ວັນທີ 1 ຕຸລາ ນີ້ ຄະນະຜູ້ແທນຂັ້ນສູງນະຄອນດາຫນັງ ພ້ອມຄະນະ ນໍາໂດຍທ່ານ ເຈືອງກວາງ ເຫງ້ຍ ກຳມະກາສູນກາງພັກກອມມູນິດຫວຽດນາມ, ເລຂາຄະນະພັກນະຄອນດາຫນັງ ສສ ຫວຽດນາມ ໄດ້ເຂົ້າຮ່ວມກອງປະຊຸມປະຈໍາປີ 2019 ລະຫວ່າງ ຄະນະນໍາຂັ້ນສູງແຂວງເຊກອງ ແລະຄະນະຜູ້ແທນຂັ້ນສູງນະຄອນດາຫນັງ ທີ່ແຂວງເຊກອງ ຊຶ່ງໄດ້ຮັບການຕ້ອນຮັບ ຈາກຄະນະນໍາຂັ້ນສູງແຂວງເຊກອງ ຊຶ່ງນໍາໂດຍ ທ່ານ ຄໍາເຜີຍ ບຸດດາວຽງ ກຳມະການສູນກາງພັກປະຊາຊົນປະຕິວັດລາວ, ເລຂາພັກແຂວງ, ເຈົ້າແຂວງເຊກອງ ພ້ອມຄະນະ.

ໃນວາລະກອງປະຊຸມ ຄະນະຜູ້ແທນຂັ້ນສູງທັງສອງຝ່າຍ ໄດ້ສະຫລຸບຕີລາຄືນຜົນສໍາເລັດການຈັດຕັ້ງປະຕິບັດເນື້ອໃນບົດບັນທຶກການຮ່ວມມື ຮອບດ້ານ ລະຫວ່າງສອງແຂວງ ເຊກອງ-ດາຫນັງ ໄລຍະປີ 2017-2019 ແລະທິດທາງແຜນການໃນຕໍ່ໜ້າ; ຊຶ່ງທ່ານ ເຫລັກໄຫລ ສີວິໄລ ກໍາມະການປະຈໍາພັກແຂວງ, ຮອງເຈົ້າແຂວງເຊກອງ ໃຫ້ຮູ້ວ່າ: ການພົວພັນຮ່ວມມືລະຫວ່າງສອງແຂວງ ມີການພັດທະນາຢ່າງຕໍ່ເນື່ອງ ໂດຍສະເພາະດ້ານວັດທະນະທໍາສັງຄົມ, ດ້ານເສດຖະກິດ, ການລົງທຶນ ແລະກໍ່ສ້າງພື້ນຖານໂຄງລ່າງ , ພິເສດແມ່ນບັນດາໂຄງການກໍ່ສ້າງເສັ້ນທາງຄົມມະນາຄົມ, ໂຄງການພັດທະນາກະສິກໍາເປັນຕົ້ນ: ການປູກ-ການລ້ຽງ ແລະພັດທະນາການທ່ອງທ່ຽວ, ນອກນີ້ຍັງຊ່ວຍໃນດ້ານການພົວພັນຮ່ວມມືກ່ຽວກັບວຽກງານປ້ອງກັນຊາດ-ປ້ອງກັນຄວາມສະຫງົບຕື່ມອີກ.

ສໍາລັບແຜນການຕໍ່ໜ້າ ທັງສອງຝ່າຍຈະສືບຕໍ່ຮັກສາ ແລະເສີມຂະຫຍາຍມູນເຊື້ອສາຍພົວພັນມິດຕະພາບ, ຄວາມສາມັກຄີພິເສດອັນດີງາມລະຫວ່າງສອງຊາດລາວ-ຫວຽດນາມ ເວົ້າລວມ, ເວົ້າສະເພາະ ເຊກອງ-ດາຫນັງໃຫ້ນັບມື້ພັດທະນາຂຶ້ນເລື້ອຍໆ.
ນອກຈາກນີ້ ຄະນະຜູ້ແທນທັງສອງຝ່າຍ ໄດ້ຜັດປ່ຽນກັນແລກປ່ຽນຄໍາຄິດເຫັນ ຊຶ່ງແຂວງເຊກອງ ໄດ້ສະເໜີ ໃນຕໍ່ໜ້າ ໃຫ້ຊ່ວຍຮັບຊື້ຜົນຜະລິດຕະພັນກະສິກໍາຂອງແຂວງເຊກອງ ໃນລາຄາທີ່ເໝາະສົມ, ຊ່ວຍສົ່ງເສີມດ້ານລົງທຶນການທ່ອງທ່ຽວ ແລະໃຫ້ຊ່ວຍພິຈາລະນາສ້າງຊັບພະຍາກອນມະນຸດລະດັບປະລິນຍາເອກ ສາຍສຶກສາ (ຄູ), ກະສິກໍາ ແລະແພດສາດ; ບົດບັນທຶກຮ່ວມມື ໃນຊຸມປີຕໍ່ຫນ້າ ສະເໜີໃຫ້ສອງແຂວງສືບຕໍ່ຄົ້ນຄວ້າເພີ່ມທຶນຈາກ 18ທຶນ/ປີ ເປັນ 30 ທຶນ/ປີ ແລະການສະໜອງທຶນຜ່ານມາເຫັນວ່າມີທຶນ 50% ຂໍໃຫ້ຊ່ວຍເປັນທຶນ 100% ທັງຫມົດໄດ້ບໍ?; ຊຶ່ງຝ່າຍນະຄອນດາຫນັງ ກ່າວວ່າ ຈະພະຍາຍາມໃຫ້ໄດ້ຈັດກອງປະຊຸມ ເພື່ອຊຸກຍູ້ນັກລົງທຶນ ຈາກ ສສ ຫຽດນາມ ມາລົງທຶນຢູ່ແຂວງເຊກອງໃຫ້ຫຼາຍຂຶ້ນ, ພ້ອມທັງສະເຫນີ ໃຫ້ພາກສ່ວນທີ່ກ່ຽວຂ້ອງ ໃຫ້ຄິດໄລ່ມູນຄ່າການກໍ່ສ້າງ ຫໍສະຫມຸດ ຢູ່ໂຮງຮຽນການເມືອງການປົກຄອງແຂວງເຊກອງ ເພື່ອສະເໜີຂໍທຶນຊ່ວຍເຫຼືອໃນຕໍ່ໜ້າ.
ນອກນີ້ ຄະນະຜູ້ແທນທັງສອງຝ່າຍ ໄດ້ເຂົ້າຢ້ຽມຢາມ ຄອບຄົວຂອງທ່ານ ໂບເຍີນ ເລຫວຽດມ່ວງ ອະດີດກໍາມະການສູນກາງພັກ, ອະດີດເລຂາພັກແຂວງ, ເຈົ້າແຂວງ-ແຂວງເຊກອງ ໃນເມື່ອກ່ອນ ຕື່ມອີກ.

ຂ່າວ: ພຸດທະສອນ