ວັນທີ 30 ກັນຍາ 2019 ນີ້ ຄະນະຜູ້ແທນຂັ້ນສູງນະຄອນດາຫນັງ ພ້ອມຄະນະ ນໍາໂດຍທ່ານ ເຈືອງກວາງ ເຫງ້ຍ #ກຳມະກາສູນກາງພັກກອມມູນິດຫວຽດນາມ, ເລຂາຄະນະພັກ ນະຄອນດາຫນັງ ສສ ຫວຽດນາມ ໄດ້ເຄື່ອນໄຫວຢ້ຽມ ແລະເຮັດວຽກຢູ່ #ແຂວງເຊກອງ ຊຶ່ງໄດ້ຮັບການຕ້ອນຮັບ ຈາກຄະນະນໍາຂັ້ນສູງແຂວງເຊກອງ ຊຶ່ງນໍາໂດຍ ທ່ານ ຄໍາເຜີຍ ວຸດດາວຽງ ກຳມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ ພ້ອມຄະນະ.
ຊຶ່ງການມາຢ້ຽມຢາມ ແລະເຮັດວຽກຢູ່ແຂວງເຊກອງໃນຄັ້ງນີ້ ຄະນະນໍາຂັ້ນສູງນະຄອນດາຫນັງ ຮ່ວມກັບຄະນະນໍາຂັ້ນສູງແຂວງເຊກອງ ໄດ້ໄປຢ້ຽມຊົມໂຮງຮຽນທິດສະດີການເມືອງ-ການປົກຄອງແຂວງເຊກອງ ເຊິ່ງໂຮງຮຽນດັ່ງກ່າວ ໄດ້ຮັບທຶນສົມທົບໃນການກໍ່ສ້າງ ຈາກນະຄອນດາຫນັງ ຈໍານວນ 10 ຕື້ກວ່າດົ້ງ ໃນສົກປີ 2009-2010 ແລະໄດ້ຮັບຄອມພິວເຕີ 7 ຊຸດ ມູນຄ່າ 120 ລ້ານດົ້ງ ໃນປີ 2016.

ນອກຈາກນີ້ຍັງໄດ້ໄປຢ້ຽມຊົມ ສູນພາສາຫວຽດ ແຂວງເຊກອງ ຕື່ມອີກ ຊຶ່ງສູນພາສາຫວຽດປະຈໍາແຂວງເຊກອງ ກໍ່ສ້າງໃນປີ 2017 ແລະສໍາເລັດມອບນໍາໃຊ້ ແລະເລີ່ມການຮຽນ-ການສອນ ແຕ່ກາງປີ 2018, ໂດຍທຶນຊ່ວຍເຫລືອລ້າຈາກນະຄອນດາຫນັງ ສສ ຫວຽດນາມ ລວມມູນຄ່າ 6,5 ຕື້ດົ້ງ, ມີອາຈານສອນທີ່ມາຈາກ ນະຄອນດາຫນັງ ຈໍານວນ 2 ຄົນ, ຍິງ 1 ຄົນ, ຊຶ່ງສູນດັ່ງກ່າວໄດ້ປະກອບສ່ວນດ້ານການຮຽນ-ການສອນພາສາຫວຽດ ໃຫ້ແກ່ພະນັກງານ, ນັກຮຽນ, ນັກສຶກສາປັນຍາຊົນທົ່ວໄປ ໄດ້ມີຄວາມຮູ້ດ້ານພາສາຫວຽດຂັ້ນພື້ນຖານ ກ່ອນໄປສຶກສາຢູ່ປະເທດ ສສ ຫວຽດນາມ, ໂດຍໄດ້ເປີດການຮຽນ-ການສອນພາສາຫວຽດນາມ ມີ 2 ລະບົບ ຄື: ລະບົບ 3 ເດືອນ ແລະ 6 ເດືອນ.

ນອກນີ້ ຄະນະຜູ້ແທນຂັ້ນສູງນະຄອນດາຫນັງ ຍັງໄດ້ມອບທຶນຊ່ວຍເຫຼືອໃຫ້ ໂຮງຮຽນການເມືອງການປົກຄອງ ແລະ ສູນພາສາຫວຽດ ປະຈໍາແຂວງເຊກອງ ຜູ້ລະ 100 ລ້ານດົ້ງ ເພື່ອນໍາໄປໃຊ້ເຂົ້າໃນການພັດທະນາການຮຽນ-ການສອນ ໃຫ້ມີປະສິດທິຜົນ ແລະຄຸນນະພາບສູງຂຶ້ນເລື້ອຍໆ; ນະຄອນດາຫນັງ ນອກຈາກໄດ້ຊ່ວຍເຫລືອທາງການພັດທະນາພື້ນຖານໂຄງລ່າງ,ເສດຖະກິດສັງຄົມໃຫ້ແກ່ແຂວງເຊກອງແລ້ວ ຍັງໄດ້ຊ່ວຍເຫລືອທາງດ້ານພັດທະນາຊັບພະຍາກອນມະນຸດຕື່ມອີກ; ທັງນີ້ ກໍເພື່ອເປັນການຮັດແຫນ້ນສາຍພົວພັນມິດຕະພາບລະຫວ່າງລາວ-ຫວຽດນາມ, ຫວຽດນາມລາວ ເວົ້າລວມ, ເວົ້າສະເພາະ ແຂວງເຊກອງ ແລະນະຄອນດາຫນັງ ໃຫ້ໝັ້ນຄົງທະນົງແກ່ນຂຶ້ນເລື້ອຍໆ