຮານທີ່ສ້າງຂຶ້ນດ້ວຍໄມ້ ແລະ ໄດ້ຖືກຈາລຶກໄວ້ໃນກະດານໄມ້ ທີ່ລົງລາຍມືດ້ວຍເຈົ້າຈັກກະພັດສຽນຫຼົງ ເຊິ່ງຍັງອະນຸລັກ ແລະ ສະຫງວນໄວ້. ປັດຈຸບັນ ໄດ້ຖືກນຳໃຊ້ເປັນບ່ອນຈັດກິດຈະກຳກອງປະຊຸມກາງແຈ້ງແຄມນ້ຳ,ງານລ້ຽງ ແລະ ງານສັງສັນທີ່ສຳຄັນຕ່າງໆໃນລະດັບທ້ອງຖິ່ນ,ລະດັບຊາດ ແລະ ລະດັບນາໆຊາດ.
ຈາກນັ້ນ,ຄະນະພວກເຮົາກໍ່ໄດ້ຂຶ້ນໄປຫໍຄອຍຈ້າວຫຼານ ເພື່ອຊົມວິວທິທັດອັນສວຍງາມຂອງທະເລສາບດ້າໝິງ ແລະ ຄວາມສວຍສົດງົດງາມຂອງຕົວເມືອງ ແຫ່ງມົນສະເໜ່ ທີ່ຍັງມີກິ່ນອາຍ, ຄວາມເປັນເອກະລັກດັ້ງເດີມ ແລະ ຄວາມທັນສະໄໝອອ້ມຮອບທີ່ຖືກອອກແບບມາ ໃຫ້ກົມກືນກັບທຳມະຊາດ ແລະ ສະພາບແວດລ້ອມທີ່ນີ້ໄດ້ຢ່າງລົງຕົວ.

ສື່ມວນຊົນແຂວງຈຳປາສັກ
ໂດຍ: ມົນທຽນ